Insi yonsinye awavule wakati icisinka casila kaali, uwufi awuno wukuwomba yo-o impindi. Co-o calenga awavule wasolapo ukwivwa kwe vino wakwelenganya na kwe vino vikuwivwisya icete ukucila ku cisinka. Uzye mukalola ukuti pakuti wumwi amanye icisinka afwile ukuzwalisya?

 Icintu icili conganye acino cacitisile imyaka 2,000 yino yapitapo, e Kateka wa ciRoma e Ponti Pilato wakolowozizye e Yesu mitumfyo mitumfyo ukuti: “Uzye icisinka acani?” (Yohani 18:38) Nanti acakuti atalindilizile ukuti e Yesu amwasuke, iwuzyo lino wakolowozizye lya cindime nkaninye. E Baibolo ingamyavwa ukumanya vino awavule wapotwa ukumanya, akuli ukuti pa cisinka nu wufi.

Uzye molimonye icisinka akuno cawa?

 Ee, akuno cawa. Baibolo ikawomvya izwi lyakuti “icisinka” pakulozya ku vintu vino vyawa nu wusinincizyo uweneco weneco na ku miwele mizima. Ikasambilizya ukuti kwe Yehova a akuno kukafuma icisinka, ikamwita ukuti “umusuwilwa.” (Amalumbo 31:5) Mwe Baibolo mwawa icisinka cino cafuma kwe Leza, swinya ikakolanya icisinka ku luswepo. Cikatutungulula mwe vyonsinye vino vikapunzinkanya awantu mwe yo-o insi.​—Amalumbo 43:3; Yohani 17:17.

Uzye mungacita wuli pakuti muzane icisinka?

 Yehova asilonda twazumila consinye cino watunena mwi Zwi lyakwe e Baibolo. Lelo akalonda twayelenganizizya sweweneco, pakuti napano tukuzumila, lyo tumanyile na cino tukuzumilila. Akatunena ukuwomvya amaka yitu ayakupelulula, asa kukoncelela vino tukuyivwa vye. (Waroma 12:1) Akalonda tumumanye nu kumukunda na “melenganyo yitu yonsinye” swinya akalonda tuwayisinincizizya sweweneco ukuti vino tukusambilila mwe Baibolo avisinka.​—Mateyu 22:37, 38; Imilimo 17:11.

Weni watalisile uwufi?

 Baibolo ikatunena ukuti e Satana, umulwani wakwe Leza, awino watalisile uwufi. Ikamwita ukuti “echanyina wawufi.” (Yohani 8:44) Wanenile awantu wakutalicilapo ivya wufi pe Leza. (Intaliko 3:1-6, 13, 17-19; 5:5) Ukufuma palyanye pano wawipizile uwufi wakutalicilapo, watwalilila ukuwipizya Leza nu kufisa icisinka.​—Ukuwumbulika 12:9.

Amulandu ci wuno uwufi wuvulizile mwe ya-a amanda?

 E Satana akuwomvya awantu nukuwasovya mwe ya-a amanda yano Baibolo ikakwita ukuti “amanda yakupelelechezya,” ukucila na vino calinji kaali. Uwufi wasyala ngati alwizyo, awantu wasyala wakawipa awawuye pakuti wawasovye nukuwacenjezya. (2 Timoti 3:1, 13) Uwufi wuvuzile na mumacalici amavule pe yo-o impindi. Wulyanye vino Baibolo yalandizile lyankani ukuti avino viliwacitika mu manda yitu, awantu ‘wakuyilonganichila awasambilizya wavule wano wakuwanena vino wakuluchila ukwivwa’ wasolapo, ‘ukufutatila ukwivwa ivyakusimicila.’​—2 Timoti 4:3, 4.

Amulandu ci wuno icisinka cacindamila?

 Icisinka cacindama nkaninye pakuti awantu wasuwilane. Pano pasi ukusuwilana, wuciwuza wusiwoma swinya pasiwa nukwivwana. Baibolo ikalanda ukuti e Leza akalonda imipepele yitu yiwasimpwa pa cisinka. Ikati: “Wano wakumulumbula [Leza], walewamulumbula mu Muzimu nukusimicila.” (Yohani 4:24) Nga mukasi ukumanya vino icisinka ca mu Baibolo cingamyavwa ukumanya uwufi wuno awa mu mipepele wakawipa swinya nga musakulonda ukuti muwatungululwa nu wufi, wazyani ivipande vyakuti “Umulandu Wuno Wamwi Cikawasyupila Ukutemwa Leza.”

Amulandu ci wuno e Leza akalondela ukuti manye icisinka?

 Yehova akalonda ukuti mwemwe mwize mupusuke, mutize mufwe. Nomba pakuti mwize mupusuke, mufwile ukumanya icisinka pe weliwe. (1 Timoti 2:4) Nga mwamanya amasundo ya kwe Leza yano yakalanda pa cizima ni ciwipe swinya mwatu muwayakonka nukuyakonka, muliwa ciwuza wakwe. (Amalumbo 15:1, 2) E Leza watumile Yesu ukwiza munsi pakutwavwa ukumanya icisinka. Swinya akalonda tuwakwivwila vino Yesu akasambilizya.​—Mateyu 17:5; Yohani 18:37.

Uzye Leza alifumyapo uwufi?

 Ee, aliwufumyapo. Cikamuluma nkaninye ukulola vino awantu wakawipa awawuye pakuti wawalila amasuku pa mitwe. Walaya ukuti alifumyapo wonsinye wano wakasolapo ukutwalilila ukuwipa uwufi. (Amalumbo 5:6) Nga Leza wiza wacita wo-o, alificilisya nu wulayo wakwe uwakuti: “Ukusimichila kukalandalila.”​—Imilumbe 12:19.