ISAMBILILO 14
Vino Tungacita pa Kuti Imipepele Yitu Yiwasecelesya Leza
Wulyanye vino twasambilizile mwi sambililo lino lyafumako, asa mipepele yonsi yino yikasecelesya e Leza. Lelo nanti ciwe wo-o, tungapepa e Kelewula witu munzila yino yikamusecelesya. ‘Amipepele’ ya musango ci yino yikamusecelesya? (Jemusi 1:27) Lola vino Baibolo yikasambilizya.
1. Uzye tungasambilila wuli ukupepa Leza mu nzila yino akalonda?
Tungasambilila ukumupepa mu nzila yino akalonda ukupitila mwe Baibolo. E Yesu walanzile kwe Leza ukuti: “Izwi lyako alyakusimichila.” (Yohani 17:17) Imipepele yimwi yisiwika amano ku cisinka cino cawa mwi zwi lya kwe Leza Baibolo. Ikasambilizya ivisambilizyo vya wantu ni ntambi. Lelo e Yehova asisecelela na wantu wano wasitontela “isundo lyakwe Leza.” (Wazya Mateyu 15:3.) Nomba akasecelela nkaninye nga cakuti ukupepa kwitu kweyamila pe Baibolo swinya tukucita na vino yikalanda.
2. Uzye tuzipizile twapepa wuli Yehova?
Tuzipizile twamupepa wenganye nsu, amuno awino watupanga. (Ukuwumbulika 4:11) Co-o cikusula mukuti tuzipizile ukumukunda nu kumupepa wenganye ukwasowa ukuwomvya amakolania akuli ukuti utuluwi.—Wazya Ayizeya 42:8.
Ukupepa kwitu kuzipizile ukuwa ‘akwimicilwe, ukupocelelwe’ kwe Yehova. (Waroma 12:1) Akuli ukuti tuzipizile twakwivwila amasundo yakwe. Ku cakulolelako, wano wakunda e Yehova wakakwivwila amasundo yakwe pi twala. Swinya wakalewuka ni vintu vino vingawaletelela ndi vino, e fwaka, ukumwela imilembo nanti ipaala ku musamwe. a
3. Amulandu ci wuno tuzipizile twapepela Yehova ponga na wano tukapepa nawo?
Ukulongana kuno tukalongana cila sabata kukalenga ‘twatumvya Yehova . . . mu mawungano.’ (Amalumbo 111:1, 2) Tukamutumvya nga tukwimbila indwimbo. (Wazya Amalumbo 104:33.) E Yehova akatunena ukuzanwa mukulongana amuno watukunda, swinya wamanya nu kuti akuno kulilenga twize twikale amanda pe. Cinji acakuti, nga twaya mukulongana tukawomelezyanya.
SAMBILILA IVICILE PA-A
Lola umulandu wuno Yehova asizumilizizya amakolania pa kumupepa. Ni nzila izicindame zino tungamulumbanizizyamo.
4. Tutazipizile ukuwomvya amakolania mukupepa
Twamanya wuli ukuti ukucita wo-o kusisecelesya e Leza? Tambani e VIDYO, nu kulanzyanya ya-a amawuzyo.
-
Avyani vino vyaciticizile awawomvi wa kwe Leza wamwi wano watalisile ukupepa Leza ukuwomvya amakolania?
Wamwi wakawomvya amakolania pakupepa Leza, amuno wakalonda wayivwa ukuti wali mupipi nawe. Nomba uzye molimonye Yehova angawa mupipi nawo? Wazyani Ukufuma 20:4-6 na Amalumbo 106:35, 36, nu kulanzyanya ya-a amawuzyo:
-
Amakolania ci yano walola awantu wakuwomvya pa kupepa Leza?
-
Nge Yehova weni akayivwa wuli?
-
Nga wewe ukayivwa wuli?
5. Ukupepa Yehova wenganye kukatuluwula ku visambilizyo vya wufi
Lola vino ukupepa Yehova mu nzila yino akalonda kukatuluwula ku visambilizyo vyawufi. Tambani e VIDYO.
Wazyani Amalumbo 91:14, nu kulanzyanya lyo-o iwuzyo:
-
Avyani vino e Yehova walaya ukutucitila nga tukumupepa wenganye pa kulanjizya ukuti twamukunda?
6. Tukapepa e Leza nga tuli pa kulongana
Tukalumbanya e Yehova nu kuwomelezyanya ukupitila mukwimbila nu kwasukapo pa kulongana. Wazyani Amalumbo 22:22, nu kulanzyanya ya-a amawuzyo:
-
Uzye vino wanji wakakwasuka pa kulongana vikalenga uwayivwa wuli?
-
Nga wewe, uzye ungakunda ukupekanya pakuti uyize uyasukepo?
7. Yehova akatemwa nkaninye nga tukusimicilako wanji vino tukusambilila.
Kwawa inzila imvule zino tungawomvya pakunenako wanji icisinka ca mu Baibolo. Wazyani Amalumbo 9:1 ne 34:1, nu kulanzyanya lyo-o iwuzyo:
-
Acintu ci cimwi cino usambilizile mu Baibolo cino ungakunda ukusimicilako wumwi?
WAMWI WAKATI: “E Leza ungamupepela monsinye muno ukulondela, inkama amwezo.”
-
Nga wewe ukutipo wuli?
IVISINKA VIKULU
Tukasecelesya nkaninye e Kelewula witu nga tukumupepa wenganye, ukumulumbanya pano tuli pa kulongana nu kunenako wanji vino tukusambilila.
Avyani Vino Wasambilila?
-
Tungasambilila wuli ivya kupepa Leza mu nzila yino akalonda?
-
Amulandu ci wuno tuzipizile ukupepela Yehova wenganye nsu?
-
Amulandu ci wuno tuzipizile twapepela ponga na wano wakalonda ukusecelesya Leza?
MANYILAPO NA VINJI
Mwi lyasi lyakuti, “Pe yo-o Impindi nsi ne Muzwa wa Makolania” lola cino calenzile umwanaci wumwi ukuleka ukupepa amakolania.
“Baibolo Ikapilula Awantu” (Ulupungu lwa kwa Kalinda, July 1, 2011)
Lola vino vingakwavwa pa kuti uwakwasukapo pa kulongana.
“Lumbanyani e Yehova mwi Wungwe” (Ulupungu lwa kwa Kalinda, January 2019)
Lola cino calenzile umulumendo wumwi akunde vino wasambilizile pa kulongana nanti aca kuti citapepusile ukucita wo-o.
Awavule ndi walola wumwi ali nu musalawa wakati amwina Klistu, nomba uzye tufwile ukuwuwomvya pa kupepa?
“Amulandu ci Wuno Inte zya kwe Yehova Wasiwomvezya Umusalawa pa Kupepa?” (Icipande ca pa webusayiti)
a Vyo-o ivisinka vililandwapo mu masambililo yano yali kunkolelo.
Mungakunda na vyoo
AMAWUZYO YANO AWANTU WAKAWUZYAPO SANA
Uzye Isambililo lye Baibolo Ilya Nte zya kwe Yehova Lyawa Wuli?
Mwe lyoo isambililo lino Inte zya kwe Yehova wakasambilila na wantu uwiilanye, mungawomvya e Baibolo iyili yonsinye ino mukulonda. Mungitako na wali wonsinye wano mukulonda.
