Pe Ciwili pa May 23, 2023, wino akalolecesya pa wumi uwa ku United States wasocezile awantu wonsinye pa nzila zyakwivwanilapo izya pa intaneti ukuti zikonona sana awacitici.

•    “Kweni inzila zya kwivwanilapo izya pa intaneti zikwavwako awana wamwi na wacitici, lelo uwusinincizyo uwuvule wukulanjizya ukuti zyo-o inzila zikuwonona lwa ku muwili na mumelenganyo.”​—Social Media and Youth Mental Health: The U.S. Surgeon General’s Advisory, 2023.

 Vino vyakonkapo vikatwavwa ukumanya umulandu wuno tufwile ukuwicilako sana amano kwe lyo-o ilyasi.

•    Awacitici awamyaka ukutalicila pe 12 ukufika kwe 15 “wano wasumbanga ama awazi yatatu cilawanda pa intaneti wakulanzyanzya na wanji awano wawanga sana ni ndwala ya mumelenganyo. Muno musanzizyemo ni ndwala ya masakamika.”

•    Nga cakuti awana wa myaka 14, “wasumba sana impindi pa intaneti wakulanzyanya na wanji, ilivule wapotwanga ukulala icete, wawacuzyanga pa intaneti, wasyalanga wakuyilola awasulwe, wayipatanga vino wakaloleka, swinya wawanga sana nu wulanda. Ukuyivwa uwulanda kwakuzile sana mu wakazyana ukucila mu walumendo.”

 Avyani vino awakwasi wangacita pakucinjilila awana wawo kwe vyonsinyene vyo-o? Mwe Baibolo mwawa ukupanda amano kuno kungawavwa.

 Mutalecela awana. Muwakwelenganya pa viwipe vino vyawamo mukuwomvya inzila zya kwivwanilapo izya pa intaneti nukupingulapo nga umwana winu azipizile ukuwomvya intaneti nanti awe.

•    Icisinka ca mu Baibolo: “Sambilizya umwana imiwele yamyikalile.”​—Imilumbe 22:6.

•    Nga mukulonda ukumanyilapo na vinji, wazyani icipande cakuti “Uzye Umwana Wane Awomvya Intaneti?”

 Nga mwazumilizya umwana winu ukuti awomvya intaneti, muwawikako sana amano kwe vino akucita pa intaneti nukulola vino vingamuletelela. Mungacita wuli wo-o?

 Cinjililani umwana winu kwe vino vingamonona. Sambilizyani umwana winu ivya kumanya vino vingamonona ni vyakucita pakuti atavilola nanti ukuviwazya.

•    Icisinka ca mu Baibolo: “Kutize kuwawa uwuwzelele, nanti alikombezya, nanti alikumbuchila mwakwe mwemwe, nanti akutakwa vitize viwatakwa, . . . Nanti akuvwanga kwawuwelewele, nanti amazwi mawipe.”​—Waefeso 5:3, 4.

•    Uzye mwamanya vino mungacita? Wazyani icipande cakuti “Ukusambilizya Umwana Winu Uwacitici Ukumanya Ivya Kuyicinjilila Pano Akuwomvya Intaneti.”

 Muwicilani impindi yakuwa pa intaneti. Ku cakulolelako, wikani amasundo pa mpindi yakutalika ukuwomvya intanenti nimpindi yino azipizile ukufumapo.

•    Icisinka ca mu Baibolo: “Muwalolechesya ichete muno mukupitila . . . ngati awamano, [muwawomvya icete impindi yinu].”​—Waefeso 5:15, 16.

•    Twakadoli twakulemba Muwacenjela Pano Mukuwomvya Intaneti pakwavwa umwana winu ukwivwicisya umulandu wuno kufwile ukuwela amasundo ya mpindi yino azipizile ukusumba pa intaneti.