IL-​BIBBJA tbassar li s-​Saltna t’Alla se ġġib paċi dejjiema u hena fuq l-​art. (Danjel 2:44) Fit-​Talba tal-​Missierna, Ġesù għallem lid-​dixxipli tiegħu biex jitolbu: “Ħa tiġi saltnatek. Ħa jkun li trid int, kif fis-​sema, ukoll fuq l-​art.” (Mattew 6:10) Fil-​profezija sinifikanti u magħrufa li Ġesù ta lid-​dixxipli tiegħu fuq il-​Muntanja taż-​Żebbuġ, hu bassar ġrajjiet u kundizzjonijiet speċifiċi li kellhom jiġu immedjatament qabel il-​miġja taʼ dik is-​Saltna. Flimkien, dawn il-​fatturi jifformaw sinjal li se jkun evidentement ċar għall-​osservaturi kollha taʼ qalb onesta. Kemm mill-​aspetti li ġejjin taʼ dak is-​sinjal rajt int personalment?

Gwerer Internazzjonali. Ġesù bassar: “Ġens iqum kontra ġens u saltna kontra saltna.” (Mattew 24:7) Qabel l-​ewwel gwerra dinjija fl-​1914, il-​gwerer ma kinux daqshekk mifruxin. L-​ewwel gwerra dinjija mhux biss kopriet partijiet kbar mill-​globu imma wkoll għaġġlet l-​iżvilupp t’armi iktar terribbli minn kwalunkwe arma li l-​umanità  kienet taf biha. Per eżempju, l-​ajruplan li kien għadu kif ġie vvintat ġie użat biex jitfaʼ l-​bombi fuq nies innoċenti. Produzzjoni t’armi bil-​massa żiedet l-​għadd taʼ dawk maqtulin fil-​gwerra sa livelli li qabel ma kontx timmaġinahom, hekk kif nofs il-​65 miljun suldat li ġġieldu fil-​gwerra ġew maqtulin jew midrubin. Madankollu, hekk kif is-​seklu 20 mexa ’l quddiem, il-​qtil żdied. Studjuż taʼ l-​istorja qal li aħna qatt ma nistgħu nkunu nafu eżatt kemm suldati u nies innoċenti mietu minħabba t-​tieni gwerra dinjija. U l-​gwerer ikomplu saħansitra issa.

Ġuħ Mifrux maʼ Kullimkien. “Ikun hemm nuqqas taʼ ikel,” bassar Ġesù. (Mattew 24:7) Fl-​2005, ir-​rivista Science qalet: “Hemm 854 miljun ruħ fid-​dinja (madwar 14 fil-​mija mill-​popolazzjoni tagħna) li huma malnutriti kronikament jew serjament għal żmien qasir.” Fl-​2007, sors tal-​Ġnus Magħquda rrapporta li 33 pajjiż m’għandhomx ikel biżżejjed biex jitimgħu n-​nies tagħhom. Kif jistaʼ jkun dan, meta l-​produzzjoni tal-​qamħ tad-​dinja qed tiżdied? Raġuni waħda hi li r-​rabaʼ u l-​qamħ li jistgħu jintużaw biex jitimgħu n-​nies minflok qed jintużaw biex jipproduċu fuel għall-​vetturi. “L-​ammont taʼ qamħ meħtieġ biex vettura kbira li tingrana fuq erbaʼ roti (SUV) timtelaʼ darba biss bil-​fuel jistaʼ jitmaʼ bniedem għal sena sħiħa,” tirrapporta l-​gazzetta The Witness taʼ l-​Afrika t’Isfel. Ukoll f’pajjiżi żviluppati, iż-​żjieda fil-​prezzijiet taʼ l-​ikel iġġiegħel lil ħafna jagħżlu bejn li jkollhom l-​ikla prinċipali jew li jħallsu għal neċessitajiet oħrajn, bħalma huma l-​mediċini jew is-​sistemi tas-​sħana.

Terremoti Kbar. Ġesù qal: “Ikun hemm terremoti kbar.” (Luqa 21:11) Jekk jidhirlek li llum iktar nies minn qatt qabel qed jiġu effettwati mit-​terremoti, għandek raġun. “F’daqqa waħda, qed naraw żjieda fl-​attività sismika globalment,” osserva s-​sismologu Indjan R. K. Chadha fl-​2007. “Ħadd ma jaf għala.” Iktar minn hekk, tkabbir mgħaġġel tal-​popolazzjoni fi nħawi suġġetti għat-​terremoti żied l-​imwiet minħabba dawn id-​diżastri. It-​terremot li laqat l-​Oċean Indjan fl-​2004 u t-​tsunami li segwih għamlu dik is-​sena l-​“iktar waħda li rat imwiet permezz taʼ terremoti fi kważi 500 sena” u “t-​tieni l-​iktar fatali fl-​istorja rekordjata,” skond l-​Istħarriġ Ġeoloġiku taʼ l-​Istati Uniti.

Mard li Ma Jistax Jiġi Kontrollat. “Ikun hemm . . . mard li jittieħed,” bassar Ġesù. (Luqa 21:11) Madwar il-​globu, mard li ilu u mard ġdid qed imarrdu saħansitra iktar nies, u hu diffiċli biex issib kura għalihom. Per eżempju, il-​progress tal-​miri internazzjonali biex il-​malarja tinqered għalkollox kellu jnaqqas il-​pass ripetutament hekk kif il-​marda għadha ma tistax tiġi kontrollata mill-​bniedem. Barra minn hekk, miljuni jiġu maqtulin minn mard li ilu, inkluż it-​tuberkulosi (TB) li issa qed tinfirex daqs l-​AIDS u mard ġdid ieħor. “Terz mill-​popolazzjoni tad-​dinja bħalissa hija infettata bil-​baċillu tat-​TB,” tirrapporta l-​Organizzazzjoni Dinjija tas-​Saħħa. L-​organizzazzjoni tirrapporta wkoll li l-​HIV qed tikkontribwixxi għall-​epidemiji tat-​TB f’ħafna pajjiżi. Kull sekonda, persuna oħra qed tiġi infettata bit-​TB, u t-​TB qed tiżviluppa iktar reżistenza għall-​kura bil-​mediċina. Fl-​2007, pazjent fl-​Ewropa nstab li kellu t-​TB li kienet “reżistenti għal kull mediċina li għandna,” tirrapporta r-​rivista New Scientist.

Kollass Morali u Soċjali. “Minħabba li jiżdied il-​ħażen tibred l-​imħabba tal-​biċċa l-​kbira min-​nies,” qal Ġesù. (Mattew 24:12) Minbarra dak li bassar Ġesù, l-​appostlu Pawlu rrefera  bil-​quddiem għal kollass fil-​valuri soċjali u morali. Hu ddeskriva “l-​aħħar jiem” diffiċli li kellhom jiġu eżatt qabel ma s-​Saltna t’Alla teqred din is-​sistema dinjija. “In-​nies ikunu jħobbu lilhom infushom, iħobbu l-​flus, minfuħin bihom infushom, suppervi, midgħija, diżubbidjenti lejn il-​ġenituri, ingrati, żleali, mingħajr imħabba naturali, ma jkunux iridu jiftiehmu, kalunnjaturi, mingħajr rażna, feroċi, mingħajr imħabba għat-​tajjeb, tradituri, rashom iebsa, imkabbrin, iħobbu l-​pjaċiri minflok ma jħobbu lil Alla, ikollhom għamla taʼ devozzjoni lejn Alla imma ma jurux bil-​fatti l-​qawwa tagħha.” (2 Timotju 3:1-5) Ma taħsibx li n-​nies qed juru dawn il-​karatteristiki ħżiena iktar minn qabel?

Ġesù u Pawlu ma kitbux il-​fatturi storiċi, soċjali, u politiċi kollha li jaħtu għal dawn il-​kundizzjonijiet tad-​dinja. Minkejja dan, il-​profeziji tagħhom bassru b’mod preċiż il-​ġrajjiet u l-​attitudnijiet li qed naraw illum. Xi ngħidu għall-​futur? Il-​profezija taʼ Isaija bassret il-​miġja tal-​Messija b’mod li tistaʼ tafdah u ddeskriviet il-​bidliet taʼ benefiċċju li s-​Saltna t’Alla se ġġib fuq l-​art. Ejja nikkunsidraw dawn fl-​artiklu li jmiss.

[Stampa f’paġna 6]

“Ġens iqum kontra ġens”

[Stampa f’paġna 7]

“Ikun hemm . . . mard li jittieħed”

[Sors]

© WHO/P. Virot