F’Marzu tal-​2020, meta l-​Organizzazzjoni Dinjija tas-​Saħħa ddikjarat il-​COVID-​19 bħala pandemija, ħafna lanqas biss setgħu jimmaġinaw li dan il-​virus se jibqaʼ jaffettwa lid-​dinja sa iżjed minn sena wara. Miljuni taʼ nies, inkluż uħud mix-​Xhieda taʼ Ġeħova, sofrew l-​effetti fiżiċi, emozzjonali, u finanzjarji tal-​pandemija. Ix-​Xhieda taʼ Ġeħova kif organizzaw u taw l-​għajnuna matul din il-​kriżi?

 Taħt id-​direzzjoni tal-​Kumitat tal-​Koordinaturi tal-​Ġemgħa li Tiggverna tax-​Xhieda taʼ Ġeħova, iktar minn 950 Kumitat għall-​Għajnuna fid-​Diżastri (DRC) ġew ifformati madwar il-​globu minħabba l-​COVID-​19. F’xi każi, dawn irranġaw biex tingħata għajnuna minn aħwa tal-​lokal, u f’xi każi oħra, ix-​Xhieda bbenefikaw mill-​għajnuna tal-​gvern. Dawn id-​DRCs organizzaw ukoll għajnuna għal waqt id-​diżastri fuq skala kbira.

 Ikkunsidra, pereżempju, is-​sitwazzjoni fil-​Paragwaj. Gazzetta waħda rrapportat li b’riżultat tal-​effetti ekonomiċi tal-​pandemija, “numri kbar taʼ nies mill-​Paragwaj huma bil-​ġuħ f’darhom stess.” Imma d-​DRC fil-​Paragwaj kien diġà beda jqassam pakketti b’biżżejjed ikel, materjal għat-​tindif, u affarijiet għall-​iġjene personali għal familja taʼ erbgħa għal ġimagħtejn. Kull pakkett jiswa madwar €25.

 Dawn il-​ħaddiema li jagħtu l-​għajnuna kif jipproteġu lilhom infushom u lill-​oħrajn mill-​COVID-​19? Huma jilbsu l-​maskri u jżommu d-​distanza xierqa minn nies oħra. Huma jagħmlu ċert ukoll li l-​kumpaniji li jipprovdu l-​ikel jippreparawh f’postijiet nodfa u jieħdu prekawzjonijiet taʼ sigurtà stretta. Dan jinkludi li jkunu ċerti li dawk kollha li jimmaniġġjaw il-​pakketti jintqalilhom biex jilbsu l-​affarijiet li jipproteġuhom, biex inaddfu u jiddiżinfettaw il-​karozzi tagħhom, u biex iżommu l-​pakketti f’postijiet diżinfettati. Fl-​aħħar, dawk li jqassmu l-​pakketti jżommu d-​distanza mill-​aħwa li jirċivuhom.

 Sa minn Jannar tal-​2021, il-​Kumitat tal-​Koordinaturi approva li jintefqu iktar minn 21 miljun ewro għall-​għajnuna tal-​COVID-​19. Il-​fergħat u d-​DRCs jużaw dawn id-​donazzjonijiet bil-​għaqal u jaħdmu iebes biex jinnegozjaw l-​aħjar prezzijiet għall-​affarijiet li jkollhom bżonn. Pereżempju fiċ-​Ċilì, l-​aħwa li organizzaw l-​għajnuna riedu jixtru 750 kilo għads (lentils). Imma l-​prezz tal-​għads irdoppja fi żmien xahar biss! Sagħtejn wara li ftiehmu li jixtru l-​għads bil-​prezz l-​għoli, il-​bejjiegħ informahom li xerrej ieħor kien għadu kif irritorna l-​ordni tiegħu tal-​għads. Allura minflok ma talabhom il-​prezz l-​għoli li kienu ftiehmu, il-​bejjiegħ tahom l-​għads li ġie ritornat bil-​prezz tax-​xahar taʼ qabel!

 Madankollu, meta l-​aħwa marru biex iġibu l-​għads, il-​bejjiegħ prova jħassar il-​ftehim, u akkużahom li ma kinux ġusti f’li jqassmu l-​ikel, bħalma għamlu organizzazzjonijiet oħra. Wara talba qasira ġo qalbu, wieħed minn ħutna spjega lill-​bejjiegħ li kien sar stħarriġ fuq kull kongregazzjoni biex isiru jafu min verament kien fil-​bżonn. L-​aħwa spjegaw ukoll li minħabba li l-​backgrounds kulturali taʼ dawk li kienu se jirċievu l-​ikel kienu jvarjaw, kull pakkett kien se jiġi personalizzat bi prodotti li kienu se jkunu l-​iktar t’għajnuna għall-​familji. Fl-​aħħar, assiguraw lill-​bejjiegħ li d-​donazzjonijiet u x-​xogħol kollu li jsir għax-​Xhieda taʼ Ġeħova huwa volontarju. Kien impressjonat. Il-​bejjiegħ mhux biss qabel li jbegħelhom bil-​prezz imnaqqas imma wkoll żied donazzjoni taʼ 400 kilo għads mal-​ordni li jmiss tal-​aħwa.

 Lusu, armla anzjana fil-​Liberja, tgħix maʼ ħames membri oħra tal-​familja. Darba filgħodu hekk kif kienu jieħdu l-​breakfast u jaqraw l-​iskrittura tal-​jum, in-​neputi taʼ Lusu, li kellu sebaʼ snin, innota li ma kellhomx iżjed ikel fid-​dar. Hu staqsa, “X’se nieklu?” Lusu assiguratu li kienet diġà qalet talba u kienet fiduċjuża li Ġeħova kien se jipprovdilhom l-​ikel. Iktar tard dakinhar stess, Lusu kellha telefonata mingħand l-​anzjani tal-​kongregazzjoni u qalulha biex tmur tieħu xi ikel. Hi tgħid: “In-​neputi jgħid li issa jaf li Ġeħova jistaʼ jismaʼ u jwieġeb it-​talb għax Ġeħova wieġeb it-​talba tiegħi.”

 Mara fir-​Repubblika Demokratika tal-​Kongo tgħix ħdejn familja taʼ Xhieda. Wara li rat lill-​familja tirċievi l-​ikel mingħand sħabha fit-​twemmin, hi qalet, “Wara l-​pandemija, se nsiru Xhieda taʼ Ġeħova għax huma ħadu ħsieb ħuthom matul dan iż-​żmien diffiċli.” Ir-​raġel tagħha saqsieha, “Int se ssir Xhud taʼ Ġeħova għal borża ross?” Hi wieġbet, “Dażgur li le, imma dik il-​borża ross hija prova taʼ mħabba ġenwina.”

 Ix-​Xhieda taʼ Ġeħova setgħu jwieġbu malajr għall-​bżonnijiet taʼ ħutna matul din il-​pandemija minħabba d-​donazzjonijiet ġenerużi tagħkom. Grazzi għall-​kontribuzzjonijiet li għamiltu billi użajtu l-​metodi mniżżlin f’donate.pr418.com.