3 Alla Jagħmel Vendetta—Huwa Minnu Dan?
Dak li għandek mnejn smajt: “Alla jżomm kont taʼ kull dnub u jħallas lura lin-nies b’kastig dejjiemi fin-nar tal-infern.”
“Alla jikkastiga lill-midinbin b’diżastri naturali.”
Dak li tgħallem il-Bibbja: It-2 Pietru 3:9 jgħid li Ġeħova “ma jixtieqx li xi ħadd jinqered imma jixtieq li kulħadd jasal għall-indiema.” Minflok ma jiffoka fuq l-iżbalji tagħna, hu jiffoka fuq il-kwalitajiet tajbin tagħna. Għajnejn Alla “jiġru ’l hemm u ’l hawn maʼ l-art kollha biex juri s-saħħa tiegħu għan-nom taʼ dawk li qalbhom hi sħiħa lejh.”—2 Kronaki 16:9.
In-nar tal-infern mhuwiex tagħlim Bibliku—l-idea nfisha taʼ turment etern hi mistkerrha għal Alla. L-akbar kastig tiegħu għal dawk mill-agħar hu li jiħdilhom l-għotja tal-ħajja. (Ġeremija 7:31; Rumani 6:7) U d-diżastri naturali, li jeqirdu kif ġie ġie, mhumiex atti t’Alla imma, minflok, huma ġrajjiet mhux mistennijin li jistgħu jeffettwaw lil kulħadd.—Ekkleżjasti 9:11.
Kif jgħinek il-fatt li tkun taf il-verità: Nistgħu nersqu eqreb lejn Alla meta nirrikonoxxu li hu ‘lest li jaħfer’ u mhux ħafif biex jikkundanna. (Salm 86:5) M’għandniex naqdu lil Alla minħabba li nħossuna ħatjin jew għax nibżgħu ħafna mill-kastig. Minflok, nistgħu nibnu l-fidi tagħna bl-aqwa motiv—imħabba għal Ġeħova. Imħabba bħal din isservi bħala qawwa inkuraġġanti li tqanqalna biex nagħmlu l-aħjar li nistgħu biex nogħġbuh.—Mattew 22:36-38; 1 Ġwanni 5:3.
Filwaqt li Alla jixtieq li kulħadd jagħmel it-tajjeb, hu jaf li ħafna qatt ma se jagħmlu hekk. Jekk hu qatt ma jaġixxi kontra dawk li huma determinati li jagħmlu affarijiet ħżiena, allura jkun l-istess bħal ħakkiem li jagħmel liġijiet mingħajr ma jinforzahom, u b’hekk iħalli l-inġustizzja u t-tbatija joktru għal dejjem. (Ekkleżjasti 8:11) Il-fatt li nafu li Alla mhux se jittollera l-ħażen għal dejjem jagħtina tama soda għall-futur. Alla wiegħed li jneħħi lil dawk li jibqgħu jagħmlu għemejjel ħżiena, sabiex “il-ġwejdin” ikunu jistgħu jgawdu ħajja taʼ dejjem fuq l-art bħalma ried oriġinarjament.—Salm 37:10, 11, 29. a
[Nota taʼ taħt]
a Biex issir taf iktar dwar kif Alla se jagħmel l-art ġenna, ara kapitli 3 u 8 tal-ktieb Il-Bibbja X’Tgħallem Verament?
[Kumment f’paġna 6]
Irid Alla li nqimuh għax nibżgħu mill-kastig?
[Sors tal-Istampa f’paġna 6]
Tinqix minn Doré