E Yesu walanzile ukuti umwina Klistu wensinye azipizile ukubatizwa. (Wazya Mateyu 28:19, 20.) Uzye nomba ulubatizyo acani? Swinya avyani vino umuntu azipizile ukucita pakuti afikepo ukubatizwa?

1. Uzye ulubatizyo acani?

Izwi lya kuti “ulubatizyo” lyafuma kwi zwi lya ciGreek lino likasula ukuti “ukutumpika” mu minzi. Pano e Yesu wabatizwanga, wamusiwizizye mu Luzi lwa Yordani, swinya “wazuwusile muminzi.” (Marko 1:9, 10) Wonye avino cawa na ku wina Klistu wacisinka. Wakawatumpika akuli ukuti ukuwasiwizya umuwili wonsinye mu minzi pakubatizwa.

2. Uzye umuntu ndi wabatizwa akalanjizya cani?

Umuntu ndi wabatizwa akalanjizya ukuti ayipile kwe Yehova. Nomba uzye wumwi akayipa wuli? Pano atani abatizwe, akanena Yehova mwi pepo ukuti akulonda amuwombela uwumi wakwe wonsinye. Mwe lyo-o ipepo akamulaya ukuti aliwamupepa wenganye nsu, nu kuti icintu cino alicindamika mu wumi wakwe akucita vino Yehova akalonda. Akasolapo ukucita vino Yesu walanzile ukuti “nd’ayikane, . . . ankonke nene.” Akatwalilila ukukonka vino Yesu wasambilizyanga ni cakulolelako cakwe. (Mateyu 16:24) Ukuyipa nu kubatizwa kukamupa ulongo lwa kuwa e ciwuza wa kwe Yehova, nu kuwa ciwuza we wano wakamupepa.

3. Avyani vino wumwi azipizile ukucita pano atani abatizwe?

Cacindama nkaninye pano utani ubatizwe ukusambilila pe Yehova nu kuwomya isuwilo lyako mwe weliwe. (Wazya Waheberi 11:6.) Pano isuwilo lyako likuya likuwomelako swinya ukuya ukumanyilako ivivule pe Yehova, apano uliwaya ukumukundilako. Ukwasowa nukuvwilika nga wacita wo-o, uliwalondesya ukusambilizya wanji pe weliwe nu kwikala ukulingana na masundo yakwe. (2 Timoti 4:2; 1 Yohani 5:3) Nga cakuti umuntu “akwikala ndi muno Imfumu yikulondela, akucita penye ukulonda kwakwe,” angasolapo ukuyipa nu kubatizwa.—Wakolose 1:9, 10. a

 SAMBILILA IVICILE PA-A

4. Tungasambililako ku lubatizyo lwa kwe Yesu

Wazyani Mateyu 3:13-17 pa kusambilila ivivule ku lubatizyo lwa kwe Yesu, nu kulanzyanya ya-a amawuzyo:

• Uzye e Yesu walinji akanya pano wabatizwanga?

• Wabatizizwe wuli? Uzye wamusansilevye aminzi?

E Yesu watalisile ukuwomba umulimo uwucindame wuno Leza wamupile pansizi yakubatizwa. Wazyani Luka 3:21-23; ne Yohani 6:38, nu kulanzyanya lyo-o iwuzyo:

• Pano e Yesu wabatizizwe, amulimo ci uwucindame wuno wawisile pankolelo mu wumi wakwe?

5. Ungafikapo ukubatizwa

Nga apano wivwavye pa kuyipa nu kubatizwa, ungivwa intete. Nomba nawewenye ungalunduluka ukufika na mukupingulapo wemweneco ukucita co-o icintu icicindame. Pa kusambilila pa wantu wano wapinguzilepo ukucita wo-o, Tambani e VIDYO.

Wazyani Yohani 17:3 ne Jemusi 1:5, nu kulanzyanya lyo-o iwuzyo:

• Acani cino cingavwa umuntu ukufikapo ukubatizwa?

1. Tukayipa kwe Yehova ukupitila mukumunena ukuti tukulonda twamuwombela uwumi witu wonsinye

2.  

6. Nga twabatizwa tukawa mu lupwa lwa kwe Yehova

Nga twabatizwa tukawa mu lupwa longanye insi yonsinye.  Nanti aca kuti twapusana inkulilo nu kufuma mu ncende impusane pusane, twasuwila mu vili vyonganye swinya tukakonka amasundo ayali yonganye. Wazyani Amalumbo 25:14 ne 1 Peter 2:17, nu kulanzyanya lyo-o iwuzyo:

• Uzye umuntu ndi wabatizwa wuciwuza wakwe ne Yehova na wakapepa wawuye wukawa wuli?

 IVISINKA VIKULU

E Yesu walanzile ukuti umwina Klistu wensinye azipizile ukubatizwa. Lelo pa kuti umuntu afikepo ukubatizwa, azipizile ukuwomya isuwilo lyakwe mwe Yehova, ukwikala ukulingana na masundo yakwe nu kuyipa kwe weliwe.

Avyani Vino Wasambilila?

• Uzye ulubatizyo acani, swinya amulandu ci wuno lwacindamila?

• Uzye ulubatizyo lukalanjizya cani?

• Avyani vino umuntu azipizile ukucita pano atani ayipe nu kubatizwa?