LOLANJI!
Cino Cingatupa Isuwilo mu 2024—Avyani Vino Baibolo Ikalanda?
Awavule wakakwelenganya ukuti kusi nanti cimwinye cino cilimala intazi zino twandi tuwapitamo mu 2024. Ukuwa nanti ciwe wo-o, tungazana vino vingatupa isuwilo lya kunkolelo. Avyani vyovyonye?
Baibolo ikatupa isuwilo
Baibolo ikatulaya ukuti e Leza alimala intazi zyonsinye zino zikatumalila isuwilo. Ikati, e Leza “wandi awapyele aminsozi yonsi mu minso yawo. Kutaliwa imfwa swinya, amalanda yataliwapo, nant’ akulila, nant’ awulumilanye. Ivintu vikali vyasowa napano vyaya.”—Ukuwumbulika 21:4.
Ngukasi ukumanyilapo na vinji pe vino Baibolo yalaya ukuti avino vilicitika kunkolelo, wazya ilyasi lya kuti “Isuwilo lya Kuti Ivintu Vilizipa ku Nkolelo Alya Cisinka.”
Vino Baibolo ingakwavwa
Baibolo ikatupa isuwilo lino lingakwavwa nawewenye ukuleka ukuyivwa ukuti ivintu vitalitela vizipepo, swinya ungakwenecela nukuti ivintu vilizipa. (Waroma 15:13) Ukupanda amano kwa mu Baibolo kungakwavwa ukusipicizya intazi zino ungasunkanya, ndi vino icipowe nu lufyengo, kungakwavwa na pano walwala nanti walwalika.
Lola vino isuwilo lya mwe Baibolo lyavwizye umonsi wumwi ukuwa nu mutende ni nsansa asa mulandu nu wupiina. Tamba vidyo yakuti Juan Pablo Zermeño: Yehova Wanjavwa Ukuwa ni Nsansa zya Cisinka.
Lola vino Baibolo ingakwavwa ndi ukuyipa imilandu, pano uli nu wulanda, pano usakamisilwe, nga na vino ungacita nga wafwilwa. Wazya icipande cakuti “Uzye mwe Baibolo Mungazanwa Amazwi Yano Yangambomelezya?”
Lola vino Baibolo yavwizye umwanaci wumwi wino walinji amusoja ku nsizi wino wayilondolozile ukuti “ntawikanga amano ku wantu”. Tamba vidyo yakuti Nalesile Uwusoja.
Uleke umwaka wa 2024 wuwe amwaka uwuzima, kwe wewe, na kuwa mu lupwa lwako. Pakuti ciwe wo-o, sambilila na vinji pe vino Baibolo ingakwavwa. Yelezya ukusambilila Baibolo. Lola vino e Leza angakupa “amelenganyo ya mutende” ni “mpindi ya kunkolelo ni suwilo.”—Jeremiya 29:11.