Pa myaka 30 yino yapita awantu walolanga ukuti pawa ukulemenkana pa nsi mvule. Lelo ivintu vino vicitisile lwa nombanye vikulanjizya ukuti co-o asacisinka.

•   “Awantu wakusakamala ukuti inkondo yino yili ku Gaza yililenga ni zya nsi zinji zino zyawa mupipi zitalike ukulwa nga cakuti e Esrael watalika ukulwa ne Hezbollah pe mumpaka wa Lebanon”​—Reuters, January 6, 2024.

•   “Amawumba yano yakatungululwa ne Iran wakusansa mu ncende indekane-ndekane swinya e Iran yitalisile ukupanga na swinyanye ivyanzo vyakulwila. Cinji acakuti e China ne Rusia pe yo-o impindi wakutunjilila e Iran. Co-o cikulenga izyansi zino zyawa ku Kasika ukusakamikwa nkaninye.”​—The New York Times, January 7, 2024.

•   “E Russia yicili yitwalilizile ukusansa e Ukraine nu konona sana ivintu.”​—UN News, January 11, 2024.

•   “Ku China awasilika wakuya wakuvulilako nu wulonsi wansi wukuyilakovye papela. Ne insi ya Taiwan yikuya yikuwelako ni cilumba swinya ukukanayivwana kuno kwawa pakasi ke China ne US kukuyilakovye pankolelo. Vyo-o vyonsinye vingalenga ukuti ivyongo vikatuke impindi iyili yonsinye.”​—The Japan Times, January 9, 2024.

 Uzye e Baibolo yandapo vimwi pe vyo-o vyonsinye vino tukulola mwe ya-a amanda? Uzye vililenga kuwe inkondo ya nsi yonsi?

 Kweni e Baibolo yitalandizile lyankani mukulungatika inkondo zino ziliwa zyacitika, lelo yalanzile ukuti kuliwa kwawa izyankondo zino ‘ziliwafumya umutende munsi.’​—Ukuwumbulika 6:4.

 E Daniel walandizile lyankani ukuti “mumanda yakupelelecezya,” insi zya maka ‘ziliwalwisyanya’ nanti ukulwila ukuti wawe na maka. Ko-o ukulwisyanya kusanzizyemo ukulanjizya vino wawa na maka nukuwomvya “insawo” nanti indalama imvule.​—Daniel 11:40, 42, 43.

 E Baibolo yalanda ukuti ivintu viliwawipilakovye munsi pano vitani vizipe. E Yesu walandizile lyankani ukuti kuliwa “itamyo lyakutinia lino lisitela liweko ilyamwatanye wowo ukutalichila pano insi yalile iyelewulilwa nukufika ilelo. Nanti akwiza litalitela lize swinya.” (Mateyu 24:21) Lyolyo “itamyo lyakutinya” lililenga kuwe e Armagedoni, yino ikakwitwa ukuti ‘isumo[inkondo] lyawanda wukulu uwakwe Leza.’​—Ukuwumbulika 16:14, 16.

 Nanti ciwe wo-o, e Armagedoni yeni yilipususya awantu asakuwonona. Swinya e Leza aliyonona amawuteko ya munsi yano yakalenga kwawa izyankondo, ukuwomvya yonye inkondo. Pakumanya vino Armagedoni yilileta umutende umuyayaya, wazyani icipande cakuti:

•   “Uzye Inkondo ya Armagedoni Acani?”

•   “Tulafwaisha Ukuti Armagedone Ikese!”