1, 2. Ġesù kif wera l-imħabba profonda li għandu għall-bnedmin?

L-EWWEL Iben imwieled t’Alla hu l-aqwa eżempju tal-għerf inkredibbli taʼ Ġeħova u hu kien il-“ħaddiem tas-sengħa” taʼ Missieru. Immaġina kemm Ġesù kien ferħan u sodisfatt hekk kif Missieru “ħejja s-smewwiet” u “stabbilixxa s-sisien taʼ l-art”! Imma mill-affarijiet kollha li ħalaq Missieru, Ġesù b’mod speċjali ‘kien jgħożż ulied il-bnedmin.’ (Proverbji 8:22-31) Iva, hu ħabb lill-bnedmin sa mill-bidu nett.

² Iktar tard, Ġesù wera l-lealtà u l-imħabba tiegħu lejn Missieru u l-imħabba profonda li għandu għall-bnedmin kollha meta kien lest li jinżel mis-smewwiet biex jgħix fuq l-art bħala bniedem. Ġesù bi mħabba għamel dan ħalli jkun jistaʼ jagħti ħajtu bħala “fidwa għal ħafna.” (Mattew 20:28; Filippin 2:5-8) Waqt li Ġesù kien fuq l-art, Alla tah il-qawwa li jagħmel il-mirakli. Dawn il-mirakli juru kemm Ġesù jħobb lin-nies u juru liema affarijiet tal-għaġeb dalwaqt se jagħmel għall-bnedmin.

3. X’se nikkunsidraw f’dan l-artiklu?

 ³ Waqt li kien fuq l-art, Ġesù pprietka “l-aħbar tajba tas-saltna t’Alla.” (Luqa 4:43) Kien jaf li din is-Saltna kienet se tqaddes isem Missieru u li kienet se ssolvi l-problemi tal-bnedmin għal dejjem. Ġesù għamel bosta mirakli hu u jipprietka. Dawn il-mirakli wrew kemm tassew kien jimpurtah mill-bnedmin kollha. Dan għala hu importanti għalina? Għax dak li għamel jagħtina tama u fiduċja għall-futur. Ejja nikkunsidraw erbgħa mill-mirakli taʼ Ġesù.

4. X’ġara meta Ġesù ltaqaʼ maʼ raġel bil-ġdiem?

⁴ Matul il-ministeru tiegħu, Ġesù mar fi nħawi li jissejħu l-Galilija. F’waħda mill-bliet t’hemmhekk, hu ltaqaʼ maʼ raġel li kellu marda kiefra, il-ġdiem. (Marku 1:39, 40) Ir-raġel tant kien marid li Luqa, li kien tabib, iddeskrivieh bħala li kien “mimli ġdiem.” (Luqa 5:12) Il-Bibbja tgħid li meta r-raġel marid ra lil Ġesù, “inxteħet wiċċu fl-art, talbu bil-ħniena, u qallu: ‘Mulej, jekk trid, tistaʼ tnaddafni.’” Ir-raġel kien jaf li Ġesù kellu l-qawwa biex ifejqu, imma kellu bżonn ikun jaf jekk Ġesù riedx ifejqu. Għala? Għax ried ikun jaf jekk Ġesù kienx bħall-Fariżej, li kienu jistmerru lin-nies li kellhom il-ġdiem. Imma x’kien qed jaħseb Ġesù? Kif kien se jittratta lil dan ir-raġel li abbli kien sfigurat ħafna? Kieku int x’kont tagħmel?

5. Ġesù għala ried ifejjaq lir-raġel li kellu l-ġdiem?

⁵ Milli jidher, ir-raġel marid m’għajjatx, “Mhux nadif, mhux nadif!” kif kienet tirrikjedi l-Liġi Mosajka. (Levitiku 13:43-46) Imma Ġesù m’għamilx għalih. Minflok, kien jimpurtah mir-raġel u ried jgħinu. Ma nafux eżatt x’kien għaddej minn moħħ Ġesù, imma nafu kif ħassu. Tant tħassar lir-raġel li għamel miraklu miegħu. Hu mess lir-raġel, xi ħaġa li ħadd ieħor ma kien ikun lest li jagħmel. B’fiduċja u mogħdrija, Ġesù qal: “Irrid. Indaf.” Imbagħad “il-ġdiem għab minn fuqu.” (Luqa 5:13) Jidher ċar li Ġeħova ta lil Ġesù l-qawwa biex jagħmel dan il-miraklu tal-għaġeb u biex juri kemm iħobb lin-nies.—Luqa 5:17.

6. X’inhu interessanti dwar il-mirakli li għamel Ġesù, u x’juru?

⁶ Bil-qawwa t’Alla, Ġesù setaʼ jagħmel ħafna mirakli meraviljużi. Hu ma fejjaqx biss lin-nies li kellhom il-ġdiem, imma fejjaq ukoll lil nies b’kull xorta taʼ mard. Il-Bibbja tgħidilna li n-nies baqgħu mistagħġbin meta raw “il-muti jitkellmu, iz-zopop jimxu, u l-għomja jaraw.” (Mattew 15:31) Meta Ġesù fejjaq lil xi ħadd, ma kellux bżonn lil xi ħadd f’saħħtu biex jagħti l-organi tiegħu. Le, Ġesù kellu l-qawwa biex ifejjaq il-partijiet morda tal-ġisem. U fejjaq lin-nies minnufih, kultant anke lil dawk li kienu ’l bogħod minnu. (Ġwanni 4:46-54) Dawn l-eżempji rimarkevoli x’juru? Juru li s-Sultan tagħna, Ġesù Kristu, għandu l-qawwa u x-xewqa li jneħħi l-mard kollu għal dejjem. Meta nitgħallmu dwar kif Ġesù ttratta lin-nies, dan  jagħtina l-fiduċja li fid-dinja l-ġdida “se jiddispjaċih għall-batut u għall-fqir.” (Salm 72:13) Ġesù se jfejjaq lil kull min qed ibati għax tassew irid jagħmel dan.

7, 8. Iddeskrivi x’ġara qabel ma Ġesù ltaqaʼ maʼ raġel marid f’Betzata.

⁷ Ftit xhur wara li fejjaq lir-raġel li kellu l-ġdiem, Ġesù vvjaġġa mill-Galilija sal-Lhudija fejn kompla jipprietka l-aħbar tajba tas-Saltna t’Alla. Żgur li kien hemm eluf taʼ nies li semgħu l-messaġġ taʼ Ġesù u li qalbhom intmessetilhom bl-imħabba li wriehom. Ġesù verament ried ifarraġ lill-foqra u l-magħkusin u jagħti lil dawn in-nies tama.—Isaija 61:1, 2; Luqa 4:18-21.

⁸ Fix-xahar taʼ Nisan, Ġesù vvjaġġa lejn Ġerusalemm biex jiċċelebra l-Qbiż. Il-belt kienet mimlija attività hekk kif in-nies waslu għal din il-festa speċjali. Lejn it-Tramuntana tat-tempju kien hemm għadira magħrufa bħala Betzata, u hemm Ġesù ltaqaʼ maʼ raġel li ma setax jimxi.

9, 10. (a) In-nies għala kienu jmorru fl-għadira taʼ Betzata? (b) Ġesù x’għamel ħdejn l-għadira, u dan x’jgħallimna? (Ara l-ewwel stampa.)

⁹ Folol taʼ nies morda kienu jmorru Betzata. Għala? Għax kienu jemmnu li xi ħadd marid setaʼ jitfejjaq b’mod mirakoluż jekk jinżel fl-għadira meta l-ilma jkun qed jiċċaqlaq. Immaġina ftit x’ġenn kien hemm peress li tant nies li riedu jitfejqu kienu ddisprati, ansjużi, u bla tama! Ġesù kien perfett u żgur li ma kellux bżonn li jiġi mfejjaq, allura għala mar hemm? L-imħabba tiegħu għan-nies qanqlitu jmur. U kien hemmhekk li ltaqaʼ maʼ raġel li kien ilu marid 38 sena, iktar minn kemm kien ilu ħaj fuq l-art Ġesù.—Aqra Ġwanni 5:5-9.

¹⁰ Ġesù staqsa lir-raġel jekk riedx jerġaʼ jimxi. Ġib quddiem għajnejk in-niket tar-raġel meta qal lil Ġesù li ried ifiq imma ma setax, għax ma kien hemm ħadd biex jgħinu jinżel fl-għadira. Imbagħad Ġesù qal lir-raġel biex jagħmel xi ħaġa impossibbli. Qallu biex jerfaʼ soddtu u jimxi, u allura r-raġel hekk għamel, refaʼ soddtu u beda jimxi! Dan il-miraklu juri b’mod mill-isbaħ x’se jagħmel Ġesù fid-dinja l-ġdida. Jurina wkoll l-imħabba profonda li Ġesù għandu għan-nies. Hu fittex lil dawk li kellhom bżonn l-għajnuna. L-eżempju taʼ Ġesù għandu jqanqalna nkomplu nfittxu n-nies fit-territorju tagħna li huma dipressi minħabba l-affarijiet terribbli li qed jiġru f’din id-dinja.

11. Marku 5:25-34, kif juri li Ġesù kien iħobb lill-morda?

¹¹ Aqra Marku 5:25-34. Għal 12-il sena, ċerta mara kienet batiet minn marda imbarazzanti. Il-marda tagħha kienet effettwat kull aspett taʼ ħajjitha, inkluż il-qima tagħha għax lanqas setgħet tmur it-tempju biex taqdi lil Alla. Kienet marret għand ħafna  tobba u nefqet kulma kellha biex tipprova ssib fejqan, imma kulma ġara kien li marret għall-agħar. Ġurnata minnhom, il-mara fasslet pjan ġdid biex titfejjaq, u allura għaddiet minn folla nies u messet il-ħwejjeġ taʼ Ġesù. (Levitiku 15:19, 25) Meta Ġesù ntebaħ li kienet ħarġet qawwa minnu, hu staqsa min kien messu. Il-mara, ‘tirtogħod bil-biżaʼ, inxteħtet quddiemu u qaltlu l-verità kollha.’ Ġesù kien jaf li Ġeħova kien fejjaq lill-mara, u għalhekk b’qalb tajba qalilha: “Binti, il-fidi tiegħek fejqitek. Mur fil-paċi, u kun imfejqa mill-marda kiefra tiegħek.”

12. (a) Minn dak li tgħallimna, kieku int kif tiddeskrivih lil Ġesù? (b) Ġesù liema eżempju ħallielna?

¹² Tassew inqawwu qalbna meta naraw kemm Ġesù kien juri mħabba man-nies, speċjalment maʼ dawk li kienu morda. X’differenza minn Satana! Dan jipprova jikkonvinċina li ma niswew xejn u li ħadd ma jħobbna. Madanakollu, il-mirakli taʼ Ġesù wrew li tassew jimpurtah minna u mill-problemi tagħna. Kemm aħna grati li għandna Sultan u Qassis il-Kbir li juri tant imħabba! (Ebrej 4:15) Jistaʼ jkun diffiċli għalina li nifhmu kif iħossu xi ħadd li ilu marid għal ħafna żmien, speċjalment jekk m’aħniex morda. Imma aħseb dwar Ġesù. Kellu mogħdrija għall-morda, avolja qatt ma kien marid. Jalla nagħmlu l-almu tagħna biex nimitaw l-eżempju tiegħu taʼ mħabba.—1 Pietru 3:8.

13. X’nitgħallmu dwar Ġesù mill-irxoxt taʼ Lazzru?

¹³ Ġesù tassew kien jiġi effettwat min-niket taʼ ħaddieħor. Pereżempju, meta miet il-ħabib tiegħu Lazzru, Ġesù “karab” u “tnikket” għax ra n-niket tal-familja u l-ħbieb taʼ Lazzru. (Aqra Ġwanni 11:33-36.) Għalkemm kien jaf li kien se jirxoxta lil Lazzru, Ġesù beka. Ma ddejjaqx juri lil ħaddieħor kif kien qed iħossu. Ġesù tant kien iħobb lil Lazzru u l-familja tiegħu  li uża l-qawwa t’Alla biex jirxoxta lil Lazzru!—Ġwanni 11:43, 44.

14, 15. (a) X’juri li Ġeħova jrid ineħħi t-tbatija tal-bnedmin? (b) X’nitgħallmu mill-espressjoni “l-oqbra tat-tifkira”?

¹⁴ Il-Bibbja tgħid li Ġesù hu eżatt bħal Missieru, Ġeħova. (Ebrej 1:3) Għalhekk, il-mirakli taʼ Ġesù juru biċ-ċar li anke Ġeħova jrid ineħħi l-mard, l-uġigħ, u l-mewt. Dalwaqt, Ġeħova u Ġesù se jqajmu mill-mewt lil ħafna iktar nies. Ġesù qal li “ġejja s-siegħa li fiha dawk kollha li qegħdin fl-oqbra tat-tifkira” se jiġu rxoxtati.—Ġwanni 5:28, 29.

¹⁵ Ġesù uża l-espressjoni “l-oqbra tat-tifkira,” li turi li hemm involuta l-memorja t’Alla. Alla li Jistaʼ Kollox, il-Ħallieq tal-univers kollu, jistaʼ jiftakar kull dettall tal-maħbubin mejtin tagħna, inkluż il-personalità tagħhom. (Isaija 40:26) Ġeħova mhux talli jistaʼ jiftakarhom imma talli jrid jiftakarhom. Il-każijiet tal-irxoxt li jissemmew fil-Bibbja huma eżempji mill-isbaħ taʼ dak li se jiġri fid-dinja l-ġdida.

16. Liema opportunità se jkollhom ħafna mill-qaddejja t’Alla?

¹⁶ Jekk nibqgħu leali, jistaʼ jkun li jkollna l-opportunità li nesperjenzaw wieħed mill-akbar mirakli li qatt se jkun hawn, li ngħaddu ħajjin mit-tribulazzjoni l-kbira! Ftit wara Armageddon, se naraw ħafna iktar mirakli. F’dak iż-żmien, kulħadd se jikseb saħħa perfetta. (Isaija 33:24; 35:5, 6; Rivelazzjoni 21:4) Immaġinak tara lin-nies jarmu n-nuċċali, il-bastun, il-krozzi, is-siġġu tar-roti, u l-hearing aid! Ġeħova jaf li dawk kollha li jsalvaw minn Armageddon se jkollhom bżonn ikunu f’saħħithom, għax se jkollhom ħafna xogħol x’jagħmlu. Dawn huma l-uħud li se jbiddlu l-pjaneta sabiħa tagħna f’ġenna globali.—Salm 115:16.

17, 18. (a) Ġesù għala għamel il-mirakli? (b) Għala għandek tagħmel l-almu tiegħek biex tidħol fid-dinja l-ġdida t’Alla?

¹⁷ Illum, il-‘folla l-kbira’ tiġi inkuraġġita meta taqra dwar kif Ġesù fejjaq lill-morda. (Rivelazzjoni 7:9) Dawn il-mirakli jsaħħu t-tama mill-isbaħ li niġu mfejqin kompletament fil-futur. Ukoll, juruna kemm l-ewwel Iben imwieled t’Alla tassew iħobb lill-bnedmin. (Ġwanni 10:11; 15:12, 13) Il-mogħdrija taʼ Ġesù turi li Ġeħova tassew iħobb lil kull wieħed u waħda mill-qaddejja tiegħu.—Ġwanni 5:19.

¹⁸ Id-dinja tal-lum hi mimlija wġigħ, tbatija, u mewt. (Rumani 8:22) Hu għalhekk li għandna bżonn id-dinja l-ġdida t’Alla. Hemmhekk, il-bnedmin kollha se jkollhom is-saħħa perfetta li wiegħed Alla. Malakija 4:2 jagħtina t-tama li se ‘noħorġu u naqbżu’ b’ferħ u b’eċċitament għax se nkunu ġejna mfejqin u meħlusin mill-imperfezzjoni. Jalla l-apprezzament tagħna għal Ġeħova u l-fidi tagħna fil-wegħdi tiegħu jqanqluna biex nagħmlu l-almu tagħna biex nidħlu fid-dinja l-ġdida. Kemm hu inkuraġġanti li nkunu nafu li l-mirakli li għamel Ġesù kienu eżempji tas-serħan permanenti li l-bnedmin dalwaqt se jgawdu taħt it-tmexxija tiegħu!