In-Nies Tajbin Kollha Jmorru fis-Sema?
In-Nies Tajbin Kollha Jmorru fis-Sema?
WARA l-aħħar ikla mal-appostli tiegħu, lejliet dakinhar li ngħata l-mewt, Ġesù wiegħed li jippremjahom b’post fis-sema. Hu qal: “F’dar Missieri hemm ħafna postijiet fejn toqogħdu. Kieku ma kienx hekk kont ngħidilkom, għax sejjer inħejji post għalikom.” (Ġwanni 14:2) Ġesù għala kien se jipprovdilhom post fis-sema? X’se jagħmlu hemmhekk?
Ġesù kellu f’moħħu inkarigu speċjali għad-dixxipli tiegħu. Matul dik l-istess lejla, hu qal: “Intom dawk li bqajtu miegħi fil-provi tiegħi; u nagħmel patt magħkom għal saltna, bħalma Missieri għamel miegħi.” (Luqa 22:28, 29) Alla kien wiegħed lil Ġesù li hu se jkun is-Sultan li jipprovdi wieħed mill-akbar bżonnijiet tal-bnedmin—gvern tajjeb. Ġesù se jeħles lin-nies mit-tbatija u se jeqred lil dawk li qed jimbroljawhom. Għalkemm Ġesù se jkollu sudditi “sa truf l-art,” it-tron tiegħu se jkun fis-sema.—Salm 72:4, 8; Danjel 7:13, 14.
Madankollu, Ġesù mhux se jaħkem waħdu. Kien għalhekk li hu wiegħed lill-appostli tiegħu post fis-sema. Huma kienu l-ewwel uħud li ġew magħżulin biex “isaltnu għal fuq l-art.”—Rivelazzjoni 5:10.
Kemm uħud imorru fis-sema? Bħal fi kwalunkwe gvern, il-ħakkiema fis-Saltna t’Alla fis-sema huma ftit meta mqabblin man-nies kollha li jgħixu taħt l-awtorità tagħha. Lil dawk li se jaħkmu miegħu, Ġesù qalilhom: “Tibżgħux, merħla żgħira, għax Missierkom approva li jagħtikom is-saltna.” (Luqa 12:32) Din il-“merħla żgħira” fl-aħħar se tkun tammonta għal 144,000. (Rivelazzjoni 14:1) Dan in-numru hu żgħir meta mqabbel mal-miljuni taʼ nies li se jgawdu ħajja bla tmiem fuq l-art bħala sudditi leali tas-Saltna.—Rivelazzjoni 21:4.
Mela mhux in-nies tajbin kollha jmorru fis-sema. Dwar is-Sultan David li kien tajjeb, l-appostlu Pietru qal ċar u tond: “David ma telax fis-smewwiet.” (Atti 2:34) Ġwanni l-Battista kien raġel tajjeb. Madankollu, Ġesù indika li hu mhux se jiġi eżaltat biex jaħkem bħala sultan fis-sema. Ġesù qal: “Fost dawk li twieldu min-nisa ħadd ma qam akbar minn Ġwanni l-Battista; imma min hu fost l-iżgħar fis-saltna tas-smewwiet hu akbar minnu.”—Mattew 11:11.
Se Tirċivih Int il-Premju li Jingħata lin-Nies Tajbin?
Individwu x’għandu jagħmel sabiex jirċievi l-premju taʼ ħajja taʼ dejjem fuq l-art? Ġesù qal: “Alla tant ħabb lid-dinja li ta l-Iben uniġenitu tiegħu, biex kulmin jeżerċita l-fidi fih ma jinqeridx imma jkollu l-ħajja taʼ dejjem.” (Ġwanni 3:16) Innota li l-imħabba li Alla għandu għad-dinja twasslu biex jagħmel il-ħajja taʼ dejjem disponibbli għal kulħadd, iżda fil-fatt dawk biss li ‘jeżerċitaw il-fidi’ jirċivuh dan il-premju.
Jeħtieġ li l-fidi tkun ibbażata fuq l-għarfien eżatt. (Ġwanni 17:3) Tistaʼ turi li int tajjeb billi titgħallem iktar dwar l-iskop li Alla għandu għall-bnedmin. Ħalli l-fidi f’dak li titgħallem tqanqlek biex taġixxi. U ibqaʼ ċert li l-opportunità taʼ ħajja bla tmiem hi tassew miftuħa għalik.
[Kaxxa f’paġna 7]
Il-Bibbja X’Tgħid?
Mistoqsija:
X’jiġrilhom in-nies tajbin meta jmutu?
Tweġiba:
“Il-mejtin ma jafu assolutament xejn.” —EKKLEŻJASTI 9:5.
Mistoqsija:
In-nies tajbin x’tama għandhom għall-futur?
Tweġiba:
“Ġejja s-siegħa li fiha dawk kollha li qegħdin fl-oqbra tat-tifkira jisimgħu [leħen Ġesù] u joħorġu.”—ĠWANNI 5:28, 29.
Mistoqsija:
Il-biċċa l-kbira min-nies tajbin fejn se jgħixu?
Tweġiba:
“Il-ġusti se jirtu l-art, u jgħammru fiha għal dejjem.”—SALM 37:29.