1, 2. Ġeħova kif għallimna nħobbuh?

L-AQWA mod kif missier jistaʼ jgħallem lil uliedu hu bl-eżempju tiegħu stess. Fil-fatt il-Malti jgħid li l-kliem iqanqal imma l-eżempju jkaxkar. Meta missier juri mħabba għal uliedu, hu jkun qed jgħallimhom kif iħobbu. Ħadd qatt ma ħabbna daqs kemm iħobbna Missierna, Ġeħova. Għalhekk, aħna nitgħallmu kif inħobbu “għax hu ħabbna l-ewwel.”—1 Ġwanni 4:19.

² Ġeħova b’liema mod wera li “ħabbna l-ewwel”? Il-Bibbja tgħid: “Waqt li konna għadna midinbin, Kristu miet għalina.” (Rumani 5:8) Missierna kollu mħabba, Ġeħova, ta lil Ibnu bħala fidwa biex jeħlisna mid-dnub u l-mewt. Dan ir-rigal prezzjuż għamilhielna possibbli li nkunu qrib taʼ Ġeħova u nuru l-imħabba li għandna għalih. Billi għamel dan is-sagrifiċċju kbir, Ġeħova ħallielna eżempju. U għallimna li għandna nħobbu billi ma nkunux egoisti imma nkunu ġenerużi.—1 Ġwanni 4:10.

3, 4. Kif nuru li nħobbu lil Alla?

³ L-imħabba hi l-kwalità prinċipali taʼ Ġeħova. Allura  nistgħu nifhmu għala Ġesù qal li l-iktar kmandament importanti hu dan: “Ħobb lil Ġeħova Alla tiegħek b’qalbek kollha u b’ruħek kollha u b’moħħok kollu u b’saħħtek kollha.” (Marku 12:30) Ġeħova jridna nħobbuh ‘b’qalbna kollha.’ Inkunu qed inweġġgħu lil Ġeħova jekk inħobbu lil xi ħadd jew xi ħaġa iktar milli nħobbu lilu. Imma mħabbitna għalih għandha tkun iktar minn sempliċi emozzjoni, jew xi ħaġa li nħossu. Ġeħova wkoll jistenna li nħobbuh ‘b’moħħna kollu’ u ‘b’saħħitna kollha.’ Dan ifisser li l-imħabba tagħna għal Ġeħova tinvolvi l-mod kif naħsbu u dak li nagħmlu.—Aqra Mikea 6:8.

⁴ Għaldaqstant, għandna nħobbu lil Ġeħova b’ruħna u b’ġisimna—b’kull aspett fiżiku, emozzjonali, u spiritwali tagħna. Billi npoġġu lilu l-ewwel f’ħajjitna, inkunu qed nuruh li verament inħobbuh. Fl-artiklu taʼ qabel, iddiskutejna erbaʼ modi kif Ġeħova juri l-imħabba kbira li għandu għal uliedu. Issa ejja naraw kif nistgħu nkabbru mħabbitna għal Ġeħova u nuru li nħobbuh.

5. Meta naħsbu fuq dak kollu li għamel għalina Ġeħova, xi nkunu rridu nagħmlu?

⁵ Meta xi ħadd jagħtik rigal, wisq probabbli turih li int grat. U peress li tgħożż ir-rigal, tużah ukoll. Ġakbu kiteb: “Kull għotja tajba u kull rigal perfett ġej minn fuq, għax jinżel mingħand il-Missier tad-dwal tas-sema. Hu ma jinbidilx u m’huwiex bħal dell li jiċċaqlaq.” (Ġakbu 1:17) Aħna grati ferm li Ġeħova jagħtina kulma għandna bżonn biex ngħixu u nkunu ferħanin. Nirrealizzaw kemm iħobbna, u rridu nuruh li aħna wkoll inħobbuh. Int hekk tħossok?

6. L-Iżraelin x’kellhom bżonn jagħmlu jekk riedu li Ġeħova jkompli jberikhom?

⁶ L-Iżraelin ingħataw ħafna affarijiet tajbin minn Ġeħova. Għal mijiet taʼ snin, hu ggwidahom permezz tal-liġijiet tiegħu u tahom kulma kellhom bżonn biex jgħixu. (Dewteronomju 4:7, 8) U l-Iżraelin setgħu juru l-gratitudni tagħhom lejn Ġeħova billi jobdu dawn il-liġijiet. Pereżempju, meta offrew sagrifiċċji lil Ġeħova, kellhom jagħtuh “l-aqwa mill-ewwel frott misjur taʼ l-art.” (Eżodu 23:19) L-Iżraelin kienu jafu li Ġeħova kien se jkompli jberikhom jekk jobduh u jagħtuh l-aqwa li kellhom.—Aqra Dewteronomju 8:7-11.

7. Kif nistgħu nużaw “l-affarijiet prezzjużi” tagħna biex nuru lil Ġeħova li nħobbuh?

⁷ Aħna wkoll nistgħu nuru lil Ġeħova li nħobbuh billi nagħtuh “l-affarijiet prezzjużi” tagħna. (Proverbji 3:9) Nagħmlu dan billi nużaw dak kollu li għandna biex nonorawh. Pereżempju, nistgħu nagħtu kontribuzzjonijiet biex nappoġġaw ix-xogħol tas-Saltna fil-kongregazzjoni tagħna stess u madwar id-dinja kollha. Kemm jekk għandna ħafna u kemm jekk għandna ftit materjalment, ilkoll nistgħu nużaw dak li għandna biex nesprimu mħabbitna għal Ġeħova. (2 Korintin 8:12) Imma hemm modi oħra kif nistgħu nuru lil Ġeħova li nħobbuh.

8, 9. (a) X’inhu mod ieħor kif nuru lil Ġeħova li nħobbuh? (b) Mike u l-familja tiegħu x’għamlu?

⁸ Ġesù għallimna biex nibqgħu nfittxu l-ewwel is-Saltna u biex ma nkunux ansjużi dwar x’se nieklu jew x’se nilbsu.  Missierna jwiegħed li se jagħtina dak li għandna bżonn. (Mattew 6:31-33) Aħna nafdaw f’Ġeħova u nafu li se jżomm il-wegħda tiegħu. Wara kollox, meta tassew tħobb lil xi ħadd, tafdah. Infatti, iktar ma nafdaw f’Ġeħova, iktar se nuruh li nħobbuh. (Salm 143:8) Għalhekk, għandna mnejn nistaqsu lilna nfusna: ‘Il-pjanijiet tiegħi u l-mod kif nuża l-ħin u l-enerġija tiegħi juru li tassew inħobb lil Ġeħova? Nafda jien li kuljum Ġeħova se jieħu ħsieb il-bżonnijiet tiegħi?’

⁹ Mike u l-familja tiegħu fdaw f’Ġeħova. Minn meta Mike kien għadu żgħir, dejjem ried jipprietka f’pajjiż ieħor. Anki wara li żżewweġ u kellu żewġt itfal, xorta kien għad għandu din ix-xewqa. Meta Mike u l-familja tiegħu qraw dwar aħwa rġiel u nisa li marru jaqdu fejn il-bżonn hu akbar, huma ddeċidew li jissimplifikaw ħajjithom. Biegħu d-dar tagħhom, u marru joqogħdu ġo post iżgħar. Ukoll, Mike naqqas l-ammont taʼ klijenti li kellu fin-negozju taʼ tindif tiegħu u sar jaf kif jistaʼ jieħu ħsieb in-negozju minn pajjiż ieħor permezz tal-Internet. B’hekk, Mike u l-familja tiegħu setgħu jmorru jgħixu pajjiż ieħor u hemm kienu jieħdu pjaċir ħafna fil-ministeru. Mike qal, “Aħna esperjenzajna kemm hu minnu l-kliem taʼ Ġesù f’Mattew 6:33.”

10. Bħas-Sultan David, għala jkun tajjeb għalina li nimmeditaw fuq dak li nitgħallmu dwar Ġeħova?

¹⁰ Is-Sultan David darba kiteb: “Is-smewwiet jiddikjaraw il-glorja t’Alla; u dwar xogħol idejh titkellem il-firxa tas-sema.” Hu żied jgħid: “Il-liġi taʼ Ġeħova perfetta, u sserraħ ir-ruħ. It-tfakkira taʼ Ġeħova taʼ min jafdaha, u tagħti l-għerf lil min hu bla esperjenza.” Hekk kif David immedita fuq il-liġijiet għaqlin u l-ħolqien mill-isbaħ taʼ Ġeħova, hu resaq eqreb lejn Ġeħova u ried jurih li jħobbu. David qal: “Ħa jkunu kliem fommi u l-meditazzjoni taʼ qalbi pjaċevoli quddiemek, O Ġeħova, il-Blata tiegħi u l-Feddej tiegħi.”—Salm 19:1, 7, 14.

11. Kif nistgħu nużaw l-għarfien li jagħtina Ġeħova biex nuru l-imħabba li għandna għalih? (Ara l-ewwel stampa.)

¹¹ Illum il-ġurnata, Ġeħova jgħallimna ħafna dwaru nnifsu, u dwar l-iskop, il-ħolqien, u l-Kelma tiegħu. Id-dinja tinkuraġġixxi lin-nies jitgħallmu, imma l-edukazzjoni iktar għolja spiss iġġegħelhom jitilfu mħabbithom għal Alla. B’kuntrast, Ġeħova mhux biss irid li jkollna għarfien, imma wkoll jgħinna nkunu għaqlin. Iridna nużaw dak li nitgħallmu għall-ġid tagħna stess u biex ngħinu lil oħrajn. (Proverbji 4:5-7) Pereżempju, iridna naqsmu “l-għarfien eżatt dwar il-verità” m’oħrajn u ngħinuhom biex isalvaw. (1 Timotju 2:4) Aħna nuru mħabbitna għal Ġeħova u għall-bnedmin billi ngħallmu lil kemm jistaʼ jkun nies dwar is-Saltna t’Alla u dwar  dak li se tagħmel għall-bnedmin.—Aqra Salm 66:16, 17.

12. Oħt żagħżugħa x’qalet dwar rigal li rċiviet mingħand Ġeħova?

¹² Iż-żgħażagħ u dawk iżgħar fl-età wkoll jistgħu jimmeditaw fuq dak kollu li tahom u għallimhom Ġeħova. Shannon għadha tiftakar kif ħassitha meta attendiet konvenzjoni meta kellha 11-il sena u oħtha kellha 10 snin. Matul sessjoni tal-Konvenzjoni “Devozzjoni lejn Alla,” iż-żgħażagħ kollha, inkluż Shannon u oħtha, intalbu joqogħdu f’sezzjoni speċjali. Għall-ewwel kienet xi ftit ansjuża. Imma mbagħad baqgħet sorpriża meta kull żagħżugħ u żagħżugħa ngħataw kopja tal-ktieb Iż-Żgħażagħ Jistaqsu—Tweġibiet Prattiċi għall-Mistoqsijiet Tagħhom. Dan ir-rigal mill-isbaħ kif ġegħelha tħossha dwar Ġeħova? Hi tgħid: “Kien f’dan il-mument li fl-aħħar irrealizzajt li Ġeħova hu reali u li jħobb lili persunalment ħafna. Kemm aħna ferħanin li l-Alla l-kbir tagħna Ġeħova jagħtina ħafna rigali perfetti u mill-isbaħ bħal dan!”

13, 14. Kif għandna nirreaġixxu meta Ġeħova jiddixxiplinana, u għala?

¹³ Il-Bibbja tfakkarna: “Ġeħova jwiddeb lil min iħobb, bħalma jagħmel missier lil ibnu li bih jitgħaxxaq.” (Proverbji 3:12) Meta naċċettaw id-dixxiplina taʼ Ġeħova u nħallu lil Alla jħarriġna, nitgħallmu  nagħmlu dak li hu sew u jkollna l-paċi. Ovvjament, “fil-preżent ebda dixxiplina ma tidher li hi taʼ ferħ, imma taʼ niket.” (Ebrej 12:11) Minkejja dan, kif għandna nirreaġixxu meta Ġeħova jiddixxiplinana? Qatt m’għandna ninjoraw il-pariri taʼ Ġeħova jew nibqgħu nieħdu għalina jekk ma jogħġobniex dak li jintqalilna. Aħna nħobbu lil Ġeħova, u allura nisimgħu minnu u nagħmlu l-bidliet li hemm bżonn.

¹⁴ Fi żmien Malakija, ħafna Lhud ma semgħux minn Ġeħova. Ma kienx jimpurtahom li s-sagrifiċċji li kienu qed joffru ma kinux qed jogħġbu lil Alla. Allura Ġeħova tahom parir sod ħafna dwar dan. (Aqra Malakija 1:12, 13.) Fil-fatt, Ġeħova widdibhom ħafna drabi, imma huma rrifjutaw li jagħtuh widen. Għalhekk, qalilhom: “Jien se nibgħat fuqkom is-saħta, u se nisħet il-barkiet tagħkom.” (Malakija 2:1, 2) Jidher ċar li jekk nibqgħu nirrifjutaw li nisimgħu mill-parir taʼ Ġeħova jew inħossu li mhuwiex importanti, se nitilfu l-ħbiberija tiegħu.

15. Liema tip taʼ raġunar għandna nevitaw?

¹⁵ Id-dinja taʼ Satana tħeġġeġ lin-nies biex ikunu kburin u egoisti. Ħafna ma jiħdux pjaċir meta xi ħadd jikkoreġihom jew jgħidilhom x’għandhom jagħmlu. Oħrajn jagħtu kas ċertu parir sempliċement għax ma jkollhomx għażla oħra. Aħna ma rridux inkunu hekk. Il-Bibbja tgħidilna biex ma nibqgħux inkunu “magħġunin skond din is-sistema.” Minflok, għandna bżonn nifhmu dak li Ġeħova jistenna minna u nagħmlu dak li jogħġbu. (Rumani 12:2) Hu juża l-organizzazzjoni tiegħu biex jagħtina pariri f’waqthom. Pereżempju, niġu mfakkrin kif għandna nġibu ruħna maʼ dawk tas-sess oppost, kif nagħżlu l-ħbieb tagħna, u kif niddeċiedu x’se nagħmlu fil-ħin tar-rikreazzjoni tagħna. Meta minn jeddna naċċettaw id-dixxiplina taʼ Ġeħova u nagħmlu bidliet biex  nogħġbuh, inkunu qed nuru li aħna grati għall-gwida tiegħu u li tassew inħobbuh.—Ġwanni 14:31; Rumani 6:17.

16, 17. (a) Għala għandna nsiru nafu kif jaħsibha Ġeħova qabel ma nieħdu xi deċiżjoni? (b) L-Iżraelin x’għamlu minflok ma fdaw f’Ġeħova?

¹⁶ It-tfal żgħar jistrieħu fuq il-ġenituri tagħhom biex dawn jgħinuhom u jipproteġuhom. Anki l-adulti forsi jistaqsu lill-ġenituri tagħhom għall-għajnuna. Huma jindunaw li għalkemm jistgħu jieħdu d-deċiżjonijiet huma stess, il-ġenituri tagħhom jistgħu jagħtuhom pariri tajbin. Missierna Ġeħova jħallina nagħżlu aħna x’deċiżjonijiet se nieħdu. Imma peress li verament nafdawh u nħobbuh, dejjem nitolbu għall-għajnuna tiegħu u nagħmlu kulma nistgħu biex insiru nafu x’jaħseb qabel ma nieħdu xi deċiżjoni. Jekk nistrieħu fuq Ġeħova, hu se jagħtina l-ispirtu qaddis tiegħu biex jgħinna nagħmlu dak li hu sew.—Filippin 2:13.

¹⁷ Fi żmien Samwel, l-Iżraelin tilfu battalja kontra l-Filistin. Minflok ma talbu lil Ġeħova biex jgħidilhom xi jmisshom jagħmlu, huma qalu: “Ħa nġibu minn Silo l-arka tal-patt taʼ Ġeħova, sabiex tkun f’nofsna u ssalvana minn id l-għedewwa tagħna.” Għal xiex wasslet din id-deċiżjoni? Il-Bibbja tkompli tgħid: “Il-qatla kienet kbira ferm, u b’hekk minn Israel waqgħu tletin elf raġel bil-mixi. U l-arka t’Alla nqabdet” mill-Filistin. (1 Samwel 4:2-4, 10, 11) L-Iżraelin ħasbu li jekk jieħdu l-Arka magħhom, dan kien ikun biżżejjed biex Ġeħova jgħinhom u jipproteġihom. Imma dawn ma talbux lil Ġeħova għall-għajnuna u lanqas ma pprovaw isiru jafu x’ħaseb hu. Minflok, għamlu dak li dehrilhom li kien tajjeb, u ħallsu qares.—Aqra Proverbji 14:12.

18. Il-Bibbja x’tgħallmek dwar li tafda f’Ġeħova?

¹⁸ Salmista li tassew kien iħobb lil Ġeħova u jafda fih kiteb: “Stenna lil Alla, għax jien għad irrid infaħħru bħala s-salvazzjoni grandjuża tiegħi. O Alla tiegħi, ruħi ddisprata ġewwa fija. Għalhekk niftakar fik.” (Salm 42:5, 6) Int hekk tħossok dwar Ġeħova? Tħossok qrib tiegħu u tafdah? Anke jekk tħoss li diġà tafdah, jistaʼ jkun li tistaʼ titgħallem tafdah saħansitra iktar. Il-Bibbja tgħidilna: “Afda f’Ġeħova b’qalbek kollha u tistrieħx fuq fehmtek stess. Agħti kasu fil-mogħdijiet tiegħek kollha, u hu jiddrittalek triqatek.”—Proverbji 3:5, 6.

19. Kif se turi lil Ġeħova li tħobbu?

¹⁹ Billi ħabbna l-ewwel, Ġeħova għallimna kif inħobbuh. Ejja dejjem naħsbu fuq kemm għamel għalina u fuq kemm iħobbna. U jalla nuruh li nħobbuh b’qalbna kollha, b’ruħna kollha, b’moħħna kollu, u b’saħħitna kollha.—Marku 12:30.