Tgħallem mill-​Kelma t’Alla

Dan l-​artiklu jqajjem mistoqsijiet li forsi ġieli ħsibt dwarhom u juri fejn tistaʼ ssib it-​tweġibiet fil-​Bibbja tiegħek. Ix-​Xhieda taʼ Ġeħova jieħdu pjaċir jiddiskutu dawn it-​tweġibiet miegħek.

1. Xi tfisser il-​magħmudija Kristjana?

Il-​magħmudija hija mod kif titlob lil Alla biex ikollok relazzjoni tajba miegħu. Allura, Kristjan m’għandux jitgħammed meta jkun tarbija, imma meta jkun kiber biżżejjed biex jitgħallem dwar Alla u jsir dixxiplu taʼ Ġesù. (Atti 8:12; 1 Pietru 3:21) Insiru dixxipli taʼ Ġesù meta nitgħallmu u nagħmlu l-​affarijiet li ordnalna.—Aqra Mattew 28:19, 20.

Fi żmien l-​appostli taʼ Ġesù, ħafna wħud ħadu azzjoni mingħajr dewmien sabiex jitgħallmu dwar Alla u Ġesù. Pereżempju, meta raġel tgħallem li l-​mewt taʼ Ġesù kienet fetħet it-​triq għas-​salvazzjoni, hu mill-​ewwel sar dixxiplu. Illum, ħafna wħud sinċieri għażlu li jsiru segwaċi taʼ Ġesù.—Aqra Atti 8:26-​31, 35-​38.

2. Ġesù għala tgħammed?

Ġesù kellu xi 30 sena meta Ġwanni l-​Għammied għaddsu fl-​ilma tax-​Xmara Ġordan. Il-​magħmudija taʼ Ġesù rrappreżentat id-​deċiżjoni tiegħu li jagħmel ir-​rieda t’Alla għalih. (Ebrej 10:7) Dan kellu jinkludi li jagħti ruħu bħala sagrifiċċju għad-​dnubiet tal-​umanità. Anki qabel ma niżel mis-​sema biex jgħix fuq l-​art, Ġesù dejjem ħabb u obda lil Missieru, Ġeħova.—Aqra Marku 1:9-​11; Ġwanni 8:29; 17:5.

  3. Kristjan għala għandu jitgħammed?

Is-​sitwazzjoni tagħna hi differenti minn dik taʼ Ġesù—aħna nitwieldu midinbin. Imma l-​mewt taʼ Ġesù bħala sagrifiċċju tagħmilha possibbli għalina biex ikollna relazzjoni tajba m’Alla. (Rumani 5:10, 12; 12:1, 2) Fil-​fatt, huwa possibbli għalina li nappartjenu lilu bħala parti mill-​familja tiegħu. (2 Korintin 6:18) Kif nistgħu niksbu dan il-​privileġġ? F’talb privat, aħna niddedikaw lilna nfusna lil Ġeħova, billi nwiegħdu li nagħmlu r-​rieda tiegħu għall-​kumplament taʼ ħajjitna. Wara li nagħmlu dedikazzjoni bħal din, nissimbolizzawha fil-​pubbliku billi nitgħammdu.—Aqra Mattew 16:24; 1 Pietru 4:2.

4. Int kif tistaʼ tipprepara ruħek għall-​magħmudija?

Ix-​Xhieda taʼ Ġeħova jistudjaw il-​Bibbja maʼ kull min irid jersaq qrib lejn Alla. L-​istudju tal-​Bibbja u l-​attendenza għal-​laqgħat Kristjani se jsaħħu l-​imħabba tiegħek għal Alla u l-​fidi tiegħek fih. Se jgħinuk ukoll trawwem attitudnijiet u drawwiet tajbin. Billi tiżviluppa l-​imħabba, il-​fidi, u kwalitajiet divini oħrajn se tiġi megħjun biex tgħix fi qbil mal-​wegħda tiegħek li taqdi lil Ġeħova għal dejjem.—Aqra Ġwanni 17:3; Ebrej 10:24, 25.

Għal iktar informazzjoni, ara kapitlu 18 taʼ dan il-​ktieb, Il-​Bibbja X’tgħallem Verament?, li hu ppubblikat mix-​Xhieda taʼ Ġeħova.