Swensinye tukulonda ivizima vize viwatuciticila ponga nu lupwa lwitu mu 2023. Amulandu ci wuno tungawela ni suwilo lyakuti ivintu vilizipa kunkolelo?

 E Baibolo ikatunena ilyasi ilizima ilyakuti intazi zino tukupitamo pe yo-o impindi azya pakampindi vye katici swinya zyandi zisile nombanyene. Nga kukonkavye, wonye awuli umulandu wuno Baibolo yalembezilwe “kukutusambilizya alyakuti tuwalolela. . . ninsimpo zino Amawaliko Matele yatupa.”​—Waroma 15:4.

•   Pakumanyilapo na vinji pa malayo ya mu Baibolo, wazyani icipande cino cikuti “Isuwilo lya Kuti Ivintu Vilizipa ku Nkolelo.”

 Isuwilo lya mu Baibolo lingawa ngati “aliwe mumyezo yitu.” (Waheberi 6:19) Lingatuteka imyezo nukutwavwa ukusipicizya intazi zino tukupitamo. Tungawa ni suwilo lyakunkolelo ni nsansa zino zisisila. Ku cakulolelako:

•   Lolani vino isuwilo lya mu Baibolo lyavwizye umonsi wumwi wino wakunkumile kwi paala. Tambani vidyo yakuti Navwambisyanga Ukuleka Ukumwa Ipala.

•   Lolani vino isuwilo lya mu Baibolo lingatwavwa nga twafwilwa. Tambani vidyo yakuti Cino Cingasansamusya mwe Wano Mufwizilwe.

 Awantu awavule wakakwenecela ukuwa ni vintu ivizima, lelo wasimanya nga ca kuti vilitela vicitike nukucitika. Amalayo ya mu Baibolo yeni yapusanako. Nu mulandu awakuti, wino watulaya we Yehova, e Leza a umweneconye wino “atanga awipe.” (Taitasi 1:2) E Yehova mutupunye awino wawa na maka yakuficilisya yonsinye ya-a amalayo, angacita “consinye cino akulonda ukucita.”​—Amalumbo 135:5, 6.

 Lekani isuwilo lya mu Baibolo liwamiwomya. Mungawomya isuwilo linu nga ‘mukuvwambilizya sana mu Mawaliko.’ (Imilimo 17:11) Sambililani Baibolo nasweswe pakuti isuwilo linu liwawomelako. Talikani umwaka uwupya uwa 2023 ni suwilo lyakuti ivintu vilizipa kunkolelo!