Yavwani iwumba ukuyiweweta. Pano mukulanda mwawuzya amawuzyo yano yangalenga wano wakwivwa wayasucile aweneco mu mwezo.

Landani pa miwele yawo imizima. Lengani iwumba ukwelenganya pa mulandu wuno wakacitila ivizima. Wavwani ukuti wacita ivizima pa mulandu wa kukunda Yehova, awantu wanji na masambilizyo ya mu Baibolo. Wavwani ukulola amano yano yawa mu kukonka vino Baibolo yikalanda. Muzipizile ukusinincizya ukuti awantu wasyala wakwivwa icete pa nsizi yi lyasi, watazipizile ukusyala wakwivwa insoni nanti ukuyipa imilandu pa mulandu na vino te mwalanda.

Yavwani iwumba ukucindika Yehova. Londololani vino amasambilizyo ya mu Baibolo, ivisinka na masundo vikalanjizya ukuti Leza watukunda. Lengani wasyale wakuvwambisya ukumanya vino Yehova akayivwa nu kucita vino vingamusecelesya.