VINO AWINA KLISTU WAZIPIZILE UKUWA

Mwakwavwa Wano Watazumila mwe Leza Ukumanya Kelewula Wawo

LIZYANI

Uzye mukayinyosyamo ukuwizizya wano watazumila mwe Leza, pamulandu wakwelenganya ukuti mpamwi watanga wivwe? Nga mukayinyosyamo, mwakwizuka ukuti awantu awavule wano watapepanga swinya wano watazumizile na mwe Leza, pe yo-o impindi Ante zya kwe Yehova. Vino wakalondekwa, aviticivye ivyakulanjilila ukuti e Leza akuno wawa.—Roma. 1:20; 10:14.

TAMBANI E VIDYO YAKUTI MWAKWIZUKA UKUTI—NA WALYANYE WANO WATAWA NI SUWILO WANGAWA NI SUWILO!—WANO WASIPEPA, APANO MWASUKE IWUZYO LINO LYAKONKAPO:

Uzye icakulolelako ca kwe Tommaso camyavwa wuli ukulola uwuzima wuno wawa mukuwizizya wano wasipepa?

Icasuko

Ivyakucita

Nga cakuti wumwi walanda ukuti atazumila mwe Leza, mwawa ni cikuku swinya mumucenjelo mwalanjizya ukuti muwisileko sana amano pe vino akayivwa pe lyo-o ilyasi. (2 Tim. 2:24) Mwalanzyanya nawe amalyasi yano angakunda ukwivwa. Kucakulolelako, uzye angakunda ukulanzyanya nawe pe vimwi vino vyalenga wanji wazumile ukuti kwawa kelewula? Nga angakunda, mungawomvya amabuku na ma vidyo yano wawicilako awantu wamusango wo-o. Mwe Vino Tukawomvya pa Kusambilizya Baibolo, wawikamo na ma broshuwa yakuti Was Life Created? niyakuti The Origin of Life—Five Questions Worth Asking pakuti catupepucila ukuyazana.

Kweni pakutalika cingamitalila ukunena wano watazumila mwe Leza icisinka. Uzye citange cizipe ukunenako e kawizya e songo mu vya kwe Leza ukuti amyavwe? Mwakwizuka ukuti e Yehova angatwavwa ukwavwa wano wawa ni myezo yino yikavwambisya ukumumanya,—nanti acakuti pakutalika wangakana ukuzumila ukuti akuno wawa.—Imili. 13:48.