Se Tispiċċa l-Art fl-2012?
Il-Qarrejja Tagħna Jistaqsu . . .
▪ “Raħal Franċiż jimtela b’nies li jemmnu li ġej apokalissi . . . Huma jemmnu li d-dinja se tispiċċa fil-21 taʼ Diċembru, 2012, it-tmiem taʼ perijodu taʼ 5,125 sena fil-kalendarju tal-qedem tal-Maja.”—BBC News.
Minkejja t-tbassir minn mexxejja reliġjużi li jgħidu lin-nies li d-dinja se tintemm, minn uħud li jqisu lilhom infushom xjenzati, u minn oħrajn li jħabbru x’se jiġri fil-futur, l-art se tibqaʼ teżisti għal żmien twil ħafna. Iva, l-art mhix se tispiċċa fl-2012. Fil-fatt, il-pjaneta Art mhux talli se tibqaʼ teżisti wara din is-sena imma wkoll wara kull sena li tiġi warajha.
Il-Bibbja tgħidilna: “Ġenerazzjoni tmur u oħra tiġi, imma l-art tibqaʼ għal dejjem.” (Koħèlet 1:4, Għaqda Biblika Maltija) Ukoll, ikkunsidra xi jfisser Isaija 45:18: “Hekk qal Ġeħova, . . . Dak li sawwar l-art u li għamilha, Hu li stabbiliha fis-sod, li ma ħalaqhiex sempliċement għalxejn, li sawwarha biex tkun abitata: ‘Jien Ġeħova, u m’hemm ħadd ieħor.’”
Sejjer missier li jħobb, iqattaʼ ħafna sigħat jiddisinja u jibni dgħajsa żgħira ħalli ibnu jieħu gost jilgħab biha biex imbagħad ikissirha ftit wara li jagħtihielu? Kieku jkun kattiv! Bl-istess mod, Alla ħalaq l-art primarjament biex jieħu gost biha l-ħolqien uman tiegħu. Lill-ewwel koppja umana, Adam u Eva, Alla qalilhom: “Nisslu u oktru u imlew l-art u rażżnuha.” Wara dan, “Alla ra kulma kien għamel, u, ara, kien tajjeb ħafna.” (Ġenesi 1:27, 28, 31) Alla ma abbandunax l-iskop tiegħu għall-art; mhux se jħalli l-art tinqered. Rigward dak kollu li wiegħed, Ġeħova b’enfasi qal: “[Kelmti] ma terġax lura lejja mingħajr riżultati, imma żgur tagħmel dak li jogħġobni, u żgur tirnexxi f’dak li bgħattha tagħmel.”—Isaija 55:11.
Madankollu, hija r-rieda taʼ Ġeħova li ‘jeqred lil dawk li qed jeqirdu l-art.’ (Rivelazzjoni 11:18) Fil-Kelma tiegħu, jagħmel din il-wegħda: “Huma r-retti li se jgħammru fuq l-art, u dawk bla ħtija se jibqgħu fiha. Rigward in-nies mill-agħar, dawn se jitqaċċtu mill-art; u t-tradituri jinqalgħu minnha.”—Proverbji 2:21, 22.
Dan meta se jseħħ? Ebda bniedem ma jaf. Ġesù qal: “Imma dak il-jum u s-siegħa ma jafhom ħadd, la l-anġli fis-sema u lanqas l-Iben, ħlief il-Missier.” (Marku 13:32) Ix-Xhieda taʼ Ġeħova ma jipprovawx ibassru meta Alla se jeqred lin-nies mill-agħar. Għalkemm huma attenti għas-“sinjal” tat-tmiem u jemmnu li l-umanità qed tgħix fl-“aħħar jiem” imsemmijin fil-Bibbja, ma jistgħux ikunu jafu eżattament meta se jseħħ “it-tmiem.” (Marku 13:4-8, 33; 2 Timotju 3:1) Dan iħalluh f’idejn Missierhom tas-sema u Ibnu.
Sadanittant, ix-Xhieda taʼ Ġeħova jkollhom ħafna x’jagħmlu fl-ippritkar tal-aħbar tajba dwar is-Saltna t’Alla. Din hi l-gvern tas-sema li se jaħkem u jbiddel il-pjaneta Art f’ġenna paċifika, waħda li ‘l-ġusti se jirtu, u jgħammru fiha għal dejjem.’—Salm 37:29.
[Sors tal-Istampa f’paġna 10]
Image Science and Analysis Laboratory, NASA-Johnson Space Center