Mu mipepele yonsinye, awantu awazima amo wawa. Icizima acakuti e Leza wawamanya wa-a awantu swinya akawasakamala. Icawulanda acakuti imipepele impusanempusane, yikacita ivintu iviwipe. (2 Wakorinte 4:3, 4; 11:13-15) Wano wakalemba amalyasi ya vino vikacitika munsi, wakasimika ukuti, imipepele yimwi ikayisanzya mukukoma awantu, mu nkondo, nukuyinvya awana. Co-o cikaleta uwulanda nkaninye kwe wano wasuwila mwe Leza!—Wazya Mateyu 24:3-5, 11, 12.

Imipepele yacisinka, yikacindika Leza apo iyawufi yeni yisimusecelezya. Wakasambilizya vino vitawa mwe Baibolo, ivyawufi pe Leza na pe wano wafwa. E Yehova akalonda awantu wamumanye swinya wamanye icisinka pe weliwe.—Wazya Ezekiel 18:4, 1 Timoti 2:3-5.

E Leza asiwipwa kumipepele yino yikati yamukunda pano mucakusimicila yakunda insi yakwe Satana. (Jemusi 4:4) E Baibolo akati imipepele yawufi yonsi e Babeloni Mukulu. Izinanye lyo-o lyafuma ku kaya kuno kwatalicizile imipepele yawufi. Akayanye ka-a, kalinji kweneko pansizi ye mulamba wakwe Nowa. Nombanye, e Leza alifumyapo imipepele yawufi yino yayinvya awantu.—Wazya Ukuwumbulika 17:1, 2, 5, 16, 17; 18:8.

Ilyasi ilizima alya kuti e Yehova atiwilila awantu awacisinka wano wawa mu mipepele yawufi insi yonsi. Swinya, akusambilizya wa-a awantu icisinka ukuti walemenkane.—Wazya Mika 4:2, 5.

E Yehova wasakamala awantu wano wakunda ivintu ivyacisinka ni vizima. Akalonda ukuti wafume mu mipepele yawufi. Awantu wano watemwa Leza, wakayipa ukuwombela pa miwele yawo pakuti wasecelezye Leza.—Wazya Ukuwumbulika 18:4.

Mumpindi ya Wina Klistu awakutalicila, pano awantu wacisinka wivwile ilyasi lizima, wasecelezile nkaninye. Wasambilizile imiwele iyipya kwe Yehova yino yawaletezile icimwemwe ni suwilo. Wa-a awantu wawa acakulolelako icizima kwe sweswe amuno pano wivwile ilandwe lizima, watalisile ukucindika ukulonda kwakwe Yehova ukulusya icili consinye.—Wazya 1 Watesalonika 1:8, 9; 2:13.

E Yehova akapocelela awantu mu lupwa lwakwa kapepa wakwe wonsi wano wakaleka ukupepa kwawufi. Ndiwivwila e Yehova pano akukwita, uliwa we ciwuza wakwe. Mulupwanye lo-o, mwawa awantu wano wakundana, wakapepa Yehova, na kunkolelo waliwa nu wumi wa pe na pe.—Wazya Marko 10:29, 30; 2 Wakorinte 6:17, 18.

Uwupinguzi wuno wuliponela imipepele yawufi alilyasi lizima nkaninye. Wo-o uwupinguzi, wulileta uwuntungwa insi yonsinye. Imipepele yawufi yitalitela yipatunkanye awantu swinya nanti ukuwasambilizya ivyawufi. Awantu insi yonsinye waliwapepa Leza wenganye uwacisinka.—Wazya Ukuwumbulika 18:20, 21; 21:3, 4.