1, 2. (a) Għala int konvint li Ġeħova jħobb lin-nies tiegħu? (b) In-nies b’liema bżonn ġew maħluqin?

GĦALA int konvint li Ġeħova jħobb lin-nies tiegħu? Qabel twieġeb din il-mistoqsija, ikkunsidra dawn l-eżempji: Għal diversi snin, aħwa rġiel u nisa b’qalb tajba inkuraġġew oħt jisimha Taylene. Qalulha biex ma tistenniex wisq minnha nfisha. Hi tgħid: “Kieku Ġeħova ma kienx iħobbni, il-parir tiegħu ma kienx ikun daqstant persistenti.” Brigitte, li rabbiet żewġt itfal waħedha wara li żewġha miet, tgħid: “Li trabbi t-tfal f’din is-sistema taʼ Satana hi waħda mill-iktar sfidi diffiċli, speċjalment meta jkollok trabbihom waħdek. Imma jien konvinta mill-imħabba taʼ Ġeħova għax iggwidani meta kont nibki u kien ikolli wġigħ taʼ qalb, u qatt ma ħallieni nesperjenza iktar milli kont niflaħ.” (1 Korintin 10:13) Sandra għandha marda serja li ma tistax tfiq minnha. F’konvenzjoni minnhom, oħt uriet interess personali f’Sandra. “Għalkemm ma konniex nafuha personalment,” jgħid ir-raġel taʼ Sandra, “l-interess  sinċier tagħha ferraħna ħafna. Anki espressjonijiet żgħar taʼ mħabba minn ħutna rġiel u nisa juruni kemm Ġeħova jħobbna.”

² Ġeħova ħalaq lin-nies bil-bżonn li jħobbu u li jħossuhom maħbubin. Madankollu, hu faċli li nsiru skuraġġiti minħabba mard jew problemi finanzjarji jew minħabba li ma jkollniex riżultati tajbin fil-ministeru. Jekk nibdew inħossu li Ġeħova m’għadux iħobbna, għandna niftakru li aħna prezzjużi għalih u li hu hemm għalina, qed iżommilna idna l-leminija u jgħinna. Hu qatt ma se jinsiena jekk inkunu leali lejh.—Isaija 41:13; 49:15.

3. X’jistaʼ jsaħħilna l-fiduċja tagħna li l-imħabba taʼ Ġeħova hi dejjiema?

³ Ix-Xhieda li ssemmew qabel kienu konvinti li Alla kien magħhom matul żminijiet diffiċli. Aħna jistaʼ jkollna l-istess fiduċja li hu qiegħed fuq in-naħa tagħna. (Salm 118:6, 7) F’dan l-artiklu se niddiskutu erbaʼ għotjiet li jagħtu prova li Ġeħova jħobbna. Dawn huma (1) il-ħolqien tiegħu, (2) il-Bibbja, (3) it-talb, u (4) il-fidwa. Meta nimmeditaw fuq l-affarijiet tajbin li Ġeħova għamel, inkunu nistgħu niġu megħjuna biex inkunu iktar grati għall-imħabba dejjiema tiegħu.—Aqra Salm 77:11, 12.

4. X’nitgħallmu mill-ħolqien taʼ Ġeħova?

⁴ Meta nħarsu lejn il-ħolqien t’Alla, nitgħallmu kemm iħobbna. (Rumani 1:20) Pereżempju, Ġeħova ħalaq l-art b’tali mod ħalli nkunu nistgħu nagħmlu iktar milli sempliċement nibqgħu ħajjin. Hu tana kulma għandna bżonn biex nieħdu pjaċir bil-ħajja. Għandna bżonn nieklu, imma Ġeħova ma jagħtiniex biss tip wieħed t’ikel biex ngħixu imma jtina varjetà t’ikel ħalli nieħdu pjaċir nieklu! (Ekkleżjasti 9:7) Oħt jisimha Catherine tieħu pjaċir tara l-ħolqien, speċjalment matul ir-rebbiegħa fil-Kanada. Hi tgħid: “Huwa verament tal-għaġeb meta toqgħod tqis kif kollox jieħu l-ħajja—il-fjuri li huma programmati biex jinbtu mill-art waħedhom u l-għasafar li jiġu lura wara li jpassu, inkluż il-hummingbird ċkejken li jsib ruħu barra t-tieqa tal-kċina tiegħi fejn inħalli l-ikel għall-għasafar. Ġeħova żgur li jħobbna biex jagħtina tant affarijiet li jġibulna ferħ.” Il-Missier tagħna jħobb il-ħolqien tiegħu, u jridna nieħdu pjaċir bih ukoll.—Atti 14:16, 17.

5. L-imħabba taʼ Ġeħova kif tidher fil-mod kif in-nies huma maħluqin?

⁵ Ġeħova ħalaqna bl-abbiltà li nagħmlu xogħol siewi u biex nieħdu pjaċir nagħmluh. (Ekkleżjasti 2:24) Hu ta lin-nies l-inkarigu biex jimlew u jikkultivaw l-art, u biex jieħdu ħsieb il-ħut, l-għasafar, u l-affarijiet ħajjin l-oħra li jgħixu  fuq l-art. (Ġenesi 1:26-28) U hu ħalaqna wkoll bi kwalitajiet sbieħ ħalli nkunu nistgħu nimitawh!—Efesin 5:1.

6. Meta nimmeditaw fuq il-Kelma t’Alla, dan x’jgħinna naraw?

⁶ Ġeħova tana l-Bibbja għax iħobbna ħafna. Din tgħidilna dak li għandna bżonn inkunu nafu dwaru u kif iħossu dwar in-nies. Pereżempju, il-Bibbja tgħidilna kif Ġeħova ħassu dwar l-Iżraelin, li spiss m’obdewhx. Salm 78:38 jgħid: “Hu kien ħanin; kien jgħatti l-iżball [jiġifieri jaħfer l-iżball] u ma jġibx ħerba fuqhom. Ħafna drabi reġġaʼ lura r-rabja tiegħu, u ma kienx iħalli l-korla tiegħu tixgħel għalkollox.” Meta timmedita fuq dan il-vers, dan jistaʼ jgħinek tara kemm Ġeħova jħobbok u jieħu ħsiebek. Nistgħu nkunu ċerti li Ġeħova tassew jimpurtah minna.—Aqra l-1 Pietru 5:6, 7.

7. Il-Bibbja għala għandha tkun prezzjuża għalina?

 ⁷ Il-Bibbja għandha tkun prezzjuża ħafna għalina.Għala? Għax Ġeħova jikkomunika magħna permezz tal-Kelma tiegħu. Meta ġenitur u iben jikkomunikaw bil-miftuħ maʼ xulxin, huma jsaħħu l-imħabba li jkollhom għal xulxin u tikber il-fiduċja f’xulxin. Ġeħova hu Missierna li jħobbna. U għalkemm qatt ma rajnieh jew smajna leħnu, ikun bħallikieku qed jikkomunika direttament magħna permezz tal-Bibbja. Għandna nibqgħu nagħtuh widen! (Isaija 30:20, 21) Meta naqraw il-Kelma t’Alla, naraw li Ġeħova jixtieq jiggwidana u jipproteġina. Hu jridna nsiru nafuh u nafdawh ukoll.—Aqra Salm 19:7-11; Proverbji 1:33.

8, 9. Ġeħova xi jridna nkunu nafu? Agħti eżempju mill-Bibbja.

⁸ Ġeħova jridna nkunu nafu li jħobbna u li jara lil hinn mill-imperfezzjonijiet tagħna. Hu jfittex it-tajjeb fina. (2 Kronaki 16:9) Ejja naraw kif Ġeħova fittex it-tajjeb fis-Sultan Ġeħosafat taʼ Ġuda. Ġeħosafat ħa deċiżjoni ħażina meta ngħaqad mas-Sultan Aħab tal-Iżrael u ġġieled kontra s-Sirjani taʼ Ramot-gilegħad. Għalkemm 400 profeta falz qalu lis-sultan mill-agħar Aħab li kien se jirbaħ il-battalja, il-profeta veru t’Alla, li kien jismu Mikaja, qal lil Ġeħosafat u lil Aħab li jekk jiġġieldu, kienu se jitilfu. U eżattament hekk ġara! Aħab miet fil-battalja, u Ġeħosafat ħelisha bi żbrixx minn ħalq il-mewt. Wara l-battalja, Ġeħova uża lil Ġeħu biex iċanfar lil Ġeħosafat dwar l-iżball tiegħu. Madankollu, Ġeħu qallu: “Instabu fik xi affarijiet tajbin.”—2 Kronaki 18:4, 5, 18-22, 33, 34; 19:1-3.

⁹ Snin qabel, Ġeħosafat kien qal lill-prinċpijiet, il-Leviti, u l-qassisin biex iżuru l-bliet kollha taʼ Ġuda ħalli jgħallmu l-Liġi taʼ Ġeħova lin-nies. Tant kellhom suċċess li anki nies minn nazzjonijiet oħra saru jafu b’Ġeħova. (2 Kronaki 17:3-10) Allura, għalkemm Ġeħosafat ħa deċiżjoni ħażina iktar tard, Ġeħova ma kienx nesa l-affarijiet tajbin li kien għamel f’ħajtu qabel. Dan l-eżempju hu taʼ faraġ kbir għalina għax kultant niżbaljaw. Però, jekk nagħmlu l-aħjar tagħna biex naqdu lil Ġeħova, hu se jkompli jħobbna u mhux se jinsa l-affarijiet tajbin li nkunu għamilna.

10, 11. (a) It-talb għala hu rigal prezzjuż mingħand Ġeħova? (b) Alla kif jistaʼ jwiġbilna t-talb? (Ara l-ewwel stampa.)

¹⁰ Missier li jħobb, jieħu l-ħin biex jismaʼ x’għandhom xi jgħidu t-tfal tiegħu meta jkunu jridu jkellmuh. Hu jrid ikun jaf kif iħossuhom għax verament jimpurtah minnhom. Missierna li jħobb, Ġeħova, jagħmel l-istess. Hu jagħti widen meta nitolbu lilu. Li nitkellmu maʼ Missierna hu privileġġ prezzjuż!

¹¹ Aħna nistgħu nitolbu lil Ġeħova meta rridu. Hu l-Ħabib tagħna, u dejjem lest biex jismaʼ t-talb tagħna. Taylene, li ssemmiet qabel, tgħid: “Tistaʼ tgħidlu li trid u kulma trid.” Meta ngħidu lil Ġeħova l-ħsibijiet profondi tagħna, hu għandu mnejn iwiġibna permezz taʼ skrittura, artiklu mil-letteratura  tagħna, jew inkuraġġiment minn xi ħu jew oħt. Ġeħova jismaʼ t-talb bil-ħrara tagħna, u hu jifhimna anki meta ħadd iktar ma jifhimna. It-tweġibiet tiegħu għat-talb tagħna jagħtu prova li mħabbtu għalina hi dejjiema.

12. Għala għandna nistudjaw it-talb li nsibu fil-Bibbja? Agħti eżempju.

¹² Aħna nistgħu nitgħallmu lezzjonijiet importanti mit-talb li nsibu fil-Bibbja. Kultant, ikun t’għajnuna li nistudjaw xi ftit minn dan it-talb matul il-qima bħala familja. Il-kwalità tat-talb tagħna se tkun aħjar meta nimmeditaw dwar it-talb mill-qalb tal-qaddejja t’Alla tal-passat. Pereżempju, ikkunsidra t-talba umli taʼ Ġona li għamel meta kien fiż-żaqq taʼ ħuta kbira. (Ġona 1:17–2:10) Irrivedi t-talba sinċiera taʼ Salamun lil Ġeħova meta t-tempju kien ġie ddedikat. (1 Slaten 8:22-53) U mmedita fuq it-talba mudell taʼ Ġesù. (Mattew 6:9-13) U l-iktar importanti, b’mod regulari ‘ħalli lil Alla jkun jaf x’teħtieġ.’ B’hekk, ‘il-paċi t’Alla li tisboq kull ħsieb tgħasses lil qalbek u l-qawwa mentali tiegħek.’ Il-gratitudni tagħna għall-imħabba dejjiema taʼ Ġeħova se tkompli tikber.—Filippin 4:6, 7.

13. Liema opportunità għandna minħabba l-fidwa?

¹³ Ġeħova tana r-rigal tal-fidwa ħalli “niksbu l-ħajja.” (1 Ġwanni 4:9) Meta l-appostlu Pawlu rrefera għal din l-espressjoni mill-isbaħ tal-imħabba t’Alla, kiteb: “Kristu miet fiż-żmien stabbilit għal nies mhux devoti. Bilkemm xi ħadd ikun irid imut għal bniedem ġust; iva, għat-tajjeb forsi xi ħadd jissogra jmut. Imma Alla jirrikkmandalna mħabbtu għax, waqt li konna għadna midinbin, Kristu miet għalina.” (Rumani 5:6-8) Il-fidwa hi l-akbar eżempju tal-imħabba t’Alla, u tagħti lin-nies l-opportunità li jkollhom relazzjoni mill-qrib miegħu.

14, 15. Il-fidwa xi tfisser (a) għall-Kristjani midlukin? (b) għal dawk bit-tama li jgħixu fuq l-art?

¹⁴ Grupp żgħir taʼ Kristjani jħossu l-imħabba dejjiema taʼ Ġeħova b’mod speċjali ħafna. (Ġwanni 1:12, 13; 3:5-7) Alla dilek lil dawn l-uħud bl-ispirtu qaddis, u minħabba dan saru “wlied Alla.” (Rumani 8:15, 16) Ladarba xi wħud minnhom għadhom fuq l-art, Pawlu għala qal li huma bilqiegħda “flimkien fil-postijiet tas-sema f’unjoni maʼ Kristu Ġesù”? (Efesin 2:6) Huma għandhom din il-pożizzjoni spiritwali għax ġew ‘immarkati bis-siġill taʼ l-ispirtu qaddis imwiegħed, li hu garanzija bil-quddiem tal-wirt tagħhom,’ jiġifieri ‘t-tama merfugħa għalihom fis-smewwiet.’—Efesin 1:13, 14; Kolossin 1:5.

¹⁵ Dawk kollha li mhumiex midlukin jistgħu jsiru ħbieb t’Alla jekk juru fidi fil-fidwa. Huma wkoll għandhom il-possibbiltà li jiġu adottati bħala wlied  Alla u li jgħixu għal dejjem f’ġenna tal-art. Il-fidwa turi l-imħabba taʼ Ġeħova għan-nies kollha. (Ġwanni 3:16) Żgur li hu eċċitanti li nkunu nafu li jekk naqdu ’l Alla b’mod leali, hu se jagħtina l-aħjar ħajja possibbli fid-dinja l-ġdida. Allura ejja nuru li napprezzaw il-fidwa, l-akbar prova tal-imħabba dejjiema t’Alla għalina.

16. X’motivazzjoni jkollna meta nimmeditaw fuq l-imħabba t’Alla?

¹⁶ Huwa impossibbli li żżomm kont tal-ħafna modi li Ġeħova juri li jħobbna. Is-Sultan David kanta: “Kemm huma prezzjużi għalija ħsibijietek! O Alla, kemm hu kbir l-għadd kollu tagħhom! Kieku kelli nipprova ngħoddhom, kienu jkunu iktar mill-frak tar-ramel.” (Salm 139:17, 18) Meta nimmeditaw fuq il-ħafna modi li Ġeħova jħobbna, se niġu mmotivati nħobbuh lura u nagħtuh l-aqwa u l-aħjar tagħna.

17, 18. X’inhuma xi modi li bihom nistgħu nuru li nħobbu ’l Alla?

¹⁷ Hemm ħafna modi kif nistgħu nuru li nħobbu lil Ġeħova. Pereżempju, nistgħu nuru li nħobbu lil Ġeħova billi b’żelu ngħidu lil oħrajn dwar l-aħbar tajba tas-Saltna. (Mattew 24:14; 28:19, 20) Nistgħu wkoll nuru li nħobbu ’l Alla billi b’lealtà nissaportu sitwazzjonijiet diffiċli li jgħaddu minn prova l-fidi tagħna. (Aqra Salm 84:11; Ġakbu 1:2-5.) Anki jekk il-provi tagħna huma diffiċli ħafna, nistgħu nkunu ċerti li Ġeħova hu konxju tas-sofferenzi tagħna u li se jgħinna għax aħna prezzjużi għalih.—Salm 56:8.

¹⁸ L-imħabba tagħna għal Ġeħova timmotivana biex nimmeditaw fuq l-affarijiet mill-isbaħ kollha li ħalaq. Aħna nuru lil Ġeħova li nħobbu lilu u l-Kelma tiegħu billi nkunu studenti tajbin tal-Bibbja. Aħna nitolbu lil Ġeħova b’mod regulari għax inħobbuh u rridu nsaħħu r-relazzjoni tagħna miegħu. U meta nimmeditaw fuq ir-rigal prezzjuż tal-fidwa, insiru nħobbuh saħansitra iktar. (1 Ġwanni 2:1, 2) Dawn huma biss ftit mill-ħafna modi kif nistgħu nuru lil Ġeħova li napprezzaw l-imħabba dejjiema li għandu għalina.