Wuzye ukwelengaanya kuno cawa acipepuuke ukuciita iviziima?— Molimonye, awaantu awavuule avino wakakwelengaanya. E Baibolo yikatuneena kuno avino caliinji ku mulumeendo wacitiici uwiziina lya kuti Josia. Caliinji aciwoome nkaninye kwe weliwe ukuciita iciziima. Lelo waliinji ni viwuuza vino vyamwavwiliziizye. Nomba, leka tusambiliile ivivuule pa kwe Josia nga na paviwuuza vyakwe.

E yisi wakwe Josia iziina lyakwe waliinji we Amoni. Waliinji a mfuumu ya munsi ya Yuda. Amoni waliinji amuwiipe nkaninye, swinya wapepaanga amakolaanya [twa leza twa wuufi]. Pano e yisi wakwe Josia wafwiile, e Josia awino wiziile apyaana pa wufuumu munsi ya Yuda. Lelo waliinji vye ni myaaka kanaani monsi (8) ampelanye! Wuzye ukwelengaanya kuno e Josia waliinji amuwiipe ndi vino e yisi waliinji?— Awe, waliinji amuuntu umuziima nkaninye!i

Nanti acakuti Josia waliinji amutiici nkaninye, walondaanga ukwivwiila Jehova. Acino wasoziile ukupaanga wuciwuuza na waantu wano wakunziile Jehova. Swinya walyanye waantu awano wavwiliziizye Josia ukuciita  iviziima. Awaweni wano waliinji awaciwuuza wakwe Josia?

Weenga pakwe vyoo iviwuuza vyakwe waliinji we Zefaniya. E Zefaniya waliinji amutumwa. Wasocezile awaantu wa munsi ya Yuda kuno ndi watwaliliila ukupepa amakolaanya iviintu iviwiipe viliwaciticiila. E Josia wivwiile kwe Zefaniya nu kutaliika ukupepa Jehova, asa makolaanya awe.

Wiinji pa viwuuza vyakwe Josia waliinji we Jeremiya. Waliinji kwela acimo conganye nu Josia. E Jeremiya waliinji amwina mupalamaano wakwe Josia, swinya wizizyaanga poonga. Waliinji aviwuuza ivikundane nkaninye, icakuti pano Josia wafwiile, e Jeremiya wa walisiile ulwiimbo uluyiweele pa kwe vino waluciziile Josia. E Jeremiya nu Josia wavwilizyanyaanga pa kuti waciite iviziima nga nu kwivwiila e Jehova.

Wuzye ungasambiliila vyaani ku cakulolelaako cakwe Josia?— Nanti acakuti Josia waliinji amulumeendo umutiici, walondaanga ukuciita iviziima. Wamanyiile kuno wazipiziile ukuwa na wuciwuuza na waantu wano wakuunda Jehova. Na wewenye uzipiziile ukusoola iviwuuza vino vyakuunda Jehova vyo vingakwaavwa ukuciita iviziima!