ISAMBILILO 38
Uwasalifya pa Wumi Wuno Leza Watupa
Kwawa ivintu ivivule vino tungacita nu kuyitopwa pano tucili nu wumi. Na pano tuli ni ntazinye, tungayitopwa ivizima vimwi mu wumi. Nomba tungalanjizya wuli ukuti tukasalifya pe co-o icawila cino Yehova watupa? Swinya amulandu ci wuno tuzipizile twasalifizya?
1. Amulandu ci wuno tuzipizile twasalifizya pa wumi?
Tuzipizile twasalifya pa wumi, amuno acawila cino Umukwasi witu uwa lukundo watupa. E Yehova “we ntaliko yawumi.” Awino welewuzile ivintu vyonsinye. (Amalumbo 36:9) “Awili kapa wa wumi nu kufuta na vinjinye ku wantu wonsi.” (Imilimo 17:25, 28) E Yehova akatupa vino tukalonda pa kuti tutwalilile ukuwa nu wumi. Swinya akacita ni vintu vino vikalenga twakwivwa icete ukuwa nu wumi.—Wazya Imilimo 14:17.
2. Tungalanjizya wuli kwe Yehova ukuti tukamusalifya pa wumi wuno watupa?
E Yehova watalisile ukukusakamala ukufumilila vye pano umukwasi wako walinji pa wukulu. Mwi pepo lino e David wapefile kwe Yehova, walanzile ukuti: “Wambweni pano ntani nkwatwe.” (Amalumbo 139:16) Uwumi wako wacindama nkaninye kwe Yehova. (Wazya Mateyu 10:29-31.) Fwandi e Yehova cingamuluma nkaninye nga cakuti wumwi wayikoma nanti wakoma umuwuye ku mufulonye. a (Ukufuma 20:13) Swinya angivwa uwuwi nkaninye nga cakuti twawika uwumi witu mu wusanso, nanti twakana ukukonka vimwi pa kuti tucinjilile awantu wanji. Acino nga tukuyisakamala lyonsinye nu kucindika uwumi we wanji, lyo tukulanjizya ukusalifya pa wumi wuno Yehova watupa..
SAMBILILA IVICILE PA-A
Lola inzila zimwi zino ungalanjizizyamo ukuti ukasalifya pa wumi.
3. Uwasakamala uwumi
Pa mulandu wakuti twalaya Yehova ukucita vino akalonda, tukawomvya uwumi witu wonsinye ku kumuwombela. Cikawa ngati twapa uwumi witu ngati anzuwi kwe weliwe. Wazyani Waroma 12:1, 2, nu kulanzyanya ya-a amawuzyo:
-
Acani cino cizipizile ukulenga uwasakamala uwumi wako?
-
Anzila ci zimwi zino ungasakamalilamo uwumi wako?
4. Uwacita vino vitanga vilenge wumwi ukuyicisa nanti ukufwa
E Baibolo yikatuwomelezya ukuti tuzipizile ukufuntuka ku vili vyonsinye vino vingatuletelela. Tambani e VIDYO pa kusambilila vino mungacita pa kuti mwayicinjilila.
Wazyani Imilumbe 22:3, nu kulanzyanya vino wewe na wanji mungayicinjilila . . .
-
pa ng’anda.
-
ku ncito.
-
kuno mukakwizizya.
-
pano mukulunjisya cimwi nanti muli pa wulendo.
5. Mwacindika uwumi wa mwana wino atani akwatwe
E Davidi walondolozile ukuti, e Yehova akawikako sana amano kwe vyonsinye vino vikacitika nga ca kuti umwana ali munda. Wazyani Amalumbo 139:13-15, 17, nu kulanzyanya lyo-o iwuzyo:
-
Uzye e Yehova akalola ukuti uwumi wa muntu wukatalika mpindi ci, pano wakwatwa nanti pano nyina ali pa wukulu?
Amasundo yano Yehova wapile awina Israeli yacinjililanga e nyina nu mwana wino atani akwatwe. Wazyani Ukufuma 21:22, 23, nu kulanzyanya ya-a amawuzyo:
-
Uzye e Yehova walolanga wuli wino wakoma umwana mukukanamanya wino atani akwatwe?
-
Uzye angivwa wuli nga cakuti wumwi wacita wo-o kumufulonye? b
-
Uzye wivwa wuli pe wo-o vino Yehova akalola uwumi wa muntu?
Nu mwanacinye wino wamanya vino uwumi wacindama angatalika ukulola ngati cila muntu angayisolelapo pa kuponya uwula nanti awe. Wazyani Ayizeya 41:10, nu kulazyanya lyo-o iwuzyo:
-
Uzye umwanaci nga wakumupaticizya ukuponya uwuula, azipizile ukuya kwa weni pakuti wamwavwe? swinya amulandu ci?
WAMWI WAKATI: “Umwanaci wawa ni nsambu zya kuponya ifumo, amuno alifumo lyakwe.”
-
Acani cino calenga usinincizye ukuti e Yehova wacindika uwumi we nyina nu wa mwana wino atani akwatwe?
IVISINKA VIKULU
E Baibolo yikatusambilizya ukukunda, ukucindika nu kucinjilila uwumi. Co-o cikusanzyamo uwumi witu nu wewanji.
Avyani Vino Wasambilila?
-
Amulandu ci wuno uwumi wa muntu wacindamila kwe Yehova?
-
Uzye e Yehova akayivwa wuli nga cakuti wumwi wakoma umuntu ku mufulonye ?
-
Amulandu ci wuno ukasalifizya pa kuwa nu wumi?
MANYILAPO NA VINJI
Avyani vino tungacita pa kusalifya Yehova pa wumi wuno watupa?
Zana icasuko kwi wuzyo lya kuti, Uzye e Leza angatetela umwanaci wino waponizyepo uwula?
“Avyani Vino Baibolo Ikalanda pa Kuponya Uwula?” (Icipande ca pa webusayiti)
Sambilila vino ukulola uwumi ndi vino Leza akawulola kungatwavwa ukusola indwizyo zino zitanga zituwike mu wusanso.
“Uzye Muzipizile Ukuwika Uwumi Winu mu Wusanso pa Mulandu ni Ndwizyo?” (Loleni!, October 8, 2000)
Lola vino e Baibolo ingavwa umuntu wino akuvwamba ukuyikoma.
“Uzye e Baibolo Ingakwavwa nga Ukulonda Ukuyikoma?” (Icipande ca pa webusayiti)
a E Yehova akawikako sana amano kwe wonsinye wano wali nu wulanda. (Amalumbo 34:18) Akamanya cino cingalenga wumwi avwamba ukuyikoma swinya akalondesya nu kwavwa awantu wa musango wo-o. Pa kulola vino ukwavwa kwakwe kungalenga wumwi ukuleka ukwelenganya pa kuyikoma, wazya icipande ca pa webusayiti cino cikuti “Uzye e Baibolo Ingakwavwa nga Ukulonda Ukuyikoma?” cino cili mwe lyonye isambililo mu ciputulwa cakuti Manyilapo na Vinji.
b Wano waponyapo amafumo watazipizile ukuyipa imilandu, amuno e Yehova angawatetela. Pa kumanyilapo na vinji, lola icipande cakuti, “Avyani Vino Baibolo Ikalanda pa Kuponya Ifumo?” cino cili pa luwali lwakuti Manyilapo na Vinji mwe lyonye isambililo.
Mungakunda na vyoo
AMAWUZYO YANO AWANTU WAKAWUZYAPO SANA
Uzye Isambililo lye Baibolo Ilya Nte zya kwe Yehova Lyawa Wuli?
Mwe lyoo isambililo lino Inte zya kwe Yehova wakasambilila na wantu uwiilanye, mungawomvya e Baibolo iyili yonsinye ino mukulonda. Mungitako na wali wonsinye wano mukulonda.
