LOLANJI!
Amulandu ci Wuno Ulupato Lwavulila?—Vino Baibolo Yikalanda
Amalipoti mwe ya-a amanda yakulanda nkani pa wantu wano wakalanda iviwipe nukucita iviwipe kwe wanji pa mulandu wakapatulula ka nkanda, umutundu nga na pa mulandu wakuti wumwi akutunjilila akawungwe ka vikanza vya nsi kanji.
“Pa mulandu ni vyongo vino vili pakasi ke Gaza nu Israel nga na pa mulandu wa wantu wano wakatunjilila ivyongo nu lupato, cilenzile wamwi pa intaneti walanda iviwipe.”—The New York Times, November 15, 2023.
“Ukufumilila pa 7 October, imilandile miwipe nu wunkalwe pa mulandu nakapatulula apano vivulizileko ukulusya na vino calinji ku nsizi.”—E Dennis Francis, e prezidenti wakawungwe ka United Nations General Assembly, November 3, 2023.
Vyo-o ivintu asa pano vyatalika. Nakuwa e Baibolo yalandapo pa wa ku nsizi ukuti ‘walasanga amazwi yawo ngati amivwi’ walwanga inkondo nu kucita uwunkalwe. (Amalumbo 64:3; 120:7; 140:1) Lelo nanti ciwe wo-o, e Baibolo yikalanda ukuti vyo-o vino vikucitika vyawa nu wupiliwulo uwucindame.
Ulupato lukulanjizya ukuti tuli mu manda yakulecelzya
E Baibolo yalanda pa vintu viwili vino vikulenga ulupato ukuvula mwe ya-a amanda
1. Yalandizile lyankani ukuti ‘ulukundo lwa wantu lulicepa.’ (Mateyu 24:12) Mucifulo cakukundana, awantu wakacita vino vingalenga wapatane.—2 Timoti 3:1-5.
2. E Satana awino akulenga ukuti vyonsinye vyo-o vyacitika. Amuno e Baibolo yikati, “awamunsi wanyepwa nu muwipe.”—1 Yohani 5:19; Ukuwumbulika 12:9, 12.
Lelo e Baibolo yalanda nu kuti e Leza ali nu kufumya vyonsinye vino vikaleta ulupato. Swinya alifumyapo vyonsinye vino vikalenga twayimba pa mulandu nu lupato. E Baibolo yalaya ukuti:
E Leza “wandi awapyele aminsozi yonsi muminso yawo. Kutaliwa imfwa swinya, amalanda yataliwapo, nant’ akulila, nant’ awulumilanye. Ivintu vikali vyasowa napano vyaya.”—Ukuwumbulika 21:4.