Fl-​2020, madwar id-​dinja, kien hemm ħafna diżastri naturali u l-​bidu tal-​pandemija COVID-​19. Ix-​Xhieda taʼ Ġeħova kif għenu lil dawk affettwati?

 Matul is-​sena taʼ servizz 2020, a il-​Kumitat tal-​Koordinaturi tal-​Ġemgħa li Tiggverna approva n-​nefqa taʼ 23.5 miljun ewro f’għajnuna għal diżastri. Dan ipprovda għajnuna għall-​vittmi taʼ iktar minn 200 diżastru—inkluż il-​pandemija COVID-​19, maltempati tropikali, għargħar fl-​Afrika, nuqqas t’ikel fil-​Venezwela, u nixfa fiż-​Żimbabwe. Id-​donazzjonijiet għenu biex jitħallsu l-​ikel, l-​ilma, il-​kenn, l-​ilbies, u l-​kura medika, kif ukoll affarijiet bażiċi għat-​tindif, tiswija, u bini mill-​ġdid. Ikkunsidra xi ftit eżempji tax-​xogħol li sar bħala għajnuna.

 COVID-​19. Madwar id-​dinja, il-​pandemija affettwat lil ħutna fiżikament, emozzjonalment, u ekonomikament. B’hekk, ġew ifformati iktar minn 800 Kumitat għall-​Għajnuna fid-​Diżastri (DRC) madwar id-​dinja. Dawn il-​kumitati żammew ruħhom aġġornati mal-​bżonnijiet taʼ ħutna u pprovdew rapporti fil-​pront li għenu lill-​Kumitati tal-​Koordinaturi jkunu jafu kif l-​aħjar li jagħtu l-​għajnuna.

 Matul is-​sena, id-​DRCs għenu lil ħafna biex ikollhom ikel, ilma, affarijiet għat-​tindif, u mediċina bażika. F’xi pajjiżi, dawn id-​DRCs ħadmu wkoll mal-​anzjani tal-​lokal biex jgħinu lill-​aħwa jieħdu l-​għajnuna li jagħti l-​gvern.

 Nies li mhumiex Xhieda nnotaw l-​għajnuna li tajna. Pereżempju, Field Simwinga, il-​kummissarju tad-​distrett f’Nakonde, Iż-​Żambja, qal lil ħutna: “Aħna obbligati lejkom għall-​għajnuna fil-​ħin li tajtu lill-​familji affettwati u li kienet tant meħtieġa.”

 Nuqqas t’Ikel fl-​Angola. Il-​pandemija COVID-​19 affettwat il-​proviżjonijiet tal-​ikel fl-​Angola u l-​prezzijiet għolew mhux ħażin. Ħafna minn ħutna sabuha iżjed diffiċli biex jixtru l-​ikel.

 Il-​fergħa tal-​Brażil intalbet tgħin billi tibgħat pakketti tal-​ikel lil ħutna fl-​Angola. Biex il-​flus mid-​donazzjonijiet jintużaw bl-​aħjar mod, saret riċerka bir-​reqqa biex isibu l-​aħjar mezz kif jibagħtu l-​ikel u dan inxtara bil-​kwantità. B’hekk, kull pakkett tal-​ikel kien jiswa biss madwar €19 biex jinxtara u jintbagħat imma kien fih kważi 20 kilo taʼ ross, fażola, u żejt għat-​tisjir. Sa llum intbagħtu 33,544 pakkett—total taʼ 654 tunnellata. Flimkien maʼ ikel ieħor tal-​lokal, dawn il-​proviżjonijiet għenu biex jitimgħu iktar minn 50,000 ruħ!

 Ħutna kif iħossuhom dwar din l-​għajnuna? Alexandre, li jgħix f’parti iżolata tal-​Angola, jgħid: “Din naraha bħala evidenza li Ġeħova jħobbni u li m’iniex waħdi. Jien apprezzat mill-​organizzazzjoni taʼ Ġeħova!” Mariza, omm single, tgħid: “Ġeħova semaʼ talbi. Nirringrazzja lilu u lill-​organizzazzjoni tiegħu!”

 Għajnuna Waqt in-​Nixfa għaż-​Żimbabwe. Matul is-​sena taʼ servizz tal-​2020, iż-​Żimbabwe ffaċċja nixfa qalila u miljuni taʼ nies batew ġuħ kbir. Eluf taʼ Xhieda fiż-​Żimbabwe ma kellhomx biżżejjed x’jieklu.

 Ħames DRCs ġew ifformati biex jipprovdu l-​ikel għal ħutna. Mijiet taʼ pubblikaturi għenu biex jippakkjaw l-​ikel, jgħabbu l-​provvisti, jew isellfu l-​vetturi tagħhom. b Matul is-​sena taʼ servizz tal-​2020, intużaw €588,933 biex jgħinu lil iktar minn 22,700 persuna jiġu mitmugħin!

 F’xi każi, l-​aħwa laħqu spiċċaw l-​ikel li kellhom sakemm waslet l-​għajnuna. Meta wasal l-​ikel, ħutna bdew ifaħħru lil Ġeħova. Xi wħud saħansitra bdew ikantaw l-​għanjiet tas-​Saltna.

 F’naħa waħda taż-​Żimbabwe, żewġ aħwa li kienu romlu attendew laqgħa li kienet organizzata biex tiġi diskussa l-​għajnuna għall-​ikel minn organizzazzjoni mhux governattiva (NGO). Però, iktar m’għadda l-​ħin, din il-​laqgħa ħadet xejra politika, allura l-​aħwa nisa ddeċidew li ma setgħux jagħmlu dak li kien mitlub minnhom biex jirċievu l-​għajnuna. Huma u ħerġin mil-​laqgħa, bdew jitwaqqgħu għaċ-​ċajt u qalulhom, “Ara ma tiġux għal xi ikla mingħandna!” Iżda ġimagħtejn biss wara, ix-​Xhieda taʼ Ġeħova waslu f’dak il-​post u ġabu l-​ikel lil ħutna—ħafna qabel ma waslet l-​għajnuna tal-​NGO!

 L-​għajnuna fiż-​Żimbabwe wasslet ukoll għal xhieda tajba. Pereżempju, ejja naraw l-​esperjenza taʼ Prisca, li toqgħod f’raħal żgħir. Minkejja d-​diffikultajiet minħabba n-​nixfa, Prisca kienet tħalli kull nhar t’Erbgħa u Ġimgħa għall-​ippritkar, anke fi żmien meta jaħartu r-​rabaʼ. In-​nies tal-​villaġġ tagħha kienu jwaqqgħuha għaċ-​ċajt u jgħidulha: “Int se toqtol lill-​familja tiegħek bil-​ġuħ minħabba l-​ippritkar.” Prisca kienet twiġibhom: “Ġeħova qatt ma naqas lill-​qaddejja tiegħu.” Ftit wara, hi rċeviet l-​għajnuna mill-​organizzazzjoni tagħna. Dan impressjona lil ftit mill-​ġirien tagħha li qalu lil Prisca: “Alla dejjem kien miegħek, allura rridu nitgħallmu iżjed dwaru.” Sebgħa minn dawn il-​ġirien issa qed jisimgħu l-​laqgħat tal-​kongregazzjoni li jixxandru fuq ir-​radju.

 Iktar ma nersqu lejn it-​tmiem, aħna se nkomplu niffaċċjaw diżastri naturali. (Mattew 24:3, 7) Id-​donazzjonijiet ġenerużi tagħkom li jsiru b’metodi differenti u li jinsabu fuq donate.pr418.com huma apprezzati bil-​kbir. Dawn jipprovdu għajnuna effettiva u fil-​ħin.