Surasak Suwanmake/Moment via Getty Images
LOLANJI!
Kukulungula Nkaninye mu 2023—Acani Cino Baibolo Ikalanda?
Awantu insi yonsinye wakucula ku cilungula cino ciliko munsi. Wakuyimba na ku mawusanso yano yakupona pa mulandu we vino kukupya. Mulole amalipoti yano yakonkapo:
“Pa myaka 174 yino yapitapo, wo-o umwezi wa June awuno wupile nkaninye, ngakuwulinganya kwe vino wafuma wakapima kunsizi.”—Dipatimenti ya Commerce iya ku U.S iya National Oceanic nu Atmospheric Administration, iya pa, July 13, 2023.
“Munsi ya Italy, Spain, France, Germany ne Poland, mukupita icimuza icilungule nkaninye cino cingapya ukufika na kwe 48°C. Ne ivilila vya Sicily nu, avino vyandi vipye nkaninye mu Europe.”—Ukulingana ne lipoti ya kwa European Space Agency, iya pa July 13, 2023.
“Pano insi yikuya yikulungula nkaninye, tukwenecela ukuti kwandi kuwawa imvula inkulu, co-o candi calenga kwawa wamulamba awawipe.”—Ukulingana ne lipoti ya kwa Stefan Uhlenbrook, director of hydrology, water and cryosphere at the World Meteorological Organization, iya pa July 17, 2023.
Uzye ukwivwa kwe ya-a amalipoti kukamitinya? Lolani vino Baibolo ikalanda pe lyo-o ilyasi lino lipamvizye.
Uzye ivilungula vino viliko vikuficilisya uwusesemo wa mu Baibolo?
Ee. Ivilungula ni miza imipye yino yiliko munsi, yilingine na vino Baibolo yalandizile lya nkani ukuti avino viliwacitika mwe ya-a amanda yitu. Ku cakulolelako e Yesu walandizile lya nkani ukuti tuliwalola ‘ivintu vyakutinya,’ nanti “ivintu viwipe ivikulu.” (Luka 21:11; Izwi Lyakwe Leza) Ivilungula vino vikuyilako vye papela vikalenga awavule wasaya ukuti awantu walisuka walenge insi yiwe acavye icakuti kusi nanti wumwi wino aliwakwikalamo.
Uzye insi yilitela yisyale acavye?
Awe. E Leza welewuzile insi ukuwa akaya kitu umuyayaya. Atalitela azumilizye awantu ukonona insi, yisyale nge cakusumba vye icakuti pasi na wino angikalamo. (Amalumbo 115:16; Ekawizya 1:4) Watulaya ukuti aliyonona wano “wakakonona nsi!”—Ukuwumbulika 11:18.
E Baibolo ikalanjizya ukuti e Leza wawa na maka yakucinjilila insi ku masanso yonsinye, swinya wonye wo-o avino alicita.
Baibolo ikati: “[Leza akaleka] ichipunga achitekana; namang’wimbi ayamyalala.” (Amalumbo 107:29) Leza wawa na maka pa vyelewulwa vyonsinye vino vingaleta uwusanso swinya angavilesya. Angafumyapo vyonsinye vino vikalenga kwawa amasanso yano yakalenga awantu watalika ukuyimba pa mulandu wa cilungula.
Baibolo ikati “Ukatuma imvula kukusayila insi; uleka iwa numuvundo.” (Amalumbo 65:9) E Leza alilenga insi yonsinye ukuwa paradaise.
Pakumanyilapo na vinji pe vino Baibolo yalaya ukuti insi yilizipa, lolani icipande ca mu Ciwemba icakuti “Weni Alipususya Insi?”