Akawungwe ka World Health Organization (WHO), kalanzile ukuti pano cafikanga pa 23 May, 2022, awantu wano wafwile kwe Korona wafisile ne 6.27 milioni. Lelo mwe nyuzi yino wafumizye pa May 5, 2022, akawungwe ka WHO kavwanzile ukuti impendwa ye wano wafwile kwe Korona ayikulu nkaninye ukucila na pe yoo impendwa. Kalanzile ukuti mu mwaka wa 2020 ne 2021, “impendwa ye wano wafwile kwe COVID-19, nanti pa mulandu vye ya kwe yonye indwala yafisile kwe 14.9 milioni.” Uzye e Baibolo yalandapo cimwi pa vya musango woo?

•    E Yesu walandizile lya nkani ukuti kuliwa ivikuko, nanti, ukusalangana kwa “ndwala imbipe,” pe yoo impindi yino ikakwitwa ukuti “amanda yakupepelechezya.”​—Luka 21:11, Baibolo ya Contemporary English Version; 2 Timoti 3:1.

 Vyoo vino Yesu wavwanzile vikuficiliswa ilelo. Pakumanyilapo na vinji, wazyani icipande ca kuti “Acimanyilo ci ica ‘Manda ya Kupelelechezya,’ Nanti ‘Impindi zya Nsilo’?“

•    “E Leza wino ukwavwa kwitu kukafuma . . . akatwavwa mu ntazi zitu zyonsi.”​—2 Wakorinte 1:3, 4.

 Awavule wano wafwilwapo wino wakunda, wazana ukuti amazwi ya mu Baibolo ayano yakawavwa nu kuwasansamusya. Wazizyanipo na vinji mu vipande vya kuti “Vino Vingamyavwa nga Muli nu Wulanda“ na “Vino Vingavwa Wano Wakulosya.“

•    “Uwufumu wako wize; ukulonda kwako kuchitwe munsi ndivino mwiyulu.”​—Mateyu 6:10.

 Nombanye “Uwufumu wa kwe Leza” wandi wucitepo cimwi pakuti kutize kuwe uwili wensinye “munsi yitu wino aliwalwala.” (Marko 1:14, 15; Ayizeya 33:24) Tambani vidyo yakuti Uzye Uwufumu wa kwe Leza Acani? pakuti mumanye wonye woo uwuteko wa mwiyulu na ivno wuliyiza wucite.

 Sambililani na vinji pe vino Baibolo ikalanda pa kuti yamyavwa mwemwe nu lupwa lwinu nu kumipa isuwilo.