Ġesù kien jgħix fil-​qasam tal-​ispirti maʼ Missieru “qabel ma kienet teżisti d-​dinja.” (Ġwanni 17:5) Għalhekk, hu kwalifikat sew biex iwieġeb il-​mistoqsijiet li ġejjin.

Huma l-​anġli interessati fina?

▪ Minn Ġesù nitgħallmu li l-​anġli għandhom interess kbir fin-​nies. Hu qal: “Ikun hemm ferħ fost l-​anġli t’Alla minħabba midneb wieħed li jindem.”—Luqa 15:10.

Ġesù rrivela li l-​anġli għandhom ir-​responsabbiltà li jieħdu ħsieb il-​benesseri spiritwali tal-​qaddejja t’Alla. Għalhekk, meta Ġesù wissa lid-​dixxipli tiegħu biex ma jfixklux lil oħrajn, hu qal: “Araw li ma tistmerrux lil xi wieħed minn dawn iċ-​ċkejknin; għax ngħidilkom li l-​anġli tagħhom fis-​sema dejjem jaraw wiċċ Missieri li hu fis-​sema.” (Mattew 18:10) B’dan, Ġesù ma riedx bilfors ifisser li kull wieħed mis-​segwaċi tiegħu għandu anġlu kustodju inkarigat biex jipproteġih. Iżda Ġesù wera li l-​anġli li jaħdmu mill-​qrib m’Alla jinteressahom mill-​membri tal-​kongregazzjoni Kristjana.

 Ix-​Xitan kif jistaʼ jagħmlilna l-​ħsara?

▪ Ġesù wissa lis-​segwaċi tiegħu li Satana jipprova jwaqqaf lin-​nies milli jitgħallmu l-​verità dwar Alla. Hu qal: “Meta xi ħadd jismaʼ l-​kelma tas-​saltna imma ma jifhimhiex, jiġi l-​Ħażin u jaħtaf dak li jkun inżeraʼ f’qalbu.”—Mattew 13:19.

Ġesù kixef mod wieħed kif Satana jqarraq bin-​nies meta rrakkonta tixbiha dwar raġel li żeraʼ ż-​żerriegħa tal-​qamħ fl-​għalqa tiegħu. Ir-​raġel irrappreżenta lil Ġesù, u l-​qamħ irrappreżenta lill-​Kristjani veri li se jaħkmu maʼ Ġesù fis-​sema. Madankollu, Ġesù qal li ġie l-​għadu u “żeraʼ s-​sikrana qalb il-​qamħ.” Is-​sikrana tirrappreżenta lill-​Kristjani foloz. “L-​għadu li żeragħha hu x-​Xitan.” (Mattew 13:25, 39) Sewwasew bħalma s-​sikrana tistaʼ tixbah lill-​qamħ li jkun għadu qed jinbet, hekk ukoll dawk l-​uħud li jsostnu li huma Kristjani jistgħu jidhru li huma aduraturi veri. Reliġjonijiet li jgħallmu duttrini foloz iqarrqu bin-​nies biex ma jobdux lil Alla. Satana juża r-​reliġjon falza biex lin-​nies jisirqilhom il-​ħbiberija tagħhom maʼ Ġeħova.

Kif nistgħu nwaqqfu lil Satana milli jagħmlilna l-​ħsara?

▪ Ġesù sejjaħ lil Satana “l-​ħakkiem tad-​dinja.” (Ġwanni 14:30) F’talba li għamel lil Alla, Ġesù wera kif nistgħu niksbu l-​protezzjoni kontra Satana. Rigward id-​dixxipli tiegħu, Ġesù talab hekk lil Missieru tas-​sema: ‘Ħarishom minħabba l-​Ħażin. M’humiex parti mid-​dinja, bħalma jien m’iniex parti mid-​dinja. Qaddishom permezz tal-​verità; kelmtek hi l-​verità.’ (Ġwanni 17:15-​17) L-​għarfien tal-​Kelma t’Alla jistaʼ jipproteġina mill-​influwenzi tad-​dinja tal-​umanità li qed jaħkem Satana.

L-​anġli kif jeffettwawna llum?

▪ “Fil-​konklużjoni tas-​sistema,” Ġesù qal li “l-​anġli joħorġu u jifirdu lin-​nies ħżiena min-​nies sewwa.” (Mattew 13:49) Issa qed ngħixu “fil-​konklużjoni tas-​sistema,” u miljuni taʼ nies qed jaċċettaw l-​aħbar tajba tas-​Saltna t’Alla.—Mattew 24:3, 14.

Iżda mhux kull min jibda jistudja l-​Kelma t’Alla jikseb l-​approvazzjoni tiegħu. L-​anġli jidderieġu x-​xogħol tal-​qaddejja taʼ Ġeħova, u n-​nies li sinċerament iħobbu lil Alla jiġu separati minn dawk li ma jridux japplikaw dak li jitgħallmu. Ġesù ddeskriva lil dawk li jiksbu l-​approvazzjoni t’Alla billi qal: “Dawn huma dawk li, wara li jisimgħu l-​kelma b’qalb nobbli u tajba, iżommuha u jagħtu l-​frott bis-​sabar.”—Luqa 8:15.

Għal iktar informazzjoni, ara kapitlu 10 taʼ dan il-​ktieb, Il-​Bibbja x’Tgħallem Verament? pubblikat mix-​Xhieda taʼ Ġeħova.

[Stampa f’paġna 24]

L-​anġli għandhom irwol f’li jiġbru lin-​nies sinċieri fil-​kongregazzjoni Kristjana