Tibżaʼ mill-Mejtin?
GĦAL din il-mistoqsija, ħafna jwieġbu sempliċement, “Le. Għala għandi nibżaʼ?” Huma jemmnu li dawk li mietu huma tassew bla ħajja. Madankollu, miljuni huma konvinti li l-mejtin jibqgħu jgħixu bħala spirti.
F’Benin, fil-punent taʼ l-Afrika, ħafna jemmnu li l-mejtin jistgħu jiġu lura biex joqtlu membri oħrajn tal-familja tagħhom stess. In-nies ibigħu dak li jippossiedu jew jiddejnu biex jagħmlu sagrifiċċji taʼ l-annimali jew ċerimonji ħalli jikkalmaw lill-qraba mejtin. Xi wħud jipprattikaw l-ispiritiżmu, li jinkludi l-idea li parti mill-bniedem li hija spirtu tibqaʼ ħajja fil-mewt u tistaʼ tikkomunika mal-ħajjin. Oħrajn għaddew minn esperjenzi tal-biżaʼ li jaħsbu li ġraw minħabba l-influwenza taʼ l-ispirti tal-mejtin.
Wieħed li għadda minn esperjenza bħal din kien Agboola, raġel li jgħix viċin il-fruntiera bejn Benin u n-Niġerja. Hu jgħid: “Fl-inħawi tagħna l-ispiritiżmu hu parti mill-ħajja taʼ kuljum. Hija d-drawwa li naħslu l-iġsma ċerimonjalment biex nippreparawhom għall-qasam taʼ l-ispirti. Jien spiss kont niġbor flimkien dak li jkun fadal mis-sapun u nħalltu maʼ ċertu weraq. Imbagħad, hekk kif kont nidlek it-taħlita mas-senter tal-kaċċa tiegħi, kont ngħid b’leħen għoli liema tip t’annimal ridt noqtol. Prattiki bħal dawn huma komuni u jidhru li huma effettivi mhux ħażin. Madankollu, xi aspetti taʼ l-ispiritiżmu kienu tal-biżaʼ.
“Meta tnejn minn uliedi mietu mewta misterjuża, issuspettajt li xi ħadd kien qed jipprattika l-ispiritiżmu kontrija. Biex inkun naf, mort għand raġel xiħ li kien magħruf għall-qawwiet spiritistiċi tiegħu. Hu kkonfermali s-suspetti tiegħi. Agħar minn hekk, hu qalli li wliedi issa kienu qed jistennew fid-dinja taʼ l-ispirti biex la jmut dak li qatilhom isiru qaddejja tiegħu. Ir-raġel xiħ żied li t-tielet iben tiegħi kien se jmut ukoll. Ftit ġranet wara, dan l-iben miet ukoll.”
Agboola mbagħad iltaqaʼ maʼ John, wieħed mix-Xhieda taʼ Ġeħova mill-pajjiż tan-Niġerja li hu qrib. L-ispjegazzjoni taʼ John fuq il-kundizzjoni tal-mejtin kienet ibbażata fuq il-Bibbja. Dik l-ispjegazzjoni biddlet ħajjet Agboola. Tistaʼ tbiddel tiegħek ukoll.
X’Jiġri mill-Mejtin?
Min jistaʼ jwieġeb l-aħjar din il-mistoqsija? Mhux xi bniedem, ikun kemm ikun magħruf. Minflok, Ġeħova, il-Ħallieq taʼ kull ħajja “fis-smewwiet u fuq l-art, dawk viżibbli u dawk inviżibbli,” għandu t-tweġiba. (Kolossin 1:16) Lill-anġli ħalaqhom biex jgħixu fil-qasam taʼ l-ispirti u lill-bnedmin u lill-annimali biex jgħixu fuq l-art. (Salm 104:4, 23, 24) Il-ħajja kullimkien tiddependi minnu. (Rivelazzjoni 4:11) Mela kkunsidra x’tgħid il-Kelma t’Alla stess, il-Bibbja, dwar il-mewt.
Ġeħova kien l-ewwel wieħed li tkellem dwar il-mewt. Hu wissa li jekk Adam u Eva ma jobduhx kienu se jmutu. (Ġenesi 2:17) X’kien ifisser dan? Ġeħova spjega: “Trab int u trab terġaʼ ssir.” (Ġenesi 3:19) Fil-mewt il-ġisem jitmermer; imur lura lejn it-trab. Il-ħajja tieqaf.
Adam u Eva m’obdewx minn jeddhom, u għalhekk ġew sentenzjati għall-mewt. Madankollu, huma ma kinux l-ewwel li mietu. Binhom Abel miet l-ewwel. Ħuh il-kbir, Kajjin, qatlu. (Ġenesi 4:8) Kajjin ma beżax li ħuh il-mejjet setaʼ jagħmel vendetta. Minflok, Kajjin kien inkwetat minn dak li setgħu jagħmlulu l-bnedmin ħajjin.—Ġenesi 4:10-16.
Ħafna sekli wara, is-Sultan Erodi kien inkwetat meta l-astroloġi informawh li “sultan tal-Lhud” twieled fir-renju tiegħu. Determinat li joqtol lil dan il-wieħed li jistaʼ jsir sultan, Erodi ppjana li joqtol is-subien kollha taʼ Betlehem li kellhom sentejn jew inqas. Imma anġlu wissa lil Ġużeppi biex jieħu lil Ġesù u lil Marija u ‘jaħrab lejn l-Eġittu.’—Mattew 2:1-16.
Meta miet Erodi, l-anġlu qal lil Ġużeppi biex jirritorna Israel, “għax dawk li pprovaw jieħdu l-ħajja tat-tifel [kienu] mietu.” (Mattew 2:19, 20) L-anġlu, li hu nnifsu hu spirtu, kien jaf li Erodi ma setax jagħmel iktar ħsara lil Ġesù. Ġużeppi ma kellu l-ebda biżaʼ mis-Sultan Erodi li issa kien miet. Madankollu, Ġużeppi kien qed jibżaʼ minn dak li setaʼ jagħmel Arkelaw, l-iben tirann t’Erodi. Għalhekk, Ġużeppi mar joqgħod mal-familja tiegħu fil-Galilija, barra mill-ġurisdizzjoni t’Arkelaw.—Mattew 2:22.
Dawn ir-rakkonti jgħinuna naraw li l-mejtin m’għandhomx qawwa. Allura, kif jistgħu jiġu spjegati l-esperjenzi t’Agboola u t’oħrajn?
“Demonji,” jew Spirti Mhux Nodfa
Meta kien adult, Ġesù ffaċċja ħlejjaq spirti ħżiena. Huma għarfu lil Ġesù u indirizzawh bħala “Bin Alla.” Ġesù wkoll kien jaf min huma. Huma ma kinux spirti taʼ bnedmin mejtin. Minflok, Ġesù identifikahom bħala “demonji” jew spirti mhux nodfa.—Mattew 8:29-31; 10:8; Marku 5:8.
Il-Bibbja titkellem dwar spirti leali lejn Alla u dwar dawk li rribellaw kontrih. Il-ktieb tal-Ġenesi jgħidilna li meta Ġeħova keċċa ’l barra mill-ġnien taʼ l-Għeden lil Adam u Eva li kienu diżubbidjenti, hu qiegħed kerubini, jew anġli, fil-lvant tal-ġnien biex ma jħallu lil ħadd jidħol fih. (Ġenesi 3:24) Milli jidher, din kienet l-ewwel darba li l-ispirti saru viżibbli għall-bnedmin.
Xi żmien wara, għadd t’anġli ġew fuq l-art u ħadu ġisem uman. Ġeħova ma kienx ħatarhom biex iwettqu xi inkarigu fuq l-art. Minflok, huma “abbandunaw il-post xieraq fejn kellhom jgħammru” fil-qasam taʼ l-ispirti. (Ġuda 6) Il-motivi tagħhom kienu egoistiċi. Huma ħadu b’marthom nisa li wildu nisel imħallat magħruf bħala n-Nefilim. In-Nefilim u l-missirijiet ribellużi tagħhom imlew l-art bil-vjolenza u b’ħafna ħażen kbir ieħor. (Ġenesi 6:1-5) Ġeħova rranġa s-sitwazzjoni billi ġab id-Dilluvju globali taʼ żmien Noè. L-ilmijiet qerdu l-irġiel u n-nisa l-ħżiena kif ukoll lil dak in-nisel. Xi ġralhom l-anġli?
Id-Dilluvju ġegħelhom imorru lura fil-qasam taʼ l-ispirti. Madankollu, Ġeħova ma ħallihomx jieħdu “l-pożizzjoni oriġinali tagħhom.” (Ġuda 6) Il-Bibbja tgħid: “Alla ma żammx lura milli jikkastiga lill-anġli li dinbu, imma, billi xeħithom f’Tartaru, tefagħhom f’ħofor taʼ dlam ċappa biex jinżammu għall-ġudizzju.”—2 Pietru 2:4.
Tartaru m’huwiex xi post partikulari; hu kundizzjoni bħal taʼ ħabs li tillimita l-attività taʼ dawn l-imkeċċijin. Id-demonji m’għadhomx Mattew 12:43-45; Luqa 8:27-33) Ukoll, huma jqarrqu bil-bnedmin billi jagħmluha taʼ l-ispirti tal-mejtin. Għala? Biex iżommu n-nies milli jaduraw lil Ġeħova bil-mod li jogħġob lilu u biex iħawduhom rigward il-kundizzjoni vera tal-mejtin.
jistgħu jimmaterjalizzaw ruħhom, imma xorta għad għandhom qawwa kbira u jinfluwenzaw bil-kbir l-imħuħ u l-ħajjiet. Huma jistgħu jikkontrollaw il-bnedmin u l-annimali. (Kif Tegħleb il-Biżaʼ
Agboola fehem ir-raġunevolezza taʼ l-ispjegazzjonijiet tal-Bibbja rigward il-mewt u l-identità taʼ l-ispirti. Hu fehem li kellu bżonn jitgħallem iktar. Beda jaqra l-Bibbja u pubblikazzjonijiet ibbażati fuq il-Bibbja maʼ John. Agboola sab faraġ fl-għarfien li wliedu huma reqdin fil-qabar u mhux qed jistennew fil-qasam taʼ l-ispirti biex isiru l-qaddejja taʼ dak li qatilhom.—Ġwanni 11:11-13.
Agboola rrealizza wkoll li hu kellu jwaqqaf għalkollox kull prattika spiritistika. Hu ħaraq l-affarijiet kollha tiegħu li kellhom x’jaqsmu maʼ l-okkult. (Atti 19:19) Xi wħud mill-komunità wissewh li l-ispirti ma kinux se jieħdu pjaċir. Imma Agboola ma kellu l-ebda biżaʼ. Hu segwa l-parir li nsibu f’Efesin 6:11, 12: “Ilbsu l-armatura sħiħa mingħand Alla . . . għax aħna [nissaraw] . . . kontra l-forzi taʼ l-ispirti mill-agħar.” Din l-armatura spiritwali tinkludi l-verità, is-sewwa, l-aħbar tajba tal-paċi, il-fidi, u s-sejf taʼ l-ispirtu, il-Kelma t’Alla. Armatura bħal din toriġina minn Alla u hi qawwija!
Agboola ġie mwarrab mill-ħbieb u mill-qraba tiegħu meta ma baqax jipprattika d-drawwiet assoċjati maʼ l-ispiritiżmu. Madankollu, fis-Sala tas-Saltna lokali tax-Xhieda taʼ Ġeħova, hu sab ħbieb ġodda li jemmnu dak li tgħallem il-Bibbja.
Agboola issa jaf li Ġeħova dalwaqt se jnaddaf l-art mill-ħażen u se jwaqqaf għalkollox l-attività tad-demonji. Eventwalment, Hu se jeqridhom. (Rivelazzjoni 20:1, 2, 10) Alla se jirxoxta hawn fuq l-art lil “dawk kollha li qegħdin fl-oqbra tat-tifkira.” (Ġwanni 5:28, 29) Dan jinkludi lil Abel, lit-tfal innoċenti li qatel is-Sultan Erodi, u lil miljuni oħrajn. Agboola hu fiduċjuż li t-tliet uliedu se jkunu inklużi. Il-maħbubin tiegħek li mietu jistgħu jkunu fosthom. Dawn l-uħud kollha li se jiġu mqajmin se jikkonfermaw li mill-mewt tagħhom sa l-irxoxt tagħhom, huma ma kienu jafu assolutament xejn—ma jafu bl-ebda ċerimonja li saret għalihom.
M’għandek l-ebda raġuni biex tibżaʼ mill-mejtin. Minflok, tistaʼ tħares ’il quddiem biex terġaʼ tingħaqad mal-maħbubin mejtin. Sadanittant, għala ma tistudjax il-Bibbja biex isaħħaħ il-fidi tiegħek? Assoċja maʼ dawk li jemmnu dak li tgħallem il-Bibbja. Jekk qed tieħu sehem f’xi spiritiżmu, ieqaf immedjatament. Ipproteġi lilek innifsek mid-demonji billi tilbes “l-armatura sħiħa mingħand Alla.” (Efesin 6:11) Ix-Xhieda taʼ Ġeħova se jkunu ferħanin li jgħinuk. Huma joffru studji tal-Bibbja fid-djar bla ħlas billi jużaw il-ktieb Il-Bibbja X’Tgħallem Verament? a
Agboola m’għadux jibżaʼ mill-mejtin u tgħallem kif jirreżisti d-demonji. Hu qal: “Ma nafx min ikkaġuna l-mewt tat-tliet uliedi. Imma minn mindu bdejt naqdi lil Ġeħova, jien kelli sebat itfal oħra. Ħadd mill-qasam taʼ l-ispirti qatt m’għamlilhom ħsara.”
[Nota taʼ taħt]
a Pubblikat mix-Xhieda taʼ Ġeħova.
[Kumment f’paġna 13]
Agboola m’għadux jibżaʼ mill-mejtin u tgħallem kif jirreżisti d-demonji
[Stampa f’paġna 12]
Kajjin ma beżax li ħuh il-mejjet setaʼ jagħmel vendetta