1. X’inhi l-kwalità prinċipali t’Alla, u kif tħossok minħabba li taf dan?

IL-Bibbja tgħidilna li “Alla hu mħabba.” (1 Ġwanni 4:8) Imma dan xi jfisser verament? L-imħabba mhix sempliċement waħda mill-ħafna kwalitajiet sbieħ taʼ Ġeħova. L-imħabba hi l-kwalità prinċipali tiegħu. Hu mhux sempliċement għandu l-imħabba. Ġeħova hu mħabba. Dak kollu li jagħmel hu mqanqal minn imħabbtu. Kemm aħna grati li l-imħabba mmotivat lil Ġeħova biex joħloq l-univers kollu u l-affarijiet ħajjin kollha!

2. Liema ċertezza tagħtina l-imħabba t’Alla? (Ara l-ewwel stampa.)

² Ġeħova għandu sentimenti teneri u taʼ qalb tajba għall-ħolqien tiegħu. L-imħabba tiegħu għalina taċċertana li l-iskop tiegħu għall-umanità se jseħħ żgur bl-aħjar mod possibbli. Ir-riżultat se jkun ferħ veru għal dawk li jobduh. Pereżempju, minħabba l-imħabba, Ġeħova “stabbilixxa jum li fih bi ħsiebu jiġġudika l-art abitata fis-sewwa permezz taʼ bniedem li ħatar,” Ġesù Kristu. (Atti 17:31) Aħna ċerti li dan il-ġudizzju se jseħħ. Għan-nies ubbidjenti, dan se jfisser futur mill-isbaħ li se jibqaʼ għal dejjem.

3. Kieku Alla ma kienx iħobb l-umanità, kif kienet se tkun il-ħajja?

³ Il-futur tal-umanità kif kien se jkun li kieku l-imħabba ma kinitx il-kwalità prinċipali t’Alla? In-nies kienu se jkomplu jmexxu lil xulxin u jkunu influwenzati minn Satana, alla li hu bla mħabba u rrabjat. (2 Korintin 4:4; 1 Ġwanni 5:19; aqra Rivelazzjoni 12:9, 12.) Kieku Ġeħova ma kienx iħobbna, il-futur kien se jkun tal-biżaʼ!

4. Ġeħova għala ppermetta li jkun hemm min jirribella kontra t-tmexxija tiegħu?

⁴ Meta Satana rribella kontra t-tmexxija t’Alla, hu influwenza l-ewwel ġenituri biex jirribellaw ukoll. Hu qajjem id-dubji dwar id-dritt li Alla jkun is-Sovran Universali. Satana sostna li t-tmexxija tiegħu kienet se tkun aħjar minn t’Alla. (Ġenesi 3:1-5) B’għaqal, Ġeħova ppermetta li għal żmien qasir Satana jipprova juri jekk dak li qal kienx minnu jew le. Imma r-riżultat hu ċar daqs il-kristall, la n-nies u lanqas Satana ma jistgħu jkunu mexxejja tajbin.

5. L-istorja tal-umanità taʼ xiex tat prova?

⁵ Illum id-dinja sejra minn ġot-taġen għal ġon-nar. Iktar minn 100 miljun persuna mietu fil-gwerer f’dawn l-aħħar 100 sena. Il-Bibbja tgħid hekk dwar “l-aħħar jiem”: “Nies mill-agħar u l-impusturi jibqgħu sejrin mill-ħażin għall-agħar.” (2 Timotju 3:1, 13) Il-Bibbja tgħid ukoll: “Jien naf, O Ġeħova, li triq il-bniedem m’hijiex f’idejh. Lanqas min jimxi ma jistaʼ jidderieġi l-passi tiegħu.” (Ġeremija 10:23) L-istorja wriet biċ-ċar li dan il-kliem hu minnu. Ġeħova ma ħalaqx lin-nies bl-abbiltà jew bid-dritt li jmexxu lilhom infushom mingħajr id-direzzjoni tiegħu.

6. Alla għala ħalla l-ħażen ikompli għaddej?

⁶ Minħabba li Ġeħova ħalla l-ħażen ikompli għal ċertu żmien, hu ta prova wkoll li t-tmexxija tiegħu biss hi tajba. Fil-futur, Alla se jeqred il-ħażen kollu. Wara dan, jekk xi ħadd jiddubita l-mod kif Alla jmexxi bi mħabba, Ġeħova se jaġixxi mill-ewwel. Hu jistaʼ juża l-istorja tal-umanità bħala prova li ribelli bħal dawn għandhom jitneħħew minnufih. Qatt ma se jerġaʼ jkun hawn il-ħażen.

7, 8. Ġeħova kif wera mħabbtu?

⁷ Ġeħova wera l-imħabba kbira tiegħu b’ħafna modi. Aħseb dwar il-kobor u s-sbuħija tal-univers tagħna. Hu magħmul minn biljuni taʼ galassji, u kull galassja għandha biljuni taʼ stilel u pjaneti. Il-galassja tagħna jisimha t-Triq tal-Ħalib (the Milky Way). F’din il-galassja, waħda mill-istilel hi x-xemx. Mingħajr ix-xemx, il-ħajja ma setgħetx teżisti fuq l-art. Dan il-ħolqien kollu jagħti prova li Ġeħova hu l-Ħallieq tagħna u juri l-kwalitajiet bħall-qawwa, l-għerf, u l-imħabba  tiegħu. Iva, “il-kwalitajiet inviżibbli tiegħu [t’Alla], jiġifieri, il-qawwa eterna u d-Divinità tiegħu, kienu jidhru ċar mill-ħolqien tad-dinja ’l quddiem, għax jintgħarfu mill-affarijiet li nħolqu.”—Rumani 1:20.

⁸ Ġeħova ħalaq id-dinja b’tali mod li jkun hawn il-ħajja. Kulma hawn fuq l-art hu taʼ ġid għall-annimali u l-umanità. Alla għamel ġnien sabiħ għan-nies biex jgħixu fih, u tahom moħħ u ġisem perfett maħluqin biex jibqgħu għal dejjem. (Aqra Rivelazzjoni 4:11.) Iżjed minn hekk, “hu li jagħti l-ikel lil kull ħliqa tal-laħam: Għax il-qalb tajba bl-imħabba tiegħu hi għal dejjem.”—Salm 136:25.

9. Għalkemm Ġeħova hu Alla taʼ mħabba, x’jobgħod?

⁹ Ġeħova hu Alla taʼ mħabba, madankollu hu jobgħod dak li hu ħażin. Pereżempju, Salm 5:4-6 jgħid dwar Ġeħova: “Int m’intix Alla li titgħaxxaq bil-ħażen . . . Int tobgħod lil kulmin jipprattika l-ħsara.” Hu jobgħod ukoll lil kull “bniedem li jxerred id-demm u jqarraq.”

10, 11. (a) X’se jiġri min-nies mill-agħar? (b) Ġeħova kif se jippremja lin-nies ubbidjenti?

¹⁰ Fil-ħin u fil-waqt, Ġeħova se jneħħi l-ħażen mill-univers kollu għax hu Alla taʼ mħabba u hu jobgħod dak li hu ħażin. Il-Kelma t’Alla twiegħed: “Dawk li jagħmlu l-ħażen se jitqaċċtu ’l barra, imma dawk li jittamaw f’Ġeħova se jirtu l-art. Ftit ieħor biss, u l-ħażin ma jkunx iktar.” L-għedewwa taʼ Ġeħova “se jgħibu.”—Salm 37:9, 10, 20.

¹¹ Il-Kelma t’Alla twegħedna wkoll: “Il-ġusti se jirtu l-art, u jgħammru fiha għal dejjem.” (Salm 37:29) In-nies leali “bi sliem kotran jitgħaxxqu ferm.” (Salm 37:11) Għala? Għax Alla tagħna kollu mħabba dejjem jagħmel dak li hu l-aħjar għall-qaddejja leali tiegħu. Il-Bibbja tgħidilna li se “jixxottalhom kull demgħa minn għajnejhom, u ma jkunx hemm iżjed mewt, u la niket u la għajat u lanqas uġigħ. L-affarijiet taʼ qabel ikunu spiċċaw.” (Rivelazzjoni 21:4) X’futur mill-isbaħ għan-nies ubbidjenti li japprezzaw l-imħabba t’Alla!

12. Min hu “dak li hu bla ħtija”?

¹² Il-Bibbja tgħid: “Osserva lil dak li hu bla ħtija u żomm lir-rett quddiem għajnejk, għax il-futur taʼ dak il-bniedem se jkun mimli paċi. Imma dawk li jiksru l-liġi se jinqerdu lkoll; il-futur tan-nies mill-agħar se jispiċċa.” (Salm 37:37, 38) “Dak li hu bla ħtija” jsir jaf lil Ġeħova u lil Ibnu u jagħmel ir-rieda t’Alla. (Aqra Ġwanni 17:3.) Hu b’mod sod jemmen li “d-dinja tgħaddi u x-xewqa tagħha wkoll, imma min jagħmel ir-rieda t’Alla jibqaʼ għal dejjem.” (1 Ġwanni 2:17) Minħabba li t-tmiem tad-dinja hu viċin, hu urġenti li ‘nittamaw f’Ġeħova u nżommu triqtu.’—Salm 37:34.

13. X’kien l-akbar att tal-imħabba t’Alla?

¹³ Għalkemm aħna imperfetti, nistgħu nobdu lil Alla. Barra minn hekk, jistaʼ jkollna relazzjoni mill-qrib maʼ Ġeħova minħabba s-sagrifiċċju tal-fidwa taʼ Ġesù, l-akbar att tal-imħabba t’Alla. Ġeħova pprovda l-fidwa ħalli n-nies ubbidjenti jkun jistaʼ jkollhom l-opportunità li jinħelsu mid-dnub u l-mewt. (Aqra Rumani 5:12; 6:23.) Ġesù kien leali lejn Alla għal żmien twil ħafna fis-sema, u allura Ġeħova kien ċert li Ibnu kien se jibqaʼ leali fuq l-art. Bħala Missier kollu mħabba, Ġeħova kien weġġaʼ ħafna meta ra kif in-nies ittrattaw b’mod ħażin lil Ibnu. Madankollu, Ġesù appoġġa b’mod leali d-dritt li Alla jmexxi u wera li bniedem perfett jistaʼ jibqaʼ leali lejn Alla anki fl-iktar sitwazzjonijiet diffiċli.

14, 15. Il-mewt taʼ Ġesù x’għamlet għall-umanità?

¹⁴ Minkejja l-iktar provi diffiċli, Ġesù baqaʼ leali u appoġġa d-dritt taʼ Ġeħova li jmexxi. Aħna għandna nkunu grati li permezz tal-mewt tiegħu, Ġesù ħallas il-prezz tal-fidwa għax ta lin-nies l-opportunità li jgħixu għal dejjem fid-dinja l-ġdida t’Alla! L-appostlu Pawlu ddeskriva l-imħabba li Ġeħova u Ġesù wrew permezz tal-fidwa. Hu qal: “Tabilħaqq, waqt li konna għadna dgħajfin, Kristu miet fiż-żmien stabbilit għal nies mhux devoti. Bilkemm xi ħadd ikun irid imut għal bniedem ġust; iva, għat-tajjeb forsi xi ħadd jissogra jmut. Imma Alla jirrikkmandalna mħabbtu għax, waqt li konna għadna midinbin, Kristu miet għalina.” (Rumani 5:6-8) L-appostlu Ġwanni kiteb: “B’dan intweriet l-imħabba t’Alla għalina, għax Alla bagħat lill-Iben uniġenitu tiegħu fid-dinja biex niksbu l-ħajja permezz tiegħu. L-imħabba qiegħda f’dan: li mhux aħna ħabbejna lil Alla, imma hu ħabbna u bagħat lil Ibnu bħala sagrifiċċju propizjatorju għal dnubietna.”—1 Ġwanni 4:9, 10.

 ¹⁵ Ġesù qal li “Alla tant ħabb lid-dinja li ta l-Iben uniġenitu tiegħu, biex kulmin jeżerċita l-fidi fih ma jinqeridx imma jkollu l-ħajja taʼ dejjem.” (Ġwanni 3:16) Għalkemm kien taʼ wġigħ taʼ qalb kbir għal Ġeħova, hu ta ’l Ibnu bħala fidwa. Dan juri kemm iħobb lin-nies. U din l-imħabba se tibqaʼ għal dejjem. Pawlu kiteb: “Jien konvint li la l-mewt, la l-ħajja, la l-anġli, la l-gvernijiet, la l-affarijiet t’issa, la l-affarijiet li għad iridu jiġu, la l-qawwiet, la l-għoli u lanqas il-fond, u l-ebda ħolqien ieħor ma jistaʼ jifridna mill-imħabba t’Alla li hi fi Kristu Ġesù, il-Mulej tagħna.”—Rumani 8:38, 39.

16. X’inhi s-Saltna Messjanika, u Ġeħova lil min ħatar biex ikun il-Mexxej tagħha?

¹⁶ Il-gvern t’Alla, jiġifieri s-Saltna Messjanika, ukoll hu prova tal-imħabba taʼ Ġeħova għall-umanità. Dan kif? Ġeħova diġà ħatar Mexxej li jħobb l-umanità u li hu kwalifikat biex imexxi, jiġifieri Ġesù Kristu. (Proverbji 8:31) Alla għażel 144,000 bniedem biex imexxu maʼ Kristu fis-sema. Meta jiġu mqajmin, huma jieħdu magħhom l-esperjenza taʼ xi tfisser li tkun bniedem, u dan se jkun taʼ ġid għall-umanità. (Rivelazzjoni 14:1) Waqt li Ġesù kien fuq l-art, is-Saltna kienet it-tema prinċipali tat-tagħlim tiegħu, u hu għallem id-dixxipli tiegħu biex jitolbu: “Missierna fis-smewwiet, ħa jitqaddes ismek. Ħa tiġi saltnatek. Ħa jkun li trid int, kif fis-sema, ukoll fuq l-art.” (Mattew 6:9, 10) Aħna nħarsu ’l quddiem għat-twettiq taʼ talb bħal dan, meta s-Saltna t’Alla ġġib ħafna barkiet għall-umanità!

17. Qabbel it-tmexxija taʼ Ġesù mat-tmexxija tal-bniedem.

¹⁷ Hemm baħar jaqsam bejn it-tmexxija kollha mħabba taʼ Ġesù u t-tmexxija tal-bniedem. It-tmexxija tal-bniedem wasslet biex ikun hemm il-gwerer li qatlu lil miljuni taʼ nies. Imma l-Mexxej tagħna, jiġifieri Ġesù, iħobbna verament u jimita l-kwalitajiet mill-isbaħ t’Alla, speċjalment l-imħabba tiegħu. (Rivelazzjoni 7:10, 16, 17) Ġesù qal: “Ejjew għandi, intom ilkoll li mħabbtin u mgħobbijin, u jien inserraħkom. Ħudu l-madmad tiegħi fuqkom u tgħallmu minni, għax jien ġwejjed u umli f’qalbi, u intom issibu serħan għal ruħkom. Għax il-madmad tiegħi ħelu u t-tagħbija tiegħi ħafifa.” (Mattew 11:28-30) X’wegħda li turi l-imħabba hi din!

18. (a) X’beda jiġri mill-1914? (b) X’se nikkunsidraw fl-artiklu li jmiss?

¹⁸ Il-Bibbja turi li s-Saltna t’Alla bdiet tmexxi mis-sema fl-1914. Minn dak iż-żmien ’l hawn, bdew jinġabru l-aħħar membri taʼ dawk li se jmexxu maʼ Ġesù fis-sema, kif ukoll bdew jinġabru dawk tal-“folla kbira” li se jibqgħu ħajjin wara t-tmiem taʼ din is-sistema u li se jidħlu fid-dinja l-ġdida. (Rivelazzjoni 7:9, 13, 14) Kemm hi kbira l-folla l-kbira llum? Alla x’jitlob minnhom? L-artiklu li jmiss se jeżamina dawn il-mistoqsijiet.