▪ Diversi reliġjonijiet jiddeskrivu lil Alla bħala li hu omnipreżenti, kelma li tagħti x’tifhem li Alla jinsab kullimkien fl-​istess ħin. Pereżempju, enċiklopedija bl-​Ingliż (New Catholic Encyclopedia) tirreferi għal Alla bħala l-​wieħed “li hu attwalment preżenti f’kull post u ħaġa li teżisti.” Bl-​istess mod, John Wesley, fundatur tal-​Knisja Metodista, kiteb prietka intitolata “Dwar l-​Omnipreżenza t’Alla” li fiha qal li “m’hemm l-​ebda post fl-​ispazju, kemm fil-​limiti tal-​ħolqien u kemm le, fejn Alla mhux qiegħed.”

Il-​Bibbja x’tgħallem? Huwa Alla omnipreżenti, jiġifieri, jeżisti f’kull post fis-​sema, fuq l-​art, u anke fil-​bnedmin fl-​istess ħin?

Fil-​fatt, il-​Bibbja titkellem dwar Alla bħala li għandu post speċifiku fejn jgħammar—is-​smewwiet. Fil-​Bibbja hemm imniżżel talba tas-​Sultan Salamun li fiha talab lil Alla: ‘Ismaʼ mis-​smewwiet, il-​post stabbilit fejn tgħammar.’ (1 Slaten 8:43) Meta Ġesù Kristu għallem lid-​dixxipli tiegħu kif jitolbu, hu qalilhom jindirizzaw it-​talb tagħhom lil “Missierna fis-​smewwiet.” (Mattew 6:9) Wara l-​irxoxt tiegħu, il-​Bibbja tgħid li Kristu daħal “fis-​sema stess, biex issa jidher għalina quddiem il-​persuna t’Alla.”—Ebrej 9:24.

Dawn il-​versi juru biċ-​ċar li Alla Ġeħova ma jgħammarx kullimkien imma fis-​smewwiet biss. M’għandniex xi ngħidu, “is-​smewwiet” imsemmijin f’dawn il-​versi ma jirreferux għall-​atmosfera taʼ madwar id-​dinja u lanqas ma jirreferu għall-​kobor enormi tal-​ispazju. Is-​smewwiet fiżiċi ma jistgħux jesgħu lill-​Ħallieq tal-​univers. (1 Slaten 8:27) Il-​Bibbja tgħidilna li “Alla hu Spirtu.” (Ġwanni 4:24) Hu jgħammar fis-​smewwiet spiritwali, qasam indipendenti mill-​univers fiżiku.—1 Korintin 15:44.

Imma, xi ngħidu għas-​siltiet tal-​Bibbja li donnhom jagħtu x’tifhem li Alla hu preżenti kullimkien? Pereżempju, bħalma hu mniżżel f’​Salm 139:7-​10, David jgħid dwar Alla: “Fejn nistaʼ mmur ’il bogħod mill-​ispirtu tiegħek, u fejn nistaʼ naħrab minn quddiem wiċċek? Kieku kelli nitlaʼ fis-​sema, hemmhekk tkun int; u kieku kelli nifrex soddti fil-​Qabar, ara, int tkun hemmhekk. Kieku kelli nieħu ġwinħajn iż-​żerniq, biex ngħammar fl-​iktar baħar imbiegħed, hemmhekk, ukoll, idek tmexxini.” Jindikaw dawn il-​versi li Alla fil-​fatt hu omnipreżenti u jgħammar f’kull wieħed mill-​postijiet imsemmijin?

Innota li David l-​ewwel staqsa: “Fejn nistaʼ mmur ’il bogħod mill-​ispirtu tiegħek?” a Permezz tal-​ispirtu qaddis tiegħu, Alla jistaʼ jara kwalunkwe ħaġa u jeżerċita l-​qawwa tiegħu fi kwalunkwe post, mingħajr ma letteralment imur f’dak il-​post jew jgħammar hemm. Biex nagħtu eżempju: Fi snin reċenti xjenzati setgħu jeżaminaw il-​ħamrija fuq il-​pjaneta Marte, miljuni taʼ kilometri ’l bogħod mill-​Art. Kif? Mhux billi jivvjaġġaw hemm personalment imma billi jistudjaw ritratti dettaljati u informazzjoni oħra mibgħuta lura lejn l-​Art minn vetturi spazjali għal esplorazzjoni li ntbagħtu fuq wiċċ Marte.

Bl-​istess mod, Alla Ġeħova m’għandux għalfejn ikun preżenti kullimkien, jew ikun omnipreżenti, sabiex ikun jaf x’qed jiġri fi kwalunkwe post fl-​univers. Il-​Kelma t’Alla tgħid: “M’hemm l-​ebda ħolqien li hu moħbi quddiemu.” (Ebrej 4:13) Iva, il-​forza attiva b’saħħitha taʼ Ġeħova, jew l-​ispirtu qaddis, tistaʼ tilħaq kullimkien, u b’hekk tħallih jara kollox u jwettaq l-​iskop tiegħu minn post fiss, ‘il-​post qaddis fejn jgħammar’ fis-​smewwiet.—Dewteronomju 26:15.

[Nota taʼ taħt]

[Sors tal-Istampa f’paġna 29]

IAC/RGO/David Malin Images