E Leza wateyinye iwumba lya luko lwe Abulahamu apano awapa na masundo yano walinji nu kukonka. Iwumba lyolyo, walisile izina lya kuti “Israeli,” swinya awano wapile amazwi yakwe, nu kuwasambilizya icete cete vino wangamupepa. (Amalumbo 147:19, 20) Acino inko zyonsinye zyalinji nu kunoncelamo mu miwele ya wina Israeli.—Wazya Intaliko 22:18.

E Leza wasozile awina Israeli ukuti wawe inte zyakwe. Ilyasi lya wina Israeli ilikali, likatwavwa ukumanya vino awantu wakakwikala icete ndi wivwila amasundo yakwe Leza. (Amasundo 4:6). Acino fwandi, awantu wano walondanga ukumanya Leza wacisinka walinji nu kusambilila ku wina Israeli.—Wazya Ayizeya 43:10, 12.

Pano papisile impindi, awina Israeli walesile ukwivwila Leza apano Yehova wapyanicizizyepo iwungwe lya Wina Klistu. (Mateyu 21:43; 23:37, 38) Ilelo, Awina Klistu wacisinka awakamboni wakwe Yehova amuno awano wapyanicizya awina Israeli.—Wazya Imilimo 15:14, 17.

E Yesu wateyinye awasambilizi wakwe ukuti wawaya mukuwizya insi yonsi. (Mateyu 10:7, 11; 24:14; 28:19, 20) Yo-o impindi ya mpelelecezya, apano umulimo wa kuwizya wukuwombwa nkani ukulusya kali lyonsi. E Yehova alemenkinye imintapendwa ya wantu insi yonsi mu kupepa kwa cisinka, co-o cisitela cicitike kali lyonsi. (Ukuwumbulika 7:9, 10) Awina Klistu wa cisinka wakawombela ponga, wakakwavwana nu kuwomelezyanya. Insi yonsi pano wakulongana, wakasambilila ivili vyonganye ivya mwe Baibolo.—Wazya Waheberi 10:24, 25.

Ukuteyanya kwa Nte Zyakwe Yahova izya manda ya-a kwatalisile mu ma 1870. Iwumba litici lyatalisile ukuzana ivisinka ivya mwe Baibolo. Wamanyile kuno e Yesu wateyinye awina Klistu ukuti wawizya, apano watalisile ukuwizya insi yonsi. Mu 1931 watalisile ukuwonvya izina lyakuti Inte Zyakwe Yehova.—Wazya Imilimo 1:8; 2:1, 4; 5:42.

Awina Klistu wakutalicila, wakolelelwanga ni wumba lino lyatungululanga, iwumbanye lyolyo, lyamanyile ukuti e Yesu awili umutwe wa maungwe yayo. (Imilimo 16:4, 5) Acili conganye ni lelo, Inte Zyakwe Yehova insi yonsi wakanoncelamo muwutunguluzi wiwumba lya waeluda lino likatungulula. Iwumbanye lyo-o, likasakamala amaofesi ya Nte Zyakwe Yehava yano yakasenula, ukupulinta nukutuma amabuku ayakusambililamo Baibolo munvwango ukulusya 600. Acino iwumba lino likatungulula likawonvya Baibolo pa kutungulula nu kuwomelezya awantu mu maungwe ukulusya pe 100,000 insi yonsi. Mwiwungwe ilili lyonsinye, mwawa waeluda, wa-a awano wakatungulula swinya wanye waeluda wakunda ing’onzi zyakwe Leza.—Wazya 1 Peter 5:2, 3.

Inte Zyakwe Yehova wakawombela ponga ukuwizya ilandwe lizima nu kuvwamba awasambilizi wakwe Yesu. Ndivino Awina Klistu wakutalicila, naswenye tukawizya ku wantu ku zyang’anda zyawo. (Imilimo 20:20) Nditwazana wano wakulonda ukusambilila icisinka camwe Baibolo, tukasambilila nawo. Inte zyakwe Yehova asa liwumba lya mapepo vye, swe lupwa, twawa nu Tata uwa lukundo, swinya swe wanyina, tukasakamalana. (2 Watesalonika 1:3) Umulandu wakuti awantu wakwe Yehova wakawombesya ukuti wasecelezye Leza, nukwavwa awantu, wawa alupwa lwa cimwemwe.—Wazya Amalumbo 33:12; Imilimo 20:35.