Twelidt f’Bilbao, inħawi fejn jgħixu nies tal-klassi tan-nofs, fi Spanja tat-Tramuntana. Kont it-tieni minn erbat itfal. Il-familja tagħna kienet Kattolika devota, u jien kont immur il-quddies kuljum. Taʼ 23 sena sirt għalliema. Domt 40 sena f’din il-vokazzjoni li tant kienet għal qalbi. Fost suġġetti oħra, ħassejtni kburija li kont ngħallem ir-reliġjon Kattolika, u filgħaxijiet kont katekista, ngħallem lill-bniet għall-preċett.

Wara 12-il sena taʼ żwieġ hieni, mietli r-raġel u ħallieni b’erbat ibniet x’nieħu ħsieb. Kien għad għandi 33 sena! Ipprovajt insib konsolazzjoni fil-fidi Kattolika tiegħi, imma kelli xi mistoqsijiet li bqajt inberren fuqhom. Kont ngħid bejni u bejn ruħi: ‘Ladarba Kristu fdiena, il-bnedmin għala jibqgħu jmutu? Għala nitolbu biex tiġi s-Saltna t’Alla jekk in-nies tajbin imorru l-ġenna?ʼ U fuq kollox, kont naħseb: ‘Jekk Alla jiġġudikana meta mmutu, għala iktar tard ikollna nitilqu mill-ġenna, il-purgatorju, jew l-infern għall-ġudizzju universali?’

Staqsejt dawn il-mistoqsijiet lil xi qassisin li ltqajt magħhom. Wieħed minnhom wiġibni: “Ma nafx. Staqsi lill-isqof. X’differenza tagħmel? Int temmen b’Alla, mhux hekk? Mela tħabbel rasek xejn!” Imma jien bqajt infittex it-tweġibiet. Xi żmien wara, attendejt xi lekċers tal-Ġiżwiti, tal-Pentekostali, u tal-Injostiċi. Iżda ħadd ma kellu tweġibiet sodisfaċenti għall-mistoqsijiet tiegħi.

Meta kelli fuq is-60, tifla fil-klassi li kellha 7 snin stidnitni għal laqgħa tax-Xhieda taʼ Ġeħova. Dak li rajt u smajt għoġobni, imma peress li ħajti kienet mimlija daqs bajda, ma bqajtx f’kuntatt max-Xhieda f’dak iż-żmien. Sentejn wara, ħabbtuli l-bieb koppja li kienu Xhieda, jisimhom Juan u Maite. Domna tliet xhur nagħmlu sessjonijiet intensivi taʼ mistoqsijiet u tweġibiet li fl-aħħar wasslu għal studju tal-Bibbja.

Kemm kont nistenna bil-ħerqa kull studju! Stħarriġt kollox bir-reqqa billi użajt tliet traduzzjonijiet differenti  tal-Bibbja biex inkun ċerta li x-Xhieda taʼ Ġeħova kienu qed jgħallmu l-verità. Malajr irrealizzajt li kont ili s-snin f’konfużjoni sħiħa reliġjożament. Ħassejtni mħawda minħabba d-differenzi kbar bejn dak li kont nemmen qabel u dak li kont qed nitgħallem mill-Bibbja. Ma kontx naf x’se naqbad nagħmel, kien bħallikieku t-twemmin li kien rabba l-għeruq ġo fija kien tqaċċat.

Imbagħad, it-tieni raġel tiegħi marad serjament u miet. Għal dik il-ħabta rtirajt mix-xogħol u tlaqt minn Bilbao għal xi żmien. Juan u Maite wkoll telqu minn hemm. Jiddispjaċini ngħid li waqaft nistudja l-Bibbja. Iżda, fil-fond taʼ qalbi kont naf li kont sibt teżor. Dan qatt ma nsejtu.

Madwar 20 sena wara, meta kelli 82, Juan u Maite rritornaw Bilbao u ġew iżuruni. Kemm fraħt li rġajt rajthom! Irrealizzajt li Ġeħova ma kienx insieni, u rġajt bdejt nistudja. Juan u Maite ħadu ħafna paċenzja bija, għax spiss kont nerġaʼ nistaqsihom l-istess mistoqsijiet. Kont inħoss il-bżonn li nismaʼ diskussjonijiet mill-Bibbja iktar minn darba biex ma nibqax marbuta emozzjonalment mat-twemmin li kelli qabel. Ridt ukoll inkun armata tajjeb biex nispjega l-verità tal-Bibbja lil ħbiebi u lil tal-familja.

Dakinhar li tgħammidt—fl-età taʼ 87 sena—kienet l-iktar ġurnata taʼ ferħ f’ħajti. Il-magħmudija saret fl-assemblea tax-Xhieda taʼ Ġeħova. Anzjan Kristjan ta taħdita bbażata fuq il-Bibbja li kienet immirata speċjalment għal dawk minna li kienu se jitgħammdu. Meta smajtha qabiżli d-dmugħ. Ħassejtni bħallikieku Ġeħova kien qed ikellimni direttament. Wara li tgħammidt, ġew ħafna Xhieda jifirħuli—avolja ħafna minnhom qatt ma kont iltqajt magħhom qabel!

Minn dejjem kont naf li Ġesù Kristu hu “t-triq.” (Ġwanni 14:6) Imma l-istudju tal-Bibbja għenni nsir naf lil Ġeħova, il-wieħed li Ġesù jwassalna għandu. Issa nistaʼ nitlob lil Alla bħala Missier u Ħabib għażiż tiegħi. Meta qrajt il-ktieb Ersaq Qrib Lejn Jehovah * ħajti nbidlet mil-lejl għan-nhar. L-ewwel darba li qrajtu, spiċċajtu f’lejl wieħed biss! Messli qalbi meta sirt naf kemm hu verament ħanin Ġeħova.

Meta nħares lura u nara kemm domt infittex il-verità reliġjuża, naħseb fi kliem Ġesù: “Ibqgħu itolbu, u jingħatalkom; ibqgħu fittxu, u ssibu; ibqgħu ħabbtu, u jinfetħilkom.” (Mattew 7:7) Issa li sibt it-tweġibiet li tant kont nixxennaq għalihom, inħossni ferħana li nistaʼ ngħidhom lil oħrajn.

Taʼ 90 sena, inħossni għadni żgħira spiritwalment. Kull laqgħa li nattendi fis-Sala tas-Saltna hija okkażjoni speċjali—kemm minħabba l-għarfien prezzjuż li nirċievi u kemm minħabba l-kumpanija tal-għeżież ħuti. Nixxennaq li nerġaʼ nkun għalliema fil-Ġenna tal-Art imwiegħda. (Rivelazzjoni 21:3, 4) Inħares ’il quddiem speċjalment li nara l-maħbubin mejtin tiegħi jirxoxtaw għall-ħajja u wkoll għall-opportunità li ngħallimhom il-verità tal-Bibbja. (Atti 24:15) Kemm nixxennaq li nispjegalhom x’rigal prezzjuż tani Ġeħova fi xjuħiti!