“Tifla Iżraelija” fi Żmienna
“Tifla Iżraelija” fi Żmienna
ĦMISTAX qabel it-Tifkira tal-mewt taʼ Ġesù, kull membru tal-familja Sales fi Praia Grande, il-Brażil, għamel lista taʼ dawk li ried jistieden. Abigayl, taʼ sitt snin, ngħatat invit u staqsewha lil min riedet tagħtih.
“Lir-raġel li jitbissimli dejjem,” wieġbet hi.
“Min hu?” staqsewha l-ġenituri.
“Dak li jkun fis-siġġu tar-roti,” wieġbet hi.
Erbat ijiem wara, Abigayl uriet lill-ġenituri tagħha min kien ir-raġel. Walter, ir-raġel, kien joqgħod blokka bini biss ’il bogħod mis-Sala tas-Saltna. Iktar minn 15-il sena ilu, meta kellu 28 sena, aċċident bil-karozza ħallieh paralizzat minn qaddu ’l isfel. Hu kellu żewġ gwardji persunali, għax kien tat-tajjeb. Wara li Abigayl ngħatat il-permess biex tkellem lil Walter, il-ġenituri tagħha spjegawlu li binthom riedet tagħtih invit.
Fl-aħħar tal-preżentazzjoni tagħha, Abigayl qalet: “L-oħrajn kollha fis-Sala tas-Saltna għandhom ħafna inviti, imma jien għandi wieħed biss. Għalhekk, int l-uniku wieħed li qed nistieden. Jekk ma tiġix, ma jkolli lil ħadd. Imma jekk tiġi, inkun ferħana ħafna, u Ġeħova se jkun saħansitra iktar ferħan.”
Dakinhar tat-Tifkira, ix-Xhieda, inkluż Abigayl, kienu qed inaddfu s-Sala tas-Saltna biex iħejju għall-programm tat-Tifkira fil-għaxija. Wara nofsinhar, Walter kien għaddej, u malli ra lil Abigayl, qal lix-xufier biex iwaqqaf il-karozza. Infetħet tieqa, u hu staqsa lil Abigayl x’kienet qed tagħmel. Hi qaltlu li kienu qed inaddfu s-Sala biex tkun sabiħa għalih.
Dik il-lejla Abigayl kienet ansjuża ferm. It-taħdita bdiet, u hi baqgħet tħares madwarha biex tara jekk wasalx Walter. F’daqqa waħda, waslu hu u l-gwardji persunali tiegħu. Tgħidx xi tbissima ċarrtet! Wara t-taħdita, Walter ammetta li hu kien fi triqtu lejn belt oħra imma mbagħad biddel fehmtu u mar għat-Tifkira, sempliċement għaliha. Imbagħad żied: “It-taħdita kienet dak li kelli bżonn nismaʼ.” Hu talab għal Bibbja u beda jistudja u jattendi l-laqgħat.
Sadanittant, oħt Walter qalet li riedet tiltaqaʼ maʼ din Abigayl, li ħuha tant kien isemmiha. Meta ltaqgħet magħha, tgħidx kemm ħadet pjaċir meta saret taf x’tifla mill-aħjar hi din Abigayl. “Issa naf għala ħija hu daqshekk kuntent,” qalet hi.
Walter għadu jistudja u jattendi l-laqgħat. Hu saħansitra jikkummenta u jaqsam m’oħrajn l-affarijiet li jitgħallem. Żgur li ċ-ċkejkna Abigayl tfakkarna fit-tifla Iżraelija li għenet lil Nagħman biex isir jaf lill-Alla l-veru, Ġeħova.—2 Slaten 5:2-14.