1, 2. Ġesù għala kien iħobb lil Marta, imma liema żball għamlet li juri li ma kinitx perfetta?

META toqgħod taħseb fuq Marta oħt Lazzru, x’tip taʼ persuna timmaġina? Il-Bibbja turi li Marta kienet ħabiba ħafna maʼ Ġesù, u l-Bibbja tgħid li kien iħobbha. Ovvjament, Marta ma kinitx l-unika mara li Ġesù kien iħobb u jirrispetta. Pereżempju, Marija, li tiġi oħt Marta, ukoll kienet ħabiba mill-qrib taʼ Ġesù. U Ġesù ħabb lil ommu stess, Marija. (Ġwanni 11:5; 19:25-27) Allura Ġesù għala kien iħobb lil Marta?

² Ġesù ħabb lil Marta għax kellha qalba tajba u kienet ġeneruża, u wkoll kienet ħabrieka. Imma l-iktar l-iktar, Ġesù ħabbha għax kellha fidi soda. Hi kienet temmen dak kollu li Ġesù għallem, u hi ma kellha l-ebda dubju li hu kien il-Messija mwiegħed. (Ġwanni 11:21-27) Minkejja dan, Marta ma kinitx perfetta. Bħalna lkoll, hi għamlet l-iżbalji. Pereżempju, darba minnhom meta Ġesù kien qed iżurhom, Marta kienet irrabjata m’oħtha Marija, u qalet lil Ġesù li hu għandu jikkoreġiha. Marta qalet, “Mulej, ma jimpurtakx int li oħti ħallietni nieħu ħsieb kollox  waħdi? Għalhekk, għidilha tiġi tgħinni.” (Aqra Luqa 10:38-42.) Marta għala qalet dan, u x’nistgħu nitgħallmu mit-tweġiba li Ġesù taha?

3, 4. Marija x’għamlet biex Ġesù approvaha, u Marta x’tgħallmet? (Ara l-ewwel stampa.)

³ Ġesù kien grat li Marta u Marija kienu stidnuh għandhom, u hu ried juża dak il-ħin biex jgħallimhom veritajiet prezzjużi. Marija mill-ewwel poġġiet ħdejh, “tismaʼ l-kelma tiegħu.” Hi riedet titgħallem dak kollu li setgħet mill-Għalliem il-Kbir. Marta wkoll setgħet tagħżel li tismaʼ lil Ġesù. U hu kien se jfaħħarha li kieku waqfet milli kienet qed tagħmel biex tagħti kas tiegħu.

⁴ Imma Marta kienet aljenata. Hi kienet okkupata tipprepara ikla speċjali għal Ġesù u tagħmel ħafna affarijiet oħra biex tgħinu jħossu komdu kemm jistaʼ jkun. Meta rat li Marija ma kinitx qed tgħinha, bdiet tirrita ruħha u tgerger maʼ Ġesù. Hu kien jaf li Marta kienet qed tipprova tagħmel wisq, u allura b’qalb tajba qal: “Marta, Marta, int ansjuża u mifxula dwar ħafna affarijiet.” Hu ssuġġerixxa wkoll li ikla sempliċi, forsi platt wieħed, kien ikun biżżejjed. Imbagħad Ġesù faħħar lil Marija talli kienet qed tisimgħu b’attenzjoni kbira. Hu qal: “Min-naħa tagħha, Marija għażlet l-aħjar sehem, u mhux se jittiħdilha.” Marija forsi maż-żmien kienet insiet x’kielet matul l-ikla, imma bla dubju hi qatt ma nsiet l-affarijiet li tgħallmet minn Ġesù u l-mod kif faħħarha. Iktar minn 60 sena wara, l-appostlu Ġwanni kiteb: “Ġesù kien iħobbhom lil Marta u lil oħtha.” (Ġwanni 11:5) Dan il-kliem juri li Marta aċċettat il-korrezzjoni bi mħabba taʼ Ġesù u qdiet lil Ġeħova b’lealtà għall-kumplament taʼ ħajjitha.

5. Għala hu diffiċli li nibqgħu ffokati fuq dak li hu l-iktar importanti b’mod partikulari llum, u liema mistoqsija se nwieġbu?

⁵ Meta nqabblu d-dinja tal-lum maʼ kif kienet id-dinja fi żmien il-Bibbja, aħna nirrealizzaw li llum hemm ħafna aktar affarijiet li jistgħu jaljenawna milli naqdu lil Ġeħova. Il-ħarġa tat-Torri tal-Għassa bl-Ingliż tal-15 taʼ Settembru 1958 wissiet lill-aħwa rġiel u nisa biex ma jħallux it-teknoloġija taljenahom milli jaqdu lil Ġeħova. Anki f’dak iż-żmien, donnu kuljum kien hemm xi ħaġa ġdida. Affarijiet bħal rivisti attraenti, ir-radju, il-films, u t-televixin kienu saru popolari ħafna. It-Torri tal-Għassa qal li hekk kif nersqu eqreb lejn it-tmiem taʼ din is-sistema, “l-aljenazzjonijiet aktarx se jiżdiedu.” Illum, iktar minn qatt qabel, hemm ħafna u ħafna affarijiet li jistgħu jaljenawna. X’nistgħu nagħmlu biex inkunu iktar bħal Marija u nibqgħu ffokati fuq li nqimu lil Ġeħova?

6. In-nies taʼ Ġeħova kif użaw it-teknoloġija?

⁶ In-nies taʼ Ġeħova użaw it-teknoloġija tad-dinja biex jippritkaw l-aħbar tajba. Pereżempju, qabel u matul l-Ewwel Gwerra Dinjija, urew il-“Photo-Drama of Creation.” Permezz taʼ slajds u filmati bil-kulur u s-sawnd, huma  ppritkaw lil miljuni taʼ nies f’ħafna pajjiżi. Fl-aħħar tal-“Photo-Drama” kien jiġi deskritt iż-żmien taʼ paċi meta Ġesù Kristu kien se jmexxi d-dinja. Iktar tard, in-nies taʼ Ġeħova użaw ir-radju biex iwasslu l-messaġġ tas-Saltna lil miljuni taʼ nies madwar id-dinja. Illum, nużaw il-kompjuters u l-Internet biex nilħqu n-nies kullimkien, anki fi nħawi iżolati.

7. (a) Għala hu perikoluż li nużaw id-dinja bis-sħiħ? (b) Minn xiex għandna noqogħdu attenti? (Ara n-nota taʼ taħt.)

⁷ Il-Bibbja twissina biex ma nużawx id-dinja bis-sħiħ. Dan jinkludi li ma nqattgħux ħin żejjed f’affarijiet li toffri d-dinja. (Aqra l-1 Korintin 7:29-31.) Xi wħud minn dawn l-affarijiet mhumiex ħżiena, imma jistgħu jaħlulna ħafna mill-ħin tagħna. Pereżempju, forsi nieħdu pjaċir b’xi delizzju, naqraw kotba, naraw it-televixin, naraw postijiet taʼ interess, immorru nixtru l-ħwejjeġ, u nsiru nafu dwar l-affarijiet elettroniċi jew lussużi tal-aħħar. Ħafna jħobbu jiċċettjaw fuq l-Internet, jibagħtu messaġġi jew e-mails, jew il-ħin kollu jiċċekkjaw l-aħbarijiet jew ir-riżultati tal-isports. Xi wħud ma jkunux jistgħu joqogħdu mingħajr ma jagħmlu dawn l-affarijiet. * (Ara n-nota taʼ taħt.) (Ekkleżjasti 3:1, 6) Jekk nużaw ħafna mill-ħin tagħna f’affarijiet mhux essenzjali, forsi ma nkunux nistgħu nagħtu attenzjoni biżżejjed għal dak li hu l-iktar importanti, jiġifieri l-qima tagħna lil Ġeħova.—Aqra Efesin 5:15-17.

8. Għala hu importanti ħafna li ma nħobbux l-affarijiet tad-dinja?

⁸ Satana jagħmel kulma jistaʼ biex jattirana lejn l-affarijiet li għandu fid-dinja tiegħu u biex jaljenana milli naqdu lil Ġeħova. Satana għamel  dan fl-ewwel seklu, u qed jagħmel dan saħansitra iktar illum il-ġurnata. (2 Timotju 4:10) Allura, hemm bżonn li b’mod kontinwu neżaminaw kif inħossuna dwar l-affarijiet tad-dinja u nagħmlu l-aġġustamenti meħtieġa. Il-Bibbja twissina li m’għandniex inħobbu l-affarijiet tad-dinja. Minflok, irridu nżommu l-imħabba tagħna għal Ġeħova b’saħħitha. Jekk nagħmlu hekk, ikun eħfef biex nobdu lil Ġeħova u nibqgħu qrib tiegħu.—1 Ġwanni 2:15-17.

9. Ġesù fuq xiex għallimhom jiffokaw lid-dixxipli tiegħu, u hu kif ħalla eżempju?

⁹ Eżatt bħalma Ġesù b’qalb tajba għallem lil Marta biex ma tkunx aljenata b’ħafna affarijiet, hu għallem lid-dixxipli tiegħu l-istess lezzjoni. Hu inkuraġġiehom biex jibqgħu ffokati fuq li jaqdu lil Ġeħova u s-Saltna Tiegħu. (Aqra Mattew 6:22, 33.) Ġesù nnifsu ħalla eżempju eċċellenti. Hu ma kellux ħafna affarijiet, u ma kellux xi dar jew art.—Luqa 9:58; 19:33-35.

10. Ġesù liema eżempju tajjeb ħallielna?

¹⁰ Ġesù ma ħalla xejn jaljenah mill-ippritkar. Pereżempju, ftit wara li beda jipprietka, il-folol f’Kafarnahum riedu li Ġesù jqattaʼ iktar żmien fil-belt. X’għamel? Hu baqaʼ ffokat fuq l-inkarigu tiegħu. Hu qal: “Irrid inxandar l-aħbar tajba tas-saltna t’Alla lil bliet oħrajn ukoll, għax għal dan intbgħatt.” (Luqa 4:42-44) Ġesù mexa ħafna u ħafna biex jipprietka l-aħbar tajba u jgħallem lil kemm jistaʼ jkun nies. Hu kien raġel perfett, imma xorta kien jegħja u kellu bżonn jistrieħ għax kien jaħdem iebes ħafna.—Luqa 8:23; Ġwanni 4:6.

11. (a) Ġesù x’għamel meta raġel saqsieh dwar problema personali? (b) Ġesù liema lezzjoni għallem lid-dixxipli tiegħu?

¹¹ Iktar tard, meta Ġesù kien qed jgħallem lid-dixxipli tiegħu lezzjoni importanti, raġel qatagħlu kliemu billi qal: “Għalliem, għid lil ħija jaqsam il-wirt miegħi.” Ġesù ma pprovax isolvi l-problema personali taʼ dan ir-raġel. Ma aljenax ruħu, anzi baqaʼ jgħallem lid-dixxipli tiegħu. Fil-fatt, hu uża din l-opportunità biex jgħallimhom li jekk jiffokaw fuq li jkollhom iktar affarijiet materjali, jistgħu jiġu aljenati milli jaqdu lil Alla.—Luqa 12:13-15.

12, 13. (a) Ġesù x’għamel li impressjona lil xi Griegi f’Ġerusalemm? (b) Ġesù kif irreaġixxa meta Filippu talbu biex jiltaqaʼ maʼ dawk in-nies?

¹² L-aħħar ftit jiem taʼ Ġesù bħala bniedem kienu stressanti ħafna. (Mattew 26:38; Ġwanni 12:27) Hu kien jaf li kien se jkollu jbati ħafna u jmut mewta krudila. Kien jaf ukoll li kien għad fadallu ħafna xogħol x’jagħmel qabel imut. Pereżempju, il-Ħadd,  9 taʼ Nisan, Ġesù daħal Ġerusalemm riekeb fuq felu. Il-folol laqgħuh bħala s-Sultan tagħhom. (Luqa 19:38) L-għada, Ġesù b’kuraġġ keċċa ’l barra mit-tempju l-irġiel rgħiba li kienu qed ibigħu affarijiet m’għola s-sema, u li b’hekk kienu qed jisirqu lin-nies.—Luqa 19:45, 46.

¹³ Xi nies Griegi, li kienu marru Ġerusalemm biex jiċċelebraw il-Qbiż, raw dak li kien għamel Ġesù u impressjonaw ruħhom. Allura saqsew lill-appostlu Filippu jekk setgħux jiltaqgħu maʼ Ġesù. Imma Ġesù ma kienx qed jipprova jfittex lin-nies li setgħu jappoġġawh u jiddefenduh quddiem l-għedewwa tiegħu. Hu kien jaf x’kien iktar importanti. Hu baqaʼ ffokat fuq li jagħti ħajtu bħala sagrifiċċju. Dan kien fi qbil mar-rieda taʼ Ġeħova. Allura fakkar id-dixxipli tiegħu li ma kienx fadallu biex imut u li dawk kollha li jsegwuh għandhom ikunu lesti biex jissagrifikaw ħajjithom ukoll. Hu qal: “Min jgħożż lil ruħu jeqridha, imma min jobgħod lil ruħu f’din id-dinja jħarisha għall-ħajja taʼ dejjem.” Imma Ġesù wiegħed ukoll li ‘l-Missier se jonorahom’ lis-segwaċi tiegħu u li se jagħtihom ħajja taʼ dejjem. Filippu setaʼ jagħti lil dawk il-Griegi dan il-messaġġ inkuraġġanti.—Ġwanni 12:20-26.

14. Għalkemm Ġesù poġġa l-ewwel l-ippritkar f’ħajtu, x’kien ċert li jagħmel?

¹⁴ Meta Ġesù kien fuq l-art, ix-xogħol primarju tiegħu kien li jipprietka l-aħbar tajba. Għalkemm iffoka ħajtu fuq li jipprietka, ma kienx moħħu biss fix-xogħol. Pereżempju, hu mar minn tal-inqas għal tieġ wieħed, fejn biddel l-ilma fl-aħjar inbid. (Ġwanni 2:2, 6-10) Hu kien ikun mistieden għall-ikel fid-djar tal-ħbieb tiegħu u t’oħrajn li kienu interessati fl-aħbar tajba. (Luqa 5:29; Ġwanni 12:2) Imma iktar importanti minn hekk, Ġesù spiss kien jagħmel il-ħin biex jitlob, jimmedita, u jistrieħ.—Mattew 14:23; Marku 1:35; 6:31, 32.

15. L-appostlu Pawlu x’qal li l-Kristjani għandhom jagħmlu, u kif ħalla eżempju tajjeb?

¹⁵ L-appostlu Pawlu qal li l-Kristjani huma bħal ġerrejja f’tellieqa twila u li biex jispiċċaw it-tellieqa, għandhom ineħħu kwalunkwe ħaġa li tistaʼ ttaqqalhom jew twaqqafhom. (Aqra Ebrej 12:1.) Pawlu nnifsu ħalla eżempju tajjeb. Hu setaʼ jkun sinjur u famuż bħala mexxej reliġjuż Lhudi, imma hu telaq din il-karriera biex jiffoka fuq “dak li hu iktar importanti.” Hu ħadem iebes ħafna biex jipprietka u jivvjaġġa f’ħafna postijiet, inkluż is-Sirja, l-Asja Minuri, il-Maċedonja, u l-Lhudija. Pawlu ħares ’il quddiem għall-premju tal-ħajja taʼ dejjem fis-sema. Hu qal: “Waqt li ninsa l-affarijiet taʼ  warajja u niġġebbed biex nilħaq l-affarijiet li hemm quddiemi, qed niġri lejn il-mira għall-premju.” (Filippin 1:10; 3:8, 13, 14) Pawlu ma kienx miżżewweġ, u dan għenu biex ‘jaqdi lill-Mulej il-ħin kollu u mingħajr distrazzjoni.’—1 Korintin 7:32-35.

16, 17. (a) Kemm jekk aħna miżżewġin u kemm jekk le, kif nistgħu nsegwu l-eżempju taʼ Pawlu? (b) Mark u Claire kif għamlu dan?

¹⁶ Bħal Pawlu, xi qaddejja taʼ Ġeħova llum jagħżlu li ma jiżżewġux ħalli jkunu jistgħu jagħmlu iktar fis-servizz taʼ Ġeħova. (Mattew 19:11, 12) Nies mhux miżżewġa spiss ikollhom inqas responsabbiltajiet tal-familja min-nies miżżewġa. Iżda kemm jekk aħna miżżewġin u kemm jekk le, ilkoll nistgħu ‘nneħħu kull piż’ li jistaʼ jaljenana milli naqdu lil Ġeħova. Għandu mnejn ikollna bżonn innaqqsu mid-drawwiet tagħna li jiħdulna l-ħin u nagħmlu miri li jgħinuna nżidu fil-ħin li nqattgħu fis-servizz t’Alla.

¹⁷ Pereżempju, Mark u Claire, li trabbew f’Wales, bdew ix-xogħol taʼ pijunier meta spiċċaw l-iskola. Wara li żżewġu, baqgħu pijunieri. Imma riedu jagħmlu iktar. Mark jispjega: “Stajna nissimplifikaw ħajjitna iktar billi neħħejna d-dar li kellna bi tlett ikmamar tas-sodda u waqqafna x-xogħol part-time tagħna ħalli b’hekk stajna naħdmu fix-xogħol tal-kostruzzjoni internazzjonali.” Għal dawn l-aħħar 20 sena, ivvjaġġaw f’ħafna partijiet tal-Afrika biex jgħinu fil-bini taʼ Swali tas-Saltna. Kultant bilkemm kellhom flus, imma Ġeħova dejjem ħa ħsiebhom. Claire tgħid: “Il-fatt li nistgħu naqdu lil Ġeħova kuljum, itina sens taʼ sodisfazzjon kbir. Matul dan iż-żmien, għamilna ħafna ħbieb, u ma jonqosna xejn. Il-ftit affarijiet li kellna ngħaddu mingħajrhom ma jistgħux jitqabblu mal-ferħ li jiġi meta taqdi lil Ġeħova full-time.” Ħafna qaddejja full-time iħossuhom bl-istess mod. *—Ara n-nota taʼ taħt.

18. X’mistoqsijiet nistgħu nsaqsu lilna nfusna?

¹⁸ Taħseb li tistaʼ tkun iktar entużjast fis-servizz tiegħek lil Ġeħova? Hemm affarijiet li qed jaljenawk minn dak li hu iktar importanti? Jekk inhu hekk, x’tistaʼ tagħmel? Forsi tistaʼ taqra u tistudja l-Bibbja aħjar. L-artiklu li jmiss se jispjega kif tistaʼ tagħmel dan.