Ix-​Xhieda taʼ Ġeħova jagħmlu l-​almu tagħhom biex jegħlbu kulma joħloq firda bejn in-​nies. Huma jsegwu l-​prinċipju li hemm fil-​kliem li Ġesù qal lid-​dixxipli tiegħu: “Intom ilkoll aħwa.” (Mattew 23:8) Dan jidher sew f’żewġ postijiet tal-​qima tax-​Xhieda—wieħed fil-​Portugall u l-​ieħor fi Spanja.

IL-​BELT taʼ Valença do Minho, li hi mdawra bis-​swar u tinsab fit-​Tramuntana tal-​Portugall, inbniet matul perijodu perikoluż. Is-​swar tagħha jagħtu għal fuq ix-​Xmara Minho, il-​fruntiera bejn Spanja u l-​Portugall. Fuq in-​naħa l-​oħra tax-​xmara hemm il-​belt Spanjola taʼ Tui, b’katidral li jidher qisu fortizza. Is-​swar ewlenin taʼ Tui u Valença nbnew fis-​seklu 17 meta Spanja u l-​Portugall kienu qed jiggwerraw.

Fl-​1995, l-​għases tal-​fruntiera bejn dawn iż-​żewġ pajjiżi tal-​Unjoni Ewropea saru xi ħaġa tal-​passat. Imma hemm bżonn iktar milli tneħħi l-​għases tal-​fruntieri biex tgħaqqad lin-​nies. Hemm bżonn bidla fl-​imħuħ u l-​qlub. F’Valença hemm bini żgħir u sabiħ li juri kif l-​ostakli bejn in-​nies jistgħu jingħelbu. Huwa post taʼ qima, Sala tas-​Saltna tax-​Xhieda taʼ Ġeħova, li jintuża minn żewġ kongregazzjonijiet, waħda Spanjola u oħra Portugiża.

Din l-​istorja bdiet fl-​2001, meta x-​Xhieda f’Tui kellhom bżonn Sala tas-​Saltna ġdida. Kellhom jitilqu mill-​post li kienu jikru, u ma kellhomx biżżejjed flus biex jibnu sala ġdida. Lanqas ma kienu jaffordjaw jikru xi mkien ieħor, għax il-​kongregazzjoni ma kinitx waħda kbira. Allura dawn ix-​Xhieda Spanjoli staqsew lil ħuthom Portugiżi f’Valença jekk setgħux jużaw is-​sala tagħhom, li kienet ftit kilometri ’l bogħod miċ-​ċentru taʼ Tui.

Eduardo Vila, membru tal-​kongregazzjoni taʼ Tui fi Spanja, jiftakar: “Iddiskutejna d-​deċiżjoni f’laqgħa f’Diċembru, 2001. Meta tlaqt mil-​laqgħa, irrealizzajt li Ġeħova kien mess il-​qalb taʼ ħutna Portugiżi. Kienu għamlu  sagrifiċċji kbar biex jibnu Sala tas-​Saltna sabiħa, u l-​fidi tagħna ssaħħet meta rajna li kienu lesti jaqsmu magħna dak li kellhom.”

Américo Almeida, Xhud Portugiż li kien preżenti fl-​istess laqgħa, jgħid: “Tajna merħba lill-​aħwa Spanjoli u lqajniehom fis-​Sala tas-​Saltna tagħna. Konna fiduċjużi li Ġeħova kien se jbierek dan l-​arranġament, u d-​deċiżjoni ttieħdet b’mod unanimu.” Ix-​Xhieda miż-​żewġ naħat tal-​fruntiera jingwalawha flimkien. Paolo, Xhud minn Valença, jgħid: “Forsi tinstemaʼ stramba, imma lanqas biss nindunaw li aħna minn żewġ pajjiżi differenti. Sempliċement aħna aħwa spiritwali.”

Waħda mill-​ewwel affarijiet li jinnotaw il-​viżitaturi fis-​Sala tas-​Saltna hi ż-​żewġ arloġġi identiċi fuq il-​ħajt taʼ wara li għandhom ħinijiet differenti minn xulxin. Spanja qegħedha siegħa ’l quddiem mill-​Portugall, imma din hi l-​unika differenza li hemm bejn iż-​żewġ kongregazzjonijiet. Meta l-​bini kellu bżonn xi rinovazzjoni, Kumitat Reġjonali tal-​Bini fi Spanja ħa ħsieb il-​ħaddiema entużjasti miż-​żewġ kongregazzjonijiet. Paolo jiftakar: “Ġew ħafna ħaddiema tas-​sengħa minn Spanja biex jgħinuna. Xi wħud ġew minn 160 kilometru ’l bogħod. Il-​proġett kompla jgħaqqadna u jkattar l-​imħabba bejnietna.”

 Ejja nikkunsidraw eżempju ieħor taʼ kif l-​isfidi tal-​fruntieri ġew megħlubin.

Unità f’Wied Maqsum

Puigcerdá hi belt Spanjola mal-​fruntiera taʼ Franza. Tinsab f’qalb wied fertili mdawwar bil-​qċaċet għoljin tal-​muntanji Pirinej. Il-​wied kollu, li hu magħruf bħala Cerdaña, darba kien jagħmel parti minn Spanja. Imma fl-​1659, fi trattat taʼ paċi msejjaħ it-​Trattat tal-​Pirinej, Spanja tat nofs il-​wied lil Franza.

Illum il-​ġurnata, il-​Franċiżi jmorru jixtru f’Puigcerdá, il-​belt prinċipali tal-​wied. U mill-​1997, ix-​Xhieda taʼ Ġeħova f’Puigcerdá wkoll fetħu l-​bibien tas-​Sala tas-​Saltna tagħhom lil ħuthom Franċiżi. F’dik is-​sena, ix-​Xhieda Franċiżi kellhom jitilqu mill-​post li kienu jikru. L-​iktar Sala tas-​Saltna fil-​viċin fi Franza kienet siegħa ’l bogħod bil-​karozza, u matul ix-​xhur tax-​xitwa t-​triq li kellhom jgħaddu minnha, li kienet tgħaddi mill-​muntanji għoljin, spiss tkun magħluqa minħabba l-​borra.

Meta x-​Xhieda Franċiżi spjegaw il-​bżonn urġenti li kellhom għal post fejn jiltaqgħu, ix-​Xhieda Spanjoli mill-​ewwel offrew is-​Sala tas-​Saltna tagħhom stess. Prem, Xhud lokali, jiftakar: “L-​aħwa Spanjoli kollha ħassewhom entużjasti dwar li jaqsmu s-​sala magħhom. Ovvjament, dan l-​ispirtu ġie mit-​taħriġ Skritturali li konna rċivejna tul is-​snin. Xi ħmistax wara, bdejna naqsmu s-​Sala tas-​Saltna tagħna magħhom, u ilna nagħmlu hekk għal dawn l-​aħħar 13-​il sena.”

“Puigcerdá kien il-​post ideali għalina biex ikollna Sala tas-​Saltna,” jispjega Eric, indokratur fil-​kongregazzjoni Franċiża. “Għadni niftakar il-​merħba mill-​qalb li tatna l-​kongregazzjoni Spanjola. Żejnu s-​sala tagħhom b’bukkett fjuri kbir u b’tabella li kienet tgħid, ‘Nagħtukom merħba, għeżież aħwa.’”

Eric iżid jgħid: “In-​nies ħasbu li l-​fatt li għalaqna s-​Sala tas-​Saltna fi Franza kien ifisser li l-​kongregazzjoni spiċċat. Imma malajr urejna li dan ma kienx minnu permezz tal-​ippritkar regulari tagħna fl-​inħawi, li kien jinkludi t-​tqassim taʼ inviti stampati biex jattendu l-​laqgħat tagħna fi Spanja. Nies interessati jieħdu pjaċir jiġu s-​sala fi Spanja. Iktar minn hekk, il-​fatt li naqsmu sala maʼ ħutna Spanjoli ressaqna eqreb lejn xulxin. Qabel, konna nafu li kien hemm kongregazzjoni Spanjola fuq in-​naħa l-​oħra tal-​fruntiera, imma ma tantx kellna kuntatt magħha. Issa li naraw lil xulxin regolarment, ma nħossuniex daqstant maqtugħin għalina f’dan il-​wied iżolat fil-​muntanji.”

 Kien hemm xi skumdità minħabba d-​differenzi kulturali? “Meta sirt naf li l-​laqgħat tagħna kienu se jinżammu n-​naħa l-​oħra tal-​fruntiera fi Spanja, ħassejtni xi ftit inkwetata,” ammettiet Xhud Franċiża li għandha fuq it-​80 sena. “Imma grazzi għall-​merħba u l-​attitudni dħulija tal-​aħwa f’Puigcerdá, il-​bidla ma ħalqet l-​ebda inkwiet, xejn affattu. Anzi, kienet opportunità biex nuru l-​unità internazzjonali tal-​poplu taʼ Ġeħova.”

Il-​Pedament Għal Iktar Unità

Il-​fundaturi tal-​Unjoni Ewropea stqarrew li l-​pajjiżi membri kienu “determinati li jpoġġu l-​pedamenti għal iktar u iktar unità fost in-​nies tal-​Ewropa.” L-​għases tal-​fruntieri tneħħew fis-​snin 80 u 90 bl-​iskop li jħaffu dan il-​proċess. Imma hemm bżonn li jingħelbu l-​ostakli li hemm fl-​imħuħ ukoll.

Ix-​Xhieda taʼ Ġeħova jaħdmu iebes biex iġibu fix-​xejn il-​preġudizzju u n-​nuqqas taʼ fiduċja. Jifhmu li jkun taʼ benefiċċju li l-​aħwa jkunu minn diversi sfondi u jifhmu li “Alla mhux parzjali.” (Atti 10:34) Fil-​konvenzjonijiet internazzjonali u fis-​Swali tas-​Saltna tagħhom raw “kemm hu tajjeb u sabiħ li l-​aħwa jgħammru flimkien f’unità!” (Salm 133:1) L-​unità li ħadmu għaliha x-​Xhieda minn Valença u Puigcerdá maʼ ħuthom mill-​pajjiżi taʼ ħdejhom hi prova ħajja taʼ dan.

[Kumment f’paġna 23]

“Forsi tinstemaʼ stramba, imma lanqas biss nindunaw li aħna minn żewġ pajjiżi differenti. Sempliċement aħna aħwa spiritwali”

[Kumment f’paġna 24]

“Il-​proġett kompla jgħaqqadna u jkattar l-​imħabba bejnietna”

[Kumment f’paġna 25]

“Kemm hu tajjeb u sabiħ li l-​aħwa jgħammru flimkien f’unità!” SALM 133:1

[Stampa f’paġna 23]

Veduta taʼ Tui u x-​Xmara Minho mill-​belt imdawra bis-​swar taʼ Valença do Minho

[Stampa f’paġna 24]

Ir-​rinovazzjoni tas-​Sala tas-​Saltna

[Stampa f’paġna 25]

Il-​Pirinej u l-​wied Cerdaña

[Stampa f’paġna 25]

Żewġ anzjani miż-​żewġ kongregazzjonijiet, wieħed Spanjol u l-​ieħor Franċiż, li jiltaqgħu fis-​Sala tas-​Saltna f’Puigcerdá