Ukononwa kwa nsi. Impindi zimwi awantu wakalanda pe lyoo ilyasi. Wakakwelenganya ukuti wuliwa awononi uwukulu, pamwi muno mulisanzyamo ukonona ivya wumi vyonsinye munsi. Wamwi wazumila mukuti nombanye ica musango woo candi cicitike, wakazumila na nkani woo nga wivwa amalipoti ya pa nyuzi aya musango ndi woo:

•   “Inkondo ya manyukiliya ingiza italike. Wangiza wayitalike mukukanamanya, mukumanya nanti pa mulandu wakukanaivwana.”​—Bulletin of the Atomic Scientists.

•   “Mu myaka 10 yino yapitapo, kwalinji ivimiza ivikalambane, imililo zya mpanga, ivilala, ivilungula ni zya ntalala.”​—National Geographic.

•   “Mu Afica mukaponda impanzi zino zikakonona ivintu ukucila na vino calinji imyaka yino yapitapo.”​—The Associated Press.

 Uzye insi iliyononwa? Nga e Baibolo ikati wuli?

 Icasuko we awe. Izwi lya kwe Leza, e Baibolo, likatunena ukuti insi ilitwalilila ukuwako ku ciyayaya. (Ekawizya 1:4) E Leza ataliyonona insi yino welewuzile lelo aliyonona “wano wakakonona insi!”​—Ukuwumbulika 11:18.

 Ukulingana ne Baibolo, izwi lya kuti “insi” likasula awantu wano wakakana ukutontela e Leza lelo wano wakalonda ukuyicitila vino wakulonda. Wulyanye vino wacisile mu manda ya kwe Noa, avino aliyiza alovye “awantu wano watamanya Leza.”​—2 Peter 2:5; 3:7.

 Pe 1 Yohani 2:17 pakati, “insi navyonsi vino awantu wakakumbuchila vilizimanjika.” Yoo e versi ikatulanjizya ukuti cino e Leza aliyonona asa nsi yino tukakwikalamo, lelo aliyonona awantu wano wakatwalilila ukucita iviwipe.

 E Baibolo itatuwumbulila uwanda wuno insilo yiliyiza. (Mateyu 24:36) Lelo ikalanjizya ukuti nsilo ipalamizile nkaninye. E Baibolo ikalandila lya nkani vino vyakonkapo:

•   Ivintu ndi vino izyankondo, inzala, izyandwala, ni vizumanzi ukuti viliwacitika ‘mu ncende yonga ni mbuye.’​—Mateyu 24:3, 7, 14; Luka 21:10, 11; Ukuwumbulika 6:1-8.

•   Awantu waliyikunda nkaninye. Ku cakulolelako, “walikunda indalama,” “imintasalifya,” swinya “wano watayilama.”​—2 Timoti 3:1-5.

 Awavule wakazumila ukuti ukufuma mu mwaka wa 1914, ivintu vino vyatalisile ukucitika vikalingana na vino e Baibolo yalandizile lyankani. Coo cikalanjizya ukuti insilo ipalamizile. Pakumanyilapo na vinji lolani ivipande vyakuti “Uzye Imyaka ya mu Baibolo Ikatunena Cani pa Mwaka wa 1914?” ni cakuti “Acimanyisyo ci ica ‘Manda ya Kupelelechezya,’ Nanti ‘Impindi zya Nsilo’?”

 Ibuku lya kulecelezya ilya mu Baibolo likalanda ku mpindi yino “e tatakulu e Yesu alisokololwa,” coo cilicitika pano e Yesu aliyiza na maka mukufumyap iviwipe vyonsinye munsi nukulambula wano wakapepa Leza.​—2 Watesalonika 1:6, 7; 1 Peter 1:7, 13.

 Ibuku [lyakulecelezya ilya mu Baibolo] likawumbula ivintu vino vilicitika ku nkolelo. (Ukuwumbulika 1:1) Mwe lyoo ibuku mwawa ilyasi ilizima lino likatupa isuwilo. (Ukuwumbulika 1:3) Likalanjizya ukuti e Leza alifumyapo ulufyengo lonsinye nukulenga insi yonsinye ukuwa paradaise. Pe yoyo impindi awantu wonsinye wataliwa lumika ni cili consinye, uwuyimvi wulisila ni mfwanye vyonsinye vitaliwako.​—Ukuwumbulika 21:3, 4.

 Uzye mungakunda ukumanyilapo na vinji pe yaa amalayo ya mu Baibolo? Inte zya kwe Yehova wkasambilizya Baibolo uwilanye ino ilimyavwa nkaninye. Uzye citanga cizipe ukulanda nawo ilelonye?