Jemmnu x-Xhieda taʼ Ġeħova li Huma l-Uniċi Wħud li Se Jsalvaw?
Il-Qarrejja Tagħna Jistaqsu
Ix-Xhieda taʼ Ġeħova jemmnu li sabu r-reliġjon il-vera. Kieku ma kinux jemmnu hekk, kieku kienu jibdlu t-twemmin tagħhom. Bħall-aduraturi f’ħafna mir-reliġjonijiet l-oħrajn, ix-Xhieda taʼ Ġeħova jittamaw li jsalvaw. Madankollu, huma jemmnu wkoll li m’huwiex għalihom li jiġġudikaw min se jiġi salvat. Fl-aħħar mill-aħħar, Alla hu l-Imħallef. Hu jiddeċiedi.—Isaija 33:22.
Il-Kelma t’Alla turi li dawk li se jsalvaw mhux biss għandhom ikunu jridu s-salvazzjoni imma wkoll jikkooperaw mas-Salvatur. Biex nagħtu eżempju: Ejja ngħidu li wieħed li jkun mar mixja jintilef fid-deżert. Hu b’mod iddisprat irid isib it-triq biex isalva. Se jmut jew se jsalva? Ir-riżultat jiddependi mill-mod kif iwieġeb għall-għajnuna. Minħabba l-kburija, hu għandu mnejn jirrifjuta l-għajnuna tal-wieħed li jiġi biex isalvah. Mill-banda l-oħra, hu jistaʼ jaċċetta l-għajnuna umilment u jirnexxilu jsalva.
B’mod simili, is-salvazzjoni tappartjeni lil dawk li jikkooperaw mas-Salvatur taʼ l-umanità, Alla Ġeħova. Is-salvazzjoni hi għotja mingħand Alla, però, mhux in-nies kollha se jiksbuha. Ġesù, l-Iben t’Alla, qal: “Mhux kulmin jgħidli, ‘Mulej, Mulej,’ jidħol fis-saltna tas-smewwiet, imma min jagħmel ir-rieda taʼ Missieri li hu fis-smewwiet.”—Mattew 7:21.
Ix-Xhieda taʼ Ġeħova jemmnu li Alla jeħles biss lil dawk li jeżerċitaw fidi fis-sagrifiċċju tal-fidwa taʼ Ġesù u jżommu qrib kemm jistaʼ jkun mat-tagħlim tiegħu. (Atti 4:10-12) Ikkunsidra tliet ħtiġijiet importanti għas-salvazzjoni li huma rivelati fil-Kelma t’Alla.
(1) “B’dan ikun jaf kulħadd li intom dixxipli tiegħi, jekk ikollkom l-imħabba bejnietkom,” qal Ġesù lil sħabu. (Ġwanni 13:35) L-eżempju taʼ Ġesù nnifsu meta ta ħajtu għall-oħrajn enfasizza l-importanza taʼ l-imħabba. Dawk li jħobbu lil oħrajn qed juru kwalità li hi vitali għas-salvazzjoni.
(2) “Għarrafthom ismek,” qal Ġesù meta kien qed jitlob lil Missieru. (Ġwanni 17:26) Ġesù kien jaf kemm kien importanti għal Missieru l-isem persunali t’Alla, Ġeħova. Ġesù talab biex isem Missieru “jitqaddes.” (Mattew 6:9) It-taqdis taʼ l-isem t’Alla jinkludi li nkunu nafu dak l-isem u nittrattawh bħala li hu importanti u qaddis. Bħal Ġesù, dawk li jfittxu s-salvazzjoni għandhom bżonn jużaw l-isem t’Alla. Huma għandhom bżonn ukoll jgħallmu lil oħrajn dwar l-isem u l-kwalitajiet t’Alla. (Mattew 28:19, 20) Fil-fatt, dawk biss li jsejħu isem Alla se jiġu salvati.—Rumani 10:13.
(3) “Is-saltna tiegħi mhix parti minn din id-dinja,” qal Ġesù lil Ponzju Pilatu. (Ġwanni 18:36) Ftit illum juru fidi fis-Saltna, jew il-gvern, t’Alla, li s-Sultan tagħha hu Ġesù. Minflok, huma jpoġġu l-fiduċja tagħhom f’istituzzjonijiet umani. Kuntrarju għal dan, dawk li se jiġu salvati jappoġġaw lealment is-Saltna t’Alla u jgħallmu lil oħrajn dwar kif se teħles lill-bnedmin leali kollha.—Mattew 4:17.
Wara li tgħallmu dwar xi ħtiġijiet għas-salvazzjoni, id-dixxipli taʼ Ġesù qalu: “Min jistaʼ jiġi salvat?” Ġesù wieġeb: “Dak li hu impossibbli għall-bnedmin, hu possibbli għal Alla.” (Luqa 18:18-30) Ix-Xhieda taʼ Ġeħova jħabirku biex jipprovaw jgħixu skond dawn il-ħtiġijiet għas-salvazzjoni. Huma jaħdmu iebes ukoll biex jgħinu lil oħrajn isalvaw.