IR-​RIVISTA li qed taqra forsi mhijiex l-​ewwel ħarġa taʼ dan il-​ġurnal li rajt int. Forsi x-​Xhieda taʼ Ġeħova ġew għandek u offrewlek It-​Torri tal-​Għassa u Stenbaħ! biex jgħinuk tifhem il-​Bibbja aħjar. Jew forsi rajt lix-​Xhieda joffru letteratura Biblika bħal din fit-​toroq jew f’xi post pubbliku. Fil-​fatt, iċ-​ċirkulazzjoni taʼ dan il-​ġurnal kull xahar tisboq il-​35 miljun, u b’hekk din ir-​rivista hi bil-​wisq l-​iktar waħda pubblikata tat-​tip tagħha fid-​dinja.

Iżda, qatt qgħadt taħseb fejn u kif tiġi prodotta din il-​letteratura kollha? Biex inwieġbu, ejja nagħtu titwila lejn waħda biss mill-​ħafna stamperiji li jużaw ix-​Xhieda taʼ Ġeħova f’diversi artijiet—dik li hemm f’Wallkill, New York, l-​Istati Uniti. Ħafna mill-​qarrejja tagħna madwar id-​dinja ma jistgħux jivvjaġġaw faċilment biex iżuru l-​istamperija li jħaddmu x-​Xhieda taʼ Ġeħova fl-​Istati Uniti, u għalhekk dan il-​vjaġġ permezz tal-​kliem u l-​istampi jistaʼ jkun l-​aħjar ħaġa li tistaʼ tagħmel.

M’għandniex xi ngħidu, l-​istampar jibda bil-​kelma miktuba. Id-​Dipartiment tal-​Grafika jirċievi materjal li jrid jiġi stampat permezz taʼ files elettroniċi mingħand id-​Dipartiment tal-​Kitba fi Brooklyn, New York. Dawn il-​files jintużaw biex isiru l-​pjanċi għall-​istampar. F’Wallkill, kull xahar xi 1,400 romblu taʼ karti jaslu fl-​istamperija, li kuljum tuża minn 70 sa 90 tunnellata metrika taʼ karti. Ir-​rombli—li xi ftit minnhom jiżnu iktar minn 1,362 kilogramm—jiġu mitmugħin f’ħames preses offset bir-​romblu, li jkunu ġew iffittjati bil-​pjanċi għall-​istampar. Il-​karta tiġi stampata, maqtugħa, u mitwija f’faxxikli taʼ 32 paġna. Ir-​rivista li qed taqra int hi faxxiklu wieħed. Xi ngħidu għall-​kotba? Fil-​legatorija, il-​faxxikli jiġu marbutin flimkien biex jipproduċu l-​kotba. Waħda miż-​żewġ linji tal-​illegar tistaʼ tipproduċi 50,000 ktieb b’qoxra iebsa jew 75,000 ktieb b’qoxra ratba f’ġurnata waħda. Il-​linja tal-​illegar l-​oħra tistaʼ tipproduċi kuljum madwar 100,000 ktieb b’qoxra ratba.

Matul l-​2008, din l-​istamperija pproduċiet iktar minn 28,000,000 ktieb, li ’l fuq minn 2.6 miljuni minnhom huma Bibbji. Fl-​istess perijodu ġew prodotti 243,317,564 rivista. L-​istamperija żżomm din il-​letteratura Biblika maħżuna b’xi 380 lingwa. Ladarba tkun intgħamlet il-​letteratura, x’jiġri mbagħad?

L-istamperija tirċievi rikjesti mit-​12,754 kongregazzjoni tax-​Xhieda taʼ Ġeħova fl-​Istati Uniti kontinentali u 1,369 fil-​Karibew u fil-​Ħawajj. Id-​Dipartiment li Jibgħat  il-​Letteratura jippakkja din il-​letteratura rikjesta kollha u jirranġa t-​trasport lejn l-​indirizzi xierqa. Kull sena, xi 14-il miljun kilogramm taʼ letteratura jintbagħtu lejn kongregazzjonijiet fl-​Istati Uniti.

L-iktar parti importanti minn din l-​istamperija ma tinvolvix magni, imma nies. Iktar minn 300 ruħ jaħdmu fid-​dipartimenti tal-​istamperija—il-​Grafika, l-​Iskedi, l-​Istampar, il-​Legatorija, u d-​Dipartiment li Jibgħat il-​Letteratura. Il-​ħaddiema—kollha kemm huma volontieri bla salarju—għandhom minn 19 sa 92 sena.

Huma interessati tassew fin-​nies—l-​individwi li jirċievu din il-​letteratura bil-​ħerqa u li jiġu mgħallmin, inkuraġġiti, u gwidati mill-​prinċipji Bibliċi diskussi fiha. Aħna nittamaw li int fost dawn il-​qarrejja u li l-​letteratura stampata hawnhekk, jew f’waħda mill-​istamperiji tagħna f’pajjiż ieħor, tgħinek tkompli tieħu l-​għarfien dwar Alla Ġeħova u Ġesù Kristu, li jfisser il-​ħajja taʼ dejjem.—Ġwanni 17:3.

[Stampi f’paġna 16]

 [Stampa sħiħa f’paġna 17]