Incito nga yasila, mungapotwa ukwakuzana indalama swinya mungafulwa nukusakamikwa. Ukupanda amano ukwa mu Baibolo kuno kwakonkapo kungamyavwa pano incito yasila.

•   Simicilaniko wanji vino mukuyivwa.

   Vino Baibolo ikalanda: “Ukutemwa kwe ciwuza wa cisinka kusisila.”​—Imilumbe 17:17.

   Incito nga yasila, mungakwivwa uwuwi, mungafulwa nanti amano yangavulungana. Mungalola ngati mwe wampotwa. Lelo nga mwasimicilako walupwa lwinu ni viwuza vino mukuyivwa, wangamiwomelezya ica kuti mungaleka nukuyivwa vino mukuyivwa. Wangamyavwa nukuzana incito na yinji iya kuwomba.

•   Mutati muwasakamikwa nkani.

   Vino Baibolo ikalanda: “Mutize muwapechela ivya mutondo; amuno umutondo wukayipechela uwenecho wonga.”​—Mateyu 6:34.

   E Baibolo ikatunena ukwelenganizizya lyankani ivya kunkolelo. (Imilumbe 21:5) Lelo ikatunena nukukasakamikwa ukucila mu cipimo, akuli ukuti ukutalika ukusakamala sana ivya kunkolelo. Ilivule vino tukasakamala nukusakamala visikwiza na mukucitika. Cikazipa ukuwika vye amano pe vino tungacita pe wowonye uwanda wuno tuli nuwumi.

   E Baibolo ikatupandako amano amazima nkaninye pe vino tungacita pakuti tutasakamikwa nkani. Nga mukulonda ukumanyilapo na vinji wazyani icipande ca kuti “Vino Mungacita pa Kuti Mutasakamikwa Nkani.”

•   Pilukaniko mwe vino mukawomvya indalama.

   Vino Baibolo ikalanda: “Namanya . . . pano nkutavuzya napano nasowelwa.”​—Wafilipi 4:12.

   Pilukaniko mwe vimwi. Mukucita woo mwasanzyamo, ukupiluka mwe vino mukawomvya indalama pakuti mutati mwamala indalama zyonsinye na zino temusyazile nazyo. Mutati muwakongola cikongole kongole.​—Imilumbe 22:7.

   Lolani icipande cakuti “Ivya Kwikala ni Ndalama Zino Mukweti” pakuti mulole vino mungacita nga mukulonda ukupilukako mwe vino mukuwomvya indalama.

•   Mwawomvya icete impindi.

   Vino Baibolo ikalanda: “Muwawa namano . . . , muyilolele impindi.”​—Wakolose 4:5.

   Nanti acakuti musiya ku ncito cila wanda, muwatantika vino mwandi mwawomvya impindi yino mwawomvyanga pano mwayanga ku ncito. Nga mwacita woo mulitalika ukwivwako icete.

•   Mutati mwasola incito ya kuwomba.

   Vino Baibolo ikalanda: “Wombanga apano ungawa nichakulya.”​—Imilumbe 14:23.

   Muwayikundila ukuwomba incito iyili yonsinye. Mungawomba na zilyanye zino mwasula nanti azilyanye zino wangamifolesya vye indalama intici nga kukolanya kwe yino mwawombanga pa kutalika.

•   Muwatwalilila ukuvwamba incito.

   Vino Baibolo ikalanda: “Ukukomela pamwi ukutanda kwazipila umutondo-tondo namanguzi; amuno utanga umanye ndimbeyu yonsi ingamela ichete, pamwi ndi ukukomela kwampindi yimwi akuno kungachita ichete.”​—Ekawizya 11:6.

   Muwatwalilila ukuvwamba incito. Nenaniko na wanji ukuti mukuvwamba incito yakuwomba. Munganenako wa lupwa lwinu, Iviwuza, wano mwawombanga nawo kaali, na wina mupalamano winu. Muwalola kuno wakakwinjizya incito, mu manyuzipepala nanti apali ponsinye pano wawisile amazwi yakuti wakulonda awa ncito. Muwakwizuka lyonsinye ukuti impindi zimwi mungalembela ukuvule pakuti vye incito iloleke.