Ir-rivista li qiegħed taqra bdiet tiġi pubblikata f’Lulju tal-1879. L-affarijiet inbidlu minn dak iż-żmien—u din ir-rivista wkoll. (Ara r-ritratti fuq.) Minn din il-ħarġa, se tinnota iktar tibdil fil-mod kif se jibda jkun imqassam It-Torri tal-Għassa. X’se jkun hemm differenti?

F’ħafna pajjiżi, iktar u iktar nies qed jiksbu informazzjoni onlajn u jħossuhom komdi jagħmlu dan. Billi sempliċement jikklikkjaw, jistgħu jkollhom aċċess għal sorsi taʼ informazzjoni disponibbli biss fuq l-Internet. Ħafna kotba, rivisti, u gazzetti jistgħu jinqraw onlajn.

Peress li ħafna nies iħobbu jaqraw onlajn, dan l-aħħar biddilna kompletament id-dehra tal-Websajt tagħna www.pr418.com billi għamilnieha iktar interessanti u faċli biex tintuża. Kull min iżur is-sit jistaʼ jaqra pubblikazzjonijiet f’iktar minn 430 lingwa. Madankollu, minn dan ix-xahar ’il quddiem, dawk li jżuru l-Websajt tagħna jistgħu jaqraw ukoll artikli magħżulin li kienu jidhru regolarment fir-rivisti stampati tagħna imma li issa se jidhru biss fuq il-Websajt tagħna. *

Ladarba se nippubblikaw iktar artikli onlajn biss, l-edizzjoni għall-pubbliku taʼ It-Torri tal-Għassa se tonqos minn 32 paġna għal 16-il paġna, b’effett minn din il-ħarġa. It-Torri tal-Għassa diġà jiġi pubblikat f’204 lingwa. Minħabba li din ir-rivista se tkun b’inqas paġni, issa jistaʼ jkun possibbli li tiġi tradotta saħansitra b’iktar lingwi.

Hija t-tama tagħna li dan it-tibdil jagħmilha possibbli li nilħqu iktar nies bil-messaġġ tal-Bibbja li jsalva l-ħajjiet. Aħna determinati li nkomplu nipprovdu abbundanza taʼ informazzjoni interessanti u istruttiva—kemm stampata kif ukoll onlajn—li hi taʼ benefiċċju għal ħafna mill-qarrejja tagħna li jirrispettaw il-Bibbja u li jridu jsiru jafu x’tgħallem verament.

Il-Pubblikaturi