Kont Taf?
X’kien l-artal lil “Alla Mhux Magħruf” li ra l-appostlu Pawlu meta kien Ateni?—Atti 17:23.
▪ Għadd taʼ kittieba Griegi tal-qedem irreferew għal artali bħal dawn. Pereżempju, Pawsanja, storjografu u ġeografu tat-tieni seklu W.K., qal li f’Olimpja kien hemm “artal tal-allat Mhux Magħrufin.” U l-oratur u l-filosfu Filostratu qal li f’Ateni nbnew “artali saħansitra f’ġieħ l-allat mhux magħrufin.”
Dijoġene Lertju, kittieb tat-tielet seklu W.K., jirrakkonta tradizzjoni li tispjega l-oriġini tal-“artali bla isem.” Din l-istorja, li tmur lura sas-sitt jew sas-seba’ seklu Q.K., tgħid kif ċertu Epimenides ħeles lil Ateni minn pesta. Dijoġene jikteb: “Hu [Epimenides] qabad xi nagħaġ . . . u ħadhom fl-Arjopagu; u hemmhekk ħalliehom jimirħu fejn riedu. Ta istruzzjonijiet lil dawk li marru warajhom biex jaraw fejn timtedd kull nagħġa u hemmhekk joffru sagrifiċċju għad-divinità lokali. U b’dan il-mod jingħad li l-pesta spiċċat. Għaldaqstant, saħansitra sal-lum il-ġurnata jistgħu jinstabu artali f’partijiet differenti tal-Attika li ma għandhom ebda isem minqux fuqhom.”
Dizzjunarju dwar il-Bibbja (The Anchor Bible Dictionary) jgħid li raġuni oħra għala nbnew artali lil allat mhux magħrufin setgħet kienet “il-biżaʼ li jittraskuraw il-qima lejn xi alla raġel jew xi alla mara mhix magħrufa, u b’hekk jew ma jirċivux il-barka tad-divinità jew iġibu fuqhom il-korla tiegħu jew tagħha.”
Il-Lhud tal-ewwel seklu għala kienu jistmerru lill-kolletturi tat-taxxa?
▪ Il-kolletturi tat-taxxa qatt ma kienu daqshekk maħbubin min-nies. Madankollu, f’Iżrael tal-ewwel seklu kienu meqjusin fost l-iktar nies mistmerrin u korrotti.
L-awtoritajiet Rumani li kienu jaħkmu f’dak iż-żmien kienu jesiġu taxxi għoljin ħafna mingħand in-nies. Uffiċjali Rumani kienu jiġbru t-taxxa fuq il-proprjetà u fuq kull ras, imma x-xogħol tal-ġbir tad-dazju fuq affarijiet importati, esportati, u merkanzija li tgħaddi mill-pajjiż, tawh lill-individwu li kien lest li joffrilhom l-iktar flus. B’hekk, negozjanti lokali xtraw id-dritt li jiġbru t-taxxi f’ċerti nħawi. Ladarba kienu lesti li jaħdmu għar-Rumani mibgħudin, dawn l-individwi kienu mistmerrin profondament minn Lhud oħrajn. Enċiklopedija tgħid li kienu jqisuhom bħala “tradituri u apostati, imniġġsin bil-kuntatt li spiss kien ikollhom mal-pagani.”—M’Clintock and Strong’s Cyclopædia.
Il-kolletturi tat-taxxa kienu magħrufin sew li kienu diżonesti, u stagħnew minn fuq dahar in-nies taʼ pajjiżhom. Xi wħud esaġeraw il-valur tal-merkanzija li kellha tiġi intaxxata u daħħlu l-profitt fil-but, waqt li oħrajn użaw akkużi foloz biex b’qerq jieħdu l-flus mingħand il-foqra. (Luqa 3:13; 19:8) Minħabba f’hekk, il-Lhud kienu jqiegħdu lill-kolletturi tat-taxxa fl-istess keffa mal-midinbin. Enċiklopedija (The Jewish Encyclopedia) tgħid li “ma kinux kwalifikati biex jaqdu bħala mħallfin jew saħansitra bħala xhieda.”—Mattew 9:10, 11.
[Stampa f’paġna 26]
Artal lil alla mhux magħruf, fdalijiet taʼ pergamu, it-Turkija
[Stampa f’paġna 26]
Skultura rumana li turi kollettur tat-taxxa, it-2 jew it-3 seklu W.K.
[Sors]
Erich Lessing/Art Resource, NY