Pa wanda wa kulecelezya ukuwa mu nsi, e Yesu wazanilwe ku ca Kupitililwa icicindame nkaninye. Co-o acino calinji aca kulecelezya kwe weliwe ukuzanwako. Acino wapekinye ukuti walile ponga na wasambi wakwe co-o ica Kupitililwa. Nu kutalika ukuzevya ukupya ukwa pa mwaka. Ko-o ukuzevya kukakwitwa ukuti Ica Kulya ca Manguzi ice Tatakulu. Acino wanenile Peter ne Yohani ukuya mukupekanizizya ica Kupitililwa. (Luk. 22:7-13; lolani icikope pa nkupo.) Co-o cikutwizusyako ukuti, tuzipizile ukuyipekanizizya lya nkani ku Cizusyo cino ciliwako pa 27 March. Amawungwe yonsinye yafwile yapekanizizya lya nkani e kalanda, umukate ne waini, na vinji. Nga sweswe wenga nawenga avyani vino tuzipizile ukucita pa kuyipekanizizya lya nkani ku Cizusyo?

Pekanyani umwezo winu. Mwawazya nu kwelenganya pa mawaliko yano wakawika mu mpindi ya Cizusyo. Ya-a amawaliko yakazanwa mwe Kubebeta Amalembo Cila Bushiku. Na mukabuku kakuti Akatabo ka Kutwafwa Ukusambilila Icebo ca kwa Lesa icipandwa 16. (Lolani na kalibuku ka Imikaliile aka mu April 2020.) Indupwa zingazana ivyewo vyakuwomvya pa mapepo ya lupwa pa kulanzyanya pe vino inzuwi yacindama mwi buku lya kuti Icisontelelo ca Mpapulo Isha Watch Tower na mwi buku lya kuti Icitabo ca Kwafwa Inte sha kwa Yehova Ukusanga Ifyebo.

Mwakwitako na wanji pa kuti wize wazanweko. Mwawombako mwe kampeni yakwita awantu ku Cizusyo. Yelenganyani pe wano mungita ku Cizusyo ndi vino, ivipempu vinu, wano mwatungululanga isambililo, iviwuza vinu na wa lupwa. Wa eluda wazipizile ukusinincizya ukuti wita wonsinye wano watonta. Nga cakuti mwamanya wumwi wino atawa ku cifulo ca ku mwinu, mungamwavwa ukuzanwako ku Cizusyo nga mwatinika pano watili PA NTE ZYA KWE YEHOVA pa jw.org nu kuya pano watili “Icizusyo.” Apano mulole impindi ni cifulo kuno walilonganila ku cifulo ca ku mwawo.

Avyani vinji vino tungacita pa kuyipekanizizya ku Cizusyo?