ĦAFNA jaqblu li waħda mill-​iktar affarijiet taʼ ferħ fil-​ħajja hi t-​twelid taʼ tarbija. Il-​Bibbja tiddeskrivi lit-​tfal bħala “premju” mingħand Alla. (Salm 127:3) Ġenituri ġodda bħal Charles u Mary jafu wkoll li t-​tfal jistgħu jbiddlu żwieġ b’modi mhux mistennijin. Pereżempju, omm ġdida forsi tiffoka fuq it-​tarbija tagħha u tistgħaġeb kif ġisimha u qalbha jwieġbu għall-​iċken bżonn tat-​tarbija. Inkwantu għall-​missier ġdid, għandu mnejn jimmeravilja ruħu bir-​rabta li tifforma bejn martu u t-​tarbija, imma jistaʼ jkun li jinkwieta wkoll li f’daqqa waħda se jitwarrab.

Infatti, it-​twelid tal-​ewwel tarbija jistaʼ joħloq kriżi fi żwieġ. Jistgħu jinkixfu l-​inċertezzi emozzjonali taʼ individwu u l-​kwistjonijiet mhux solvuti taʼ koppja, u dawn jistgħu jsiru iktar evidenti minħabba l-​istress li jħossu bħala ġenituri.

Ġenituri ġodda kif jistgħu jaġġustaw ruħhom għall-​ewwel ftit xhur imħabbtin meta t-​tarbija l-​ġdida tirrikjedi l-​attenzjoni kollha tagħhom? Koppja x’tistaʼ tagħmel biex iżżomm ir-​relazzjoni mill-​qrib tagħha? Kif jistgħu jittrattaw kwalunkwe nuqqas taʼ qbil dwar kif irrabbu t-​tfal? Ejja neżaminaw kull waħda minn dawn l-​isfidi u nikkunsidraw kif prinċipji Bibliċi jistgħu jgħinu lil koppja tegħlibhom.

L-​omm tuża l-​ħin u l-​ħsibijiet kollha tagħha għat-​tarbija l-​ġdida. Hi għandha mnejn tħoss  sens profond taʼ sodisfazzjon emozzjonali hekk kif tieħu ħsieb it-​tarbija tagħha. Sadanittant, żewġha forsi jħoss li qed jiġi traskurat. Manuel, li jgħix fil-​Brażil, jgħid: “L-​iktar bidla diffiċli għalija biex naċċettaha kienet li marti ma baqgħetx tiffoka fuqi imma fuq it-​tarbija tagħna. Qabel, konna aħna t-​tnejn biss, u mbagħad f’daqqa waħda, kienu biss marti u t-​tarbija.” Kif tistaʼ tkampa maʼ din il-​bidla?

Muftieħ għal suċċess: Kunu paċenzjużi.

“L-​imħabba tistabar fit-​tul u qalbha tajba,” tgħid il-​Bibbja. L-​imħabba “ma tfittixx l-​interessi tagħha, ma tiġix provokata.” (1 Korintin 13:4, 5) Meta titwieled tarbija ġdida, x’jistgħu jagħmlu kemm ir-​raġel u kemm il-​mara biex japplikaw dawn il-​pariri?

Raġel għaqli jagħti prova taʼ mħabbtu għal martu billi jitgħallem dwar l-​effett fiżiku u mentali li t-​twelid taʼ tarbija jkollu fuq mara. Jekk jagħmel dan, hu se jirrealizza għala martu għandha mnejn tbati minn bidliet f’daqqa fil-​burdata. b Adam, li jgħix fi Franza u li hu missier taʼ tifla li għandha 11-​il xahar, jammetti: “Kultant hu diffiċli għalija biex inkampa mal-​bidliet fil-​burdata taʼ marti. Imma nipprova niftakar li fir-​realtà mhijiex frustrata minħabba fija personalment. Minflok, tħossha hekk minħabba t-​tensjoni mhix familjari tas-​sitwazzjoni l-​ġdida tagħna.”

Martek ġieli tifhem ħażin l-​isforzi tiegħek biex tagħti daqqa t’id? Jekk iva, tkunx ħafif biex tieħu għalik. (Ekkleżjasti 7:9) Minflok, kun paċenzjuż u pprova poġġi l-​bżonnijiet tagħha l-​ewwel, u mhux tiegħek, u b’hekk se tevita li jaqbduk id-​dwejjaq.—Proverbji 14:29.

Mill-​banda l-​oħra, mara għaqlija se tipprova tinkuraġġixxi lil żewġha fl-​irwol ġdid tiegħu. Se tinvolvih f’li jieħdu ħsieb it-​tarbija, billi bil-​paċenzja turih kif ibiddel il-​ħrieqi jew jipprepara l-​ħalib—avolja għall-​ewwel forsi jidher xi ftit goff.

Ellen, omm taʼ 26 sena, għarfet li kellha bżonn tagħmel xi aġġustamenti fil-​mod kif kienet tittratta lil żewġha. “Kelli nsir inqas pussessiva tat-​tarbija,” tgħid hi. “U kelli nfakkar lili nnifsi biex ma nkunx fitta żżejjed meta żewġi pprova japplika s-​suġġerimenti tiegħi dwar kif jieħu ħsieb it-​tarbija.”

Eżawriti minħabba rqad imkisser u kriżijiet mhux mistennijin, ħafna ġenituri ġodda jissieltu biex jibqgħu qrib xulxin. Vivianne, omm Franċiża taʼ żewġt itfal, tammetti: “Għall-​ewwel, tant kont iffokata fuq id-​dmir tiegħi bħala omm li kważi nsejt l-​irwol tiegħi bħala mara miżżewġa.”

Min-​naħa l-​oħra, raġel forsi jonqos milli jirrikonoxxi li t-​tqala kellha effett fuq martu—kemm fiżikament kif ukoll emozzjonalment. Tarbija ġdida tistaʼ tieħu l-​ħin u l-​enerġija li qabel it-​tnejn li intom kontu tużaw biex tibqgħu intimi emozzjonalment u sesswalment. Allura, koppja kif tistaʼ tagħmel ċert li t-​tarbija tagħhom li tiddependi minnhom u li hi tant għażiża ma ssirx dik il-​ħaġa li tifridhom minn xulxin?

 Muftieħ għal suċċess: Erġgħu stqarru mħabbitkom għal xulxin.

Rigward iż-​żwieġ, il-​Bibbja tgħid: “Raġel iħalli lil missieru u lil ommu u jrid jingħaqad maʼ martu u huma jsiru ġisem wieħed.” c (Ġenesi 2:24) L-​iskop t’Alla Ġeħova kien li t-​tfal eventwalment iħallu lill-​ġenituri tagħhom. B’kuntrast, Alla jistenna li r-​rabta taʼ ġisem wieħed bejn raġel u martu tibqaʼ tul ħajjithom kollha. (Mattew 19:3-​9) Il-​fatt li japprezzaw dan, kif jistaʼ jgħin lil koppja b’tarbija ġdida jżommu prijoritajiet xierqa?

Vivianne, li ġiet kwotata qabel, tgħid: “Ħsibt dwar il-​kliem f’Ġenesi 2:24, u dan il-​vers għenni nirrealizza li kont sirt ‘ġisem wieħed’ maʼ żewġi—mhux mat-​tarbija tiegħi. Rajt il-​ħtieġa li nsaħħaħ iż-​żwieġ tagħna.” Theresa, omm taʼ tifla li għandha sentejn, tgħid: “Jekk nibda nħossni mbiegħda minn żewġi, minnufih nagħmel sforz biex nagħtih l-​attenzjoni sħiħa tiegħi, anki jekk biss għal ftit ħin kuljum.”

Jekk int raġel miżżewweġ, x’tistaʼ tagħmel biex issaħħaħ iż-​żwieġ? Għid lil martek li tħobbha. Kliemek appoġġah b’għemejjel teneri. Agħmel sforz kuxjenzjuż biex ittaffi kwalunkwe inċertezza li jistaʼ jkollha martek. Sarah, omm li għandha 30 sena, tgħid: “Mara miżżewġa għandha bżonn tkun taf li għadha meqjusa taʼ valur u li hi maħbuba, avolja ġisimha m’għadux dak li kien qabel it-​tqala tagħha.” Alan, li jgħix fil-​Ġermanja u li hu missier taʼ żewġ subien, jara l-​ħtieġa li jipprovdi appoġġ emozzjonali. Hu jgħid: “Jien dejjem nipprova nfarraġ lil marti meta tkun qed tħossha mdejqa.”

M’għandniex xi ngħidu, it-​twelid taʼ tarbija jfixkel ir-​relazzjoni sesswali taʼ koppja. Għalhekk, raġel u mara għandhom bżonn jiddiskutu l-​bżonnijiet taʼ xulxin. Il-​Bibbja tgħid li bidliet fir-​relazzjoni sesswali taʼ koppja għandhom isiru ‘għax ikunu ftiehmu bejniethom.’ (1 Korintin 7:1-​5) Dan jirrikjedi komunikazzjoni. Skont it-​trobbija jew l-​isfond kulturali tiegħek, forsi ma tħossokx daqstant komdu tiddiskuti kwistjonijiet sesswali mas-​sieħeb jew is-​sieħba tiegħek. Imma dawn il-​konversazzjonijiet huma vitali hekk kif koppja jaġġustaw ruħhom għar-​rutina tagħhom bħala ġenituri. Uru empatija, paċenzja, u onestà. (1 Korintin 10:24) B’hekk, int u s-​sieħeb, jew is-​sieħba, tiegħek se tevitaw li jkun hemm nuqqas taʼ ftehim u se tkabbru mħabbitkom għal xulxin.—1 Pietru 3:7, 8.

Koppja jistgħu wkoll ikabbru l-​imħabba li jħossu għal xulxin billi jesprimu l-​apprezzament. Raġel għaqli se jirrealizza li ħafna mix-​xogħol li tagħmel omm ġdida ma jkunx jidher. Vivianne tgħid: “Sal-​aħħar tal-​ġurnata, spiss inħossni qisni m’għamilt xejn—avolja ma nkunx waqaft nieħu ħsieb it-​tarbija!” Minkejja li jkollha ħafna x’tagħmel, mara għaqlija se toqgħod attenta li ma ċċekkinx il-​kontribut taʼ żewġha fil-​familja.—Proverbji 17:17.

Koppja jistgħu jsibu li t-​trobbija tagħhom iġġegħelhom jargumentaw. Omm Ġappuniża jisimha Asami u żewġha, Katsuro, iffaċċjaw din l-​isfida. Asami tgħid: “Jien ħassejt li Katsuro kien ħanin wisq maʼ bintna, filwaqt li hu ħass li jien kont iebsa wisq magħha.” Kif tistgħu tevitaw li taħdmu kontra xulxin?

Muftieħ għal suċċess: Ikkomunika mas-​sieħeb jew is-​sieħba tiegħek, u appoġġaw lil xulxin.

Is-​sultan għaref Salamun kiteb: “Bil-​prużunzjoni wieħed iġib biss taqbid, imma l-​għerf qiegħed maʼ dawk li jikkonsultaw flimkien.” (Proverbji 13:10) Kemm tafu dwar il-​metodu tas-​sieħeb jew is-​sieħba tagħkom rigward it-​trobbija tat-​tfal? Jekk toqogħdu tistennew sakemm titwieled it-​tarbija tagħkom qabel ma tiddiskutu kwistjonijiet speċifiċi dwar it-​taħriġ tat-​tfal, tistgħu tispiċċaw tissieltu maʼ xulxin minflok ma tittrattaw mal-​isfida b’suċċess.

Pereżempju, fuq liema tweġibiet għall-​mistoqsijiet li ġejjin qbiltu: “Kif nistgħu ngħallmu lit-​tarbija tagħna drawwiet tajbin fejn jidħlu l-​ikel u l-​irqad? Dejjem għandna nerfgħu t-​tarbija meta tibki billejl? Kif għandna nirreaġixxu għad-​diffikultajiet li jqumu meta nħarrġu lit-​tarbija biex taqtaʼ l-​ħarqa?” Ovvjament, id-​deċiżjonijiet li tieħdu se jkunu differenti minn dawk taʼ koppji oħrajn. Ethan, missier taʼ żewġt itfal, jgħid: “Tridu titkellmu dwar l-​affarijiet sabiex tkunu fi qbil. Imbagħad, flimkien, se tkunu tistgħu twieġbu għall-​bżonnijiet tat-​tarbija tagħkom.”

Sewwasew bħalma tnejn min-​nies bla esperjenza fl-​iskejzjar jeħtieġu ż-​żmien u l-​paċenzja biex isibu l-​bilanċ tagħhom fuq is-​silġ, intom għandkom bżonn iż-​żmien biex taġġustaw ruħkom għall-​irwoli ġodda tagħkom bħala ġenituri. Però, eventwalment, se tħossukom iktar kunfidenti.

It-​trobbija tat-​tfal se tittestja r-​rabta taż-​żwieġ tagħkom u tbiddel ir-​relazzjoni tagħkom maʼ xulxin għal dejjem. Madankollu, se tagħtikom ukoll l-​opportunità biex tiżviluppaw kwalitajiet taʼ valur. Jekk tapplikaw il-​pariri għaqlin tal-​Bibbja, l-​esperjenza tagħkom se tkun bħal dik taʼ missier jismu Kenneth. Hu jgħid: “It-​trobbija tat-​tfal kellha effett tajjeb fuqi u fuq marti. Issa m’aħniex daqshekk egoisti, u sirna nħobbu u nifhmu iktar lil xulxin.” Dawn it-​tipi taʼ bidliet ċertament li huma taʼ min jixtieqhom fi żwieġ.