KIF JINTUŻAW ID-DONAZZJONIJIET TIEGĦEK?
Kanzunetti li Jressquna Eqreb Lejn Alla
1 TAʼ NOVEMBRU 2021
Il-mużika hi rigal sabiħ mingħand Ġeħova. Din tistaʼ taffettwa l-ħsibijiet tagħna, tbiddlilna l-burdata, u timmotivana. Dan hu propju li jagħmlu l-kanzunetti oriġinali. Infatti, dawn il-kanzunetti jistgħu jagħmlu saħansitra iżjed: iressquna eqreb lejn Ġeħova.
Mill-2014 ’l hawn, ħarġu ’l fuq minn 70 kanzunetta oriġinali, u issa minn tal-inqas waħda minn dawn il-kanzunetti hija disponibbli f’iktar minn 500 lingwa! Forsi taħseb, ‘Min jaħdem fuq dawn il-kanzunetti, u kif jipproduċuhom?ʼ
Ħarsa minn Wara l-Kwinti
Il-kanzunetti oriġinali jiġu prodotti mit-tim tal-mużika fis-Servizzi tal-Awdjo u tal-Vidjow, li jaħdem taħt id-direzzjoni tal-Kumitat tat-Tagħlim tal-Ġemgħa li Tiggverna. It-tim tal-mużika hu magħmul minn 13-il ħu u oħt li jgħinu fil-kompożizzjoni, fl-inġinerija tal-mużika, fix-xogħol tal-ippjanar, u fi kwalunkwe xogħol ieħor li jkun hemm bżonn. Iktar minn hekk, il-Kumitat tat-Tagħlim approva volontieri li jaħdmu part-time mid-dar minn madwar id-dinja biex jgħinu f’dan ix-xogħol, inkluż kompożituri, mużiċisti, u kantanti. Dawn l-aħwa b’umiltà jużaw it-talenti tagħhom mingħajr ma jistennew li jkunu magħrufin personalment għax-xogħol li jagħmlu.
Kanzunetta oriġinali kif tiġi prodotta? L-ewwel, il-Kumitat tat-Tagħlim jiddeċiedi l-bażi Skritturali għall-kanzunetta u kif suppost li jħossu min jismagħha. It-tim tal-mużika mbagħad jagħti l-inkarigi għall-kompożizzjoni tal-mużika u għall-kitba tal-lirika. Imbagħad jiġi ppreparat rekording tal-kanzunetta. Dan jisimgħu l-Kumitat tat-Tagħlim u jipprovdi iżjed suġġerimenti. Wara dan, it-tim tal-mużika jaġġusta l-kanzunetta u jirrekordja l-aħħar verżjoni. Dawn il-kanzunetti jiġu rekordjati f’diversi lokalitajiet, inkluż faċilitajiet tal-fergħa u fi djar tan-nies li jkollhom apparat tar-rekording.
Biex jikkomponu u jirrekordjaw kanzunetti oriġinali, ħutna jużaw programmi tal-kompjuter differenti. Ix-xogħol jirrikjedi wkoll li jintuża apparat bħal strumenti mużikali, mikrofoni, amplifiers, speakers, u mixing consoles. Il-mikrofoni jistgħu jiswew minn madwar €89 sa iktar minn madwar €886 kull wieħed. Fl-2020, infaqna madwar €103,000 f’apparat biex nirrekordjaw il-mużika.
Xi sforzi qegħdin isiru għall-aħjar użu tal-fondi? Minflok ma jkollna tim tal-mużika kbir fil-Betel, jintużaw ħafna volontieri li jaħdmu part-time mid-dar. Ukoll, minflok ma ħafna mużiċisti jiltaqgħu flimkien biex jirrekordjaw, ħutna spiss jikkomponu u jipproduċu l-mużika b’mod diġitali.
’Iżommu l-Fidi b’Saħħitha’
L-aħwa jħobbu jisimgħu l-kanzunetti oriġinali. Tara, li toqgħod il-Ġermanja, tgħid: “Il-kanzunetti jgħinuni nirrilassa meta nkun ansjuża. Li nismagħhom bil-lingwa tiegħi qisu bħal tgħanniqa mingħand Ġeħova.” Ħu li jismu Dmitry mill-Każakistan jgħid: “Nieħu pjaċir nismaʼ l-kanzunetti mingħajr ma jkolli għalfejn ninkwieta jekk jaqblux mal-prinċipji tal-Bibbja. Iktar minn hekk, il-kanzunetti jgħinuni nibqaʼ ffokat fuq affarijiet spiritwali.”
Delia, fl-Afrika t’Isfel, tiddeskrivi kif tħossha dwar il-kanzunetti oriġinali: “Dawn il-kanzunetti jżommuli l-fidi b’saħħitha. Meta nkun imnikkta jew niffaċċja sitwazzjoni diffiċli, dejjem ikun hemm kanzunetta li taqbel perfettament mas-sitwazzjoni tiegħi. Spiss, il-melodiji tal-kanzunetti biss ikunu biżżejjed biex ibiddluli l-mod kif inħossni!”
Xi kanzunetti oriġinali saru favoriti għal xi wħud. Lerato, fl-Afrika t’Isfel ukoll, jgħid: “Il-kanzunetti ‘Wara l-kantuniera’ u ‘The New World to Come’ jgħinuni nimmaġina lili nnifsi meta se nilqaʼ lura lill-għażiża ommi. Kull darba li nismaʼ dawn il-kanzunetti, naraha tiġri lejja bi jdejha miftuħa.”
Kanzunetta oriġinali waħda kienet speċjalment t’għajnuna għal żagħżugħa mis-Sri Lanka. Hi tgħid: “L-għalliema tiegħi tax-xjenza ċanfritni quddiem il-klassi talli jiena waħda mix-Xhieda taʼ Ġeħova. Jien bżajt u ma kontx naf x’naqbad ngħid. Meta mort id-dar, ommi inkuraġġietni nismaʼ l-kanzunetta ‘Studju jqawwik.’ Il-kanzunetta għenitni nirrealizza li kelli bżonn nagħmel riċerka u nipprepara tweġiba. Il-ġurnata taʼ wara, tkellimt mal-għalliema. Hi semgħetni u qaltli kemm issa tifhem aħjar it-twemmin tax-Xhieda taʼ Ġeħova. Nirringrazzja lill-organizzazzjoni taʼ Ġeħova li tipprovdilna kanzunetti inkuraġġanti bħal dawn.”
L-ispejjeż biex jiġu prodotti dawn il-kanzunetti kif jiġu koperti? Permezz taʼ donazzjonijiet lix-xogħol taʼ madwar id-dinja, li ħafna minnhom isiru permezz tal-metodi li nsibu fuq donate.pr418.com. Grazzi tal-kontribuzzjonijiet ġenerużi tagħkom.