Uzye Ukuwozya Kulitela Kusile?
Ukuwozya awa mu wuteko, ayili intazi ino iliko insi yonsinye, swinya mukufuma iviwipe. a Ku cakulolelako, pano kwalinji ndwala ye COVID-19, munsi imvule, awawomvi wa muwuteko wawapanga imilandu kwe wanji ukuti wakuwinila pa ndalama zino zifwile ukuwomba ku ndwala ye Korona. Ukucita woo kwalenganga awantu watawapa imilembo ino yalondekwanga pakuti wapoole, ica kuti awavule waculanga nukufwa.
Intazi yakuwozya yafika apatali nkaninye. Ku cakulolelako e David Cameron wino walinjipo we prime minister munsi ya United Kingdom, watili: “Ukuwozya kwazinguluka insi yonsinye. Cila nsi yawa na wantu wa muwuteko wano wikalila mukuwozya.”
Lelo tungalanda vye ukwasowa nukupita mu mbali ukuti ukuwozya konsinye kwandi kusile nombanye Amulandu ci? Mulole vino Baibolo ikalanda ukuti avino Leza alicita.
Umulandu wuno twamanyila ukuti Leza alicitapo cimwi pakufumapo ukuwozya
E Baibolo ikalanda yaa amazwi yano Leza nalwakwe wavwanga ayakuti: ‘Nene, ne Yehova, nakunda umulinganya, napata uwung’o nuwuwipe.’ b (Ayizeya 61:8) Awantu ndi wakucula pa mulandu we vyo vikafumamo mukuwozya, e Leza akamanya. (Imilumbe 14:31) Walaya ukuti: “Awalanda wakunyonjelechezwa, . . . Nandi mbatule.”—Amalumbo 12:5.
Avyani vino Leza alicita? E Yehova atalitalika ukuzifya yaa amawuteko awe, lelo aliyapyanicizyapo nu wuteko wakwe uwa mwiyulu wuno wukakwitwa ukuti “Uwufumu wakwe Leza.” (Marko 1:14, 15; Mateyu 6:10) E Baibolo ikavwanga ukuti: “E Leza wamwiyulu aliyimika Uwufumu . . . wulimongolania amawufumu wuyalovye, wize wuwe awufumu amanda yonsi.” (Daniel 2:44) E Leza ndi wiza wafumyapo amawuteko yonsinye, apano nukuwozya konsinye kuno tukulola munsi kulisilila.
Uwuteko muno mutaliwa ukuwozya
Twamanya wuli ukuti mu wuteko wa kwe Leza mutaliwa ukuwozya? Mulole vino vyakonkapo.
1. Amaka. Uwufumu wukapocelela amaka ukufuma kwe Leza Wamaka Yonsinye, e Yehova.—Ukuwumbulika 11:15.
Umulandu wuno cicindamizile: Pakuti amawuteko ya munsi yatwalilile ukuwako, yakapoka indalama ku wantunye wano yakuteka. Ilivule mwe vyonye vino yakacita amuno mukafuma nu wucenjezi nu wung’onye. Lelo woo Uwufumu wa mwiyulu wutasintilila pa ndalama zye wano wukuteka, weni wukafumya amaka kwe Leza Wamaka Yonsinye, awino aliwawapa awatekwa vyonsinye vino wakalonda, wataliwasowelwa cimwi.—Amalumbo 145:16.
2. Kateka. E Leza wasonta e Yesu Klistu ukuwa we Kateka wa mwe woo Uwufumu.—Daniel 7:13, 14.
Umulandu wuno cicindamizile: Na walyanye wakateka awakuti awazima nkaninye, wangawatungulula ku muntu wumwi, ukucita iciwipe cino watate wakulonda. (Ekawizya 7:20) Lelo e Yesu weni walanjizya apatiswenye ukuti, pasi nanti wumwinye wino angamuwozya. (Mateyu 4:8-11) Wawika sana amano ku watekwa wakwe, swinya wawakunda, coo acino cikalenga awacita vyonsinye vino akacita.—Amalumbo 72:12-14.
3. Amasundo. Amasundo ya kwe Leza yapwililika, yakalenga na wino akuyakonka ukuwa ni nsansa.—Amalumbo 19:7, 8.
Umulandu wuno cicindamizile: Amasundo ya wantu yapikana, yawoma, impindi zimwi wasiyawomvya ni cete. Ica kuti coo cikalenga wamwi wasolapo nukuwozya. Lelo amasundo ya kwe Leza yakawomba lyonsinye swinya ivintu vikatuzipila nga twayakonka. (Ayizeya 48:17, 18) Cinji acakuti, amasundo ya kwe Leza yasipelela vye pakulanda pe vino vikafumamo, lelo yakalanda na cino cikalenga wumwi acite vimwi. (Mateyu 22:37, 39) E Leza akamanya vino tukwelenganya swinya angasinincizya nukuti pano tukonka amasundo tukwivwa navino akatulangulucilako.—Jeremiya 17:10.
Manyilanipo na vinji pa malayo ya mu Baibolo ayakuti kunkolelo kuliwa uwuteko muno mutaliwa ukuwozya.
Pakusambilila imilandu yitatu yino mu Wufumu wa kwe Leza mutanga muwele ukuwozya, wazyani icipande ca kuti “Uwufumu wa kwe Leza—Uwuteko Muno Mutaliwa Ukuwozya”.
Pakumanyilapo na vinji pa Wufumu wa kwe Leza na vino wuliyiza wucite munsi, tambani e vidyo ya kuti Uzye Uwufumu wa kwe Leza Acani?
Yelezyani ukutalika ukusambilila Baibolo naswe ukuwomvya ibuku lyakuti Ungikala Amanda Pe! pakuti mulole uwuzima wuno mungazana mu malayo ya mu Baibolo.
a Ukulingana nu wupiliwulo wumwi, “ukuwozya” cikasula ukukanawomvya icete amaka yano wumwi wapwa pakuti akwatilemo vimwi.
b E Yehova, alizina lya kwe Leza. (Amalumbo 83:18) Lolani icipande ca kuti “Uzye e Yehova Weweni?”