Pa Mande, pa 10 October, 2022 umutondo-tondo, awa ku Russia watumile amabomu yano yayile yonona imisumba ya mu Ukraine, wacisile wo-o pa mulandu wakuti, pa manda yawili yano yafumileko awa ku Ukraine nawonyene watumile amabomu yano yayile yonona ilalo ilicindame nkaninye lino lyalinji pakasi ke Crimea ne Russia. Vyo-o vyacitisile lyo papita vye amanda matici ukufumilila pano awa mu vikanza vya nsi wamwi walanzile ukuti kwandi kuwe Armagedoni

•   “Yoo impindi tukulola nukulola ukuti kwandi kuwe Armageddoni ukucila na vino calinji pano kwalinji ivyongo pe U.S ni nsi ya Cuba pano e John F Kennedy walinji we Prezidenti mu United States of America. . . . Nkulola ukuti kutange kuwe inkondo muno wakuwomvya amabomu ye nyukiliya ukwasowa ukuti Armagedoni yize.”​—Avino e Kateka wa ku U.S. e Joe Biden walanzile pa 6 October, 2022.

•   Pa 8 October, 2022 pano awa ku Mulawasa wa BBC wakolowozizye e Kateka wa ku Ukraine e Volodymyr Zelensky pa viwipe vino vingafuma mu kuwomvya ya-a amabomu ya nyukiliya, watiila: “Nkuzumilizyako ukuti kwandi kuwe Armagedoni, amuno co-o cikumile insi yonsinye.”

 Uzye mwelimonye ukuwomvya ya-a ama bomu ye nyukiliya kulilenga kuwe Armagedoni? Nge Baibolo yikatipo wuli?

 Awe. Lyo-o izwi lye “Armagedoni” likazanwavye umuku wonga mwe Baibolo pi waliko lya Ukuwumbulika 16:16. Lisilanda pa nkondo yino yingawa pakasi ka ma wuteko, lelo ankondo ya kwe Leza nga ni zya “mfumu” zya mu nsi yonsinye. (Ukuwumbulika 16:14) E Leza aliwomvya yo-o inkondo pakonona amawuteko yonsinye aya wantu.​—Daniel 2:44.

 Pakumanyilapo na vinji pe vino ciliwa mu nsi pa mpindi ye Armagedoni, wazyani icipande icakuti Uzye Inkondo ya Armagedoni Acani?

 Awe. Nanti acakuti awantu wangiza wawomvye ya-a ama bomu ku nkolelo, E Leza atalitela aleke insi yononeke. E Baibolo yikati:

•   “Insi yeni ayiliyonganye.”​—Ekawizya 1:4.

•   “Awalungamane waliwakwikala umutende munsi, yiwe ansi yawo pe-na-pe.”​—Amalumbo 37:29.

 Lelo kweni nanti ciwe wo-o, amasesemo ya mu Baibolo nga na vino vikucitika pe yo-o impindi, vikulanjizya ukuti tuli ku nsilo ya manda ya kulecelezya. (Mateyu 24:3-7; 2 Timoti 3:1-5) Manyilanipo na vinji pe vyo Baibolo yikalanda pe vino vilicitika ku nkolelo ukuwomya pano pakuti yelezya ukusambilila Baibolo.