LOLANJI!

Avyani Vino Baibolo Yalandapo pa Mipepele Yino Ikuyisanzya mu Nkondo ya ku Ukraine?

LIZYANI

Lolani vino wakulanda pa ntunguluzi izilumbuke izya mipepele ni nkondo yino ikucitika ku Ukraine:

“E Patriarch Kirill e songo wa Calici lya Russian Orthodox, atalanzilepo icili consinye pe vino uwuteko wa Russia wucisile. . . . Icalici lyakwe litwalilizile ukulanda ivya wufi pa nsi ya Ukraine. Coo cilenzile e Putin talike ukuwomvya vyonye vino icalici likulanda pakucinjilila inkondo ino akatusizye.”—EUobserver, March 7, 2022.
“Patriarch Kirill . . . atunjilizile uwuteko wa Russia pa mazwi yano awomvizye ayakuti yoo inkondo yiwezileko ukulwisya uluwembu.”—AP News, March 8, 2022.
“Pa Monday intunguluzi ya Calici lya Ukrainian Orthodox, e Metropolitan Epiphanius I uwa ku Kyiv, wapepelelanga awantu wakwe ‘ukuya mukulwa na wasilika wa ku Russia wano wasansile insi ya Ukraine’ . . . [E Epiphanius] watili nukuti ukukoma awasilika awina Russia asaluwembu.”—Jerusalem Post, March 16, 2022.
“Sweswe wa [Ukrainian Council of Churches and Religious Organizations (UCCRO)] tuli ku luwali lwa wasilika wa ku Ukraine na wonsinye wano wakuwavwako ukulwa pakuti wacinjilile insi yitu. Tukupaala vino wakuwombesya ukucinjilila insi ya Ukraine ku mulwani witu, swinya tukuwapepelako.”—UCCRO a Statement, February 24, 2022.

Mukutipo wuli? Uzye imipepele yino ikalanda ukuti ikakonka Yesu Klistu izipizile ukuwomelezya wa membala wawo ukuya mukulwa inkondo? Avyani vino e Baibolo yalandapo?

Imipepele yatalika kaali ukuyisanzya mu nkondo

Amalyasi yakaali yakalanjizya ukuti nanti aca kuti imipepele ikayifumfunganya ukuti ikatunjilila umutende, ikazumilizya awantu ukuya ku nkondo, nukuwanena ukuti cawa icetenye ukuya mukulwa. Pa myaka imivule Inte zya kwe Yehova zyavwa awantu ukulola ukuti ukucita woo awumbimunda.

Uzye imipepele ya wina Klistu izipizile ukutunjilila inkondo?

Vino Yesu wasambilizizye: “Uwakunda umuwuyo ndivino wayikunda.” (Mateyu 22:39) “Kundanji awalwani winu.”—Mateyu 5:44-47.

Teyelenganyani: Nga cakuti imipepele ikuwomelezya wa membala wawo ukuya mukukoma wanji, uzye tungati ikwivwila isundo lyakukundana lino Yesu watunenile ukukonka? Pakumanya icasuko, wazyani ivipande vya kuti “Awina Klistu ni Nkondo” ni cakuti “Uzye Cingacitika Ukukunda Awalwani Witu?”

Vino Yesu wavwanzile: “Uwufumu wane wusi awa munsi moo; ndi uwufumu wane wutele awamunsi yoo, ngali awantu wane walwa nanti ukuti awaYuda wandeme.” (Yohani 18:36) “Wonsi wano wakasenda impanga walifwila kumpanga.”—Mateyu 26:47-52.

Teyelenganyani: Nga cakuti awina Klistu wangakana ukulwa pakuti wacinjilile e Yesu, uzye vwilani mungati kungawa ivili vyonsinye vino vingalenga waye mukulwa? Wazyani icipande ca kuti “Uzye Awina Klistu Wazipizile Ukulwako Inkondo?” pakuti mulole vino awina Klistu wakutalicilapo wakolanyanga e Yesu nu kwivwila vino wasambilizyanga.

Acani cino ciliciticila imipepele yino ikawomelezya inkondo?

E Baibolo ikasambilizya ukuti e Leza wapata imipepele yino ikalanda vye ukuti ikakwimililako e Yesu, lelo yikakana ukucita vino wasambilizizyanga.—Mateyu 7:21-23; Taitasi 1:16.

Ibuku lya Kuwumbulika likalanjizya ukuti e Leza akalola yoo imipepele ukuti yawa ni milandu ya “wazi wakwe wonsi wano wakomwa munsi.” (Ukuwumbulika 18:21, 24) Pakumanya umulandu, wazyani icipande cakuti “Uzye e Babiloni Mukulu Weweni?”
E Yesu watulanjizizye ukuti imipepele yonsinye yino Leza wakana yiliyononwa pa viwipe vino yikacita, wulyanye vino umuti uwuwipe wuno wukakoma ivikomwa iviwipe “wukaputulwa awusumbilwa mumulilo.” (Mateyu 7:15-20) Pakumanya vino coo cilicitika, wazyani icipande cakuti “Insilo ya Kupepa kwa Wufi Ipalamizile!”

Kuno ivikope vyafumile, cimani ukuya kwe ndilo: Wano wakofile awa Sefa Karacan/Anadolu Agency/Getty Images; Maxym Marusenko/NurPhoto via Getty Images

Inte zya kwe Yehova Wapusanako Nkaninye

Wulyanye vino wa Nte wa munsi yonsinye wakacita, avino na wa Nte wa mu Russia ne Ukraine wakacita. Wasiyisanzya mu vikanza vya nsi swinya wasilwako ni nkondo amuno wakakwivwila vino e Yesu wawanenile. Fwandi pa mulandu we lyoo isundo, tusitunjilila uluwali ululi lonsinye ulwe wano wakulwa. Wo-o vino twasolapo ukukonka vino Baibolo ikasambilizya, calenga wa Nte wamwi wawacuzya. (Yohani 15:19, 20; 2 Timoti 3:12) Ku cakulolelako, uwuteko wa Russia wanyepa wa Nte awavule mu cifungo. Swinya wa Nte wamwi wakawacuzya nkaninye. Asa vyoo vitupu vino uwuteko wa Russia wukacita kwa Nte, watupoka ni vifulo vitu ivyakupepelapo Leza. Ngamukulonda ukumanyilapo na vinji, yanji pa www.jw-russia.org.

Nga mukulonda ukulola vino wa Nte wa mu Russia wakuwacuzya pa mulandu ni suwilo lyawo, tambani e vidyo ya mamineti 4 iya kuti Inte zya kwe Yehova mu Irkutsk Watwalilila ni Cisinka asa Mulandu nu Kuwinjilila mu Mang’anda.
Inte zya kwe Yehova wamanyikwa ukuti wasiyisanzya mu vikanza vyansi. Tambani e vidyo yakuti Wasipicizizye Pano Wawacuzyanga pakuti mulole vino watwalilizile ni cisinka asa mulandu nukuwacuzya mu wuteko wa ci Nazi ku Germany na mu wuteko wa Soviet Union.

Mukwai lolani pa webusayiti yitu pakumanyilapo na vinji vino twazumilamo, ukusanzyako nu wulayo wa mu Baibolo uwa kuti kutaliwa inkondo swinya. (Ayizeya 2:4; Jeremiya 29:11) Nga mukulonda ukumanyila na vinji mukwai tutumilani.

a Mukawungwe ka mipepele aka UCCRO, nanti Ukrainian Council of Churches and Religious Organizations, mwasanzyamo amacalici 15 yano yakakwimililako Orthodox, Greek ne Roman Catholic, Protestanti, ni vyalici vya Evangelical ni vya waYuda na wa Muslim.

Mungakunda na vyoo

AMASAMBILIZYO YA MU BAIBOLO AMACINDAME

https://cms-imgp.jw-cdn.org/img/p/501100041/univ/art/501100041_univ_sqr_xl.jpg

mrt icipande 48

Inte zya kwe Yehova

Avyani Vino Baibolo Yalandapo pa Mipepele Yino Ikuyisanzya mu Nkondo ya ku Ukraine?

Imipepele yatalika kaali ukuyisanzya mu nkondo

Uzye imipepele ya wina Klistu izipizile ukutunjilila inkondo?

Acani cino ciliciticila imipepele yino ikawomelezya inkondo?

Mungakunda na vyoo

Uwufumu wa kwe Leza Acani?

Yelezya Ukusambilila Baibolo