Imizimu akuno yawa swinya yisiloleka! Kwawa imizimu imizima ni miwipe. Uzye yonye imizimu awantu wano wafwa?

Awe, Umuntu ndi wafwa asiya ukulikonsinye ndi vyo awavule wakakwelenganya. Acani cino twalandila wo-o? Amuno avino Baibolo yikalanda. E Baibolo alibuku lya cisinka lino lyafuma kwe Leza wa cisinka uwizina lya kuti Yehova. E Yehova wino watupanzile, awino wamanya icete sana vino umuntu akawa ndi wafwa.​—Amalumbo 83:18; 2 Timoti 3:16.

E Baibolo yikalanda ukuti e Leza wawomvizye ‘ulukungu’ pa kupanga umuntu wa kutalicila. (Intaliko 2:7) Swinya amuwika na mu Paradaise, mu calo ca Edeni. E Adamu wanga ayivwile Leza, nge acili apano ali ukufika ni lelo. Lelo pa mulandu wa kuti wakanile ukwivwila isundo lya kwe Leza ku mufulonye, e Leza wamunenile ukuti “[Ulinyocela] ku lukungu kuno wafumile, amuno we lukungu swinya ku lukungu nye akuno ulinyocela.”​—Intaliko 3:19.

Fwandi tungati, akwinye kuno Adamu walinji pano e Yehova atani amupange ukufuma ku lukungu? Atalinji nanti kumwi. Atalinji amuzimu wuno wacilinji wutani wukwatwe mwi yulu. Atalinji kweneko. Fwandi pano Yehova wanenile Adamu ukuti “ulinyocela ku lukungu,” wasuzile ukuti Adamu walinji nu kufwa. Mu nzila yinji tungati, atalinji nu kuwa  nu wumi na swinya, walinji nu kuleka ukuwako. Imfwa, akukanawa nu wumi.

Uzye awantu wano wafwa wawa wuli? Uzye nawonye watawako? E Baibolo ikati:

• “Vyonsinye viwili [awantu ni nyama] vikaya ukuli konganye. Vyonsinye vyafumile ku lukungu, na vyonsinye viwili vikanyocela ku lukungu.”​—Ekawizya 3:20.

• “Wano wafwa watamanya nanti cimwi.”​—Ekawizya 9:5.

• “Ulukundo lwawo, nu lupato lwawo, nu wuzuwa wawo wakafwila navyo ponga.”​—Ekawizya 9:6.

• “Amuno ku Nkungwe kuno ukuya kutawa umulimo wakuwomba nanti akwelenganya nanti akumanya nanti amano.”​—Ekawizya 9:10.

• “[Umuntu] wanyocela ku musili; uwanda wulyanye amelenganyo yakwe yalowa.”​—Amalumbo 146:4.

 Uzye molimonye vyo-o vino Baibolo yalanda avisinka? Te yelenganya pe co-o: Mu ndupwa imvule umonsi awino akavwambila awa mu ng’anda yakwe ivya kulya. Nomba ndi wafwa, impindi imvule wano wasyala wa kacula nkaninye. Impindi zimwi umuci asiwa nanti andalama zya kukalila awana ivya kulya. Pamwi wangatalika nu kuwacuzya kwe wano wapasile umonsi. Nomba nga ca kuti weyo umonsi wakatucila mwe cimwi, acani cino atanga anyoke ayize asakamale awa mu ng’anda yakwe, nanti ukuwacinjilila kwe wano wakuwacuzya? Icisinka aca kuti, umuntu ndi wafwa asiwa nu wumi kumwi swinya atanga acite icili consinye, wulyanye vino Baibolo ikalanda.​—Amalumbo 115:17.

Uzye co-o cikusula ukuti awafwe watalitela wawe nu wumi na swinya? Awe. Tulilanda pa kuzyulupuka linji. Lelo cikusula ukuti awafwe wasimanya vino ukucita. Watanga wakulole, wivwe vino ukulanda, ukukunena ivili vyonsinye nanti ukukucita icili consinye. Fwandi utazipizile ukuwatina—Ekawizya 9:4; Ayizeya 26:14.