Pe Cini pa 19 May, 2022, akawungwe ka United Nations Security Council kapocelezile ivyewo ku wantu 75 awa muwuteko awacindikwe ukuti “indwala ye Korona (COVID-19) isile yaponya inzala insi yonsinye. Inzala ikulizileko pa mulandu wa nkondo ino ikucitika ku Ukraine, mu ncende zimwi inzala yandi ipone nkaninye.” Patazimvile ne magazini ya kuti The Economist yakokinyepo ukuti “munsi mwandi mwizule icipowe citupunye, amuno inkondo yalundilapo vye pa ntazi mbuye zyo twawa nazyo munsi.” E Baibolo yalandizile lya nkani ukuti pe yoo impindi kuliwa ivipowe. Ikatunena na vino tungacita pano kwapona icipowe.

•    E Yesu walandizile lya nkani ukuti: “Insi zilisambuchilana ziwalwa, namawufumu yaliwachichizana. Kuliwa ivinkumbili [nanti ivipowe].”​—Mateyu 24:7.

•    Ibuku lya mu Baibolo ilya Ukuwumbulika likalondolola awonsi 4 wano wikala pa kavwalo. Wenga pe waa, akakwimililako inkondo. Ne wino wakonkapo, akakwimililako icipowe, impindi pano ciliwatala ukuzana ivya kulya, na wakakazya waliwalundilapo sana umutengo pa vyakulya. Pa Ukuwumbulika pakati “Injinula minso ndola kavwalo mutifi. Wino wakwezile pekavwalonye weyo walemile enamwezyo [isekelo] wachelelezyo cakung’wama mwikasa lyakwe. Injivwa chimwi chapunda ngati alizwi. . . Chikuti, ‘intowa yangano ayachilambu chawanda wonga, nintowa zitatu izyankumba azyachilambu chawanda wonga.’”​—Ukuwumbulika 6:5, 6, Izwi Lyakwe Leza.

 Yaa amasesemo ya mu Baibolo yano yakalanda pa vipowe yakuficiliswa mwe yaa amanda yano Baibolo ikakwita ukuti amanda “yakupelelechezya.” (2 Timoti 3:1) Nga mukulonda ukumanyilapo na vinji pa manda “yakupelelechezya” na pa kavwalo 4 wano walumbulwa mwi buku lya Ukuwumbulika, tambani vidyo yakuti Insi Yapiluka Ukufuma mu 1914, muwazye ni cipande cakuti “Uzye Awonsi Wano Wakwela pa Kawalo 4 Awaweni?”

•    Mwe Baibolo mwawa ukupanda amano ukuzima kuno kungatwavwa ukusipicizya intazi zino tukupitamo, muno musanzizyemo nu kukwela kwa mitengo ya vyakulya nivipowe vino vikupona. Lolani ivya kulolelako mu cipande ca kuti “Ivya Kwikala ni Ndalama Zino Mukweti.”

•    E Baibolo ikatupa ni suwilo lyakuti ivintu vilizipa nkaninye kunkolelo. Ikatulaya impindi pano munsi yonsinye ‘muliwa ivyakulya ivivule’ ica kuti kutaliwa wino aliwalalila ni nzala. (Amalumbo 72:16) Nga mukulonda ukumanyilapo na vinji pe lyoo isuwilo lya kunkolelo nu mulandu wuno tungawusuwilila, wazyani icipande cakuti “Isuwilo lya Kuti Ivintu Vilizipa Kunkolelo Alya Cisinka.”