Ukuzinguluka insi yonsinye awavule wazumila mucisambilizyo cakuti, watazipizile ukulya inyama nanti ukuwomvya iciliconsinye cino cikafuma ku nyama.

•   “Awantu wano wazumila mwe co-o icisambilizyo, wakakwelenganya ukuti watazipizile ukucita icili consinye cino cingalanjizya ukuti wakonona inyama, ponga ngati akukoma pakuti walye, ukupanjila ivizwalo nantivye ivintu vinji.

 Ukulundapo pakuleka ukulya pakulanjizya ukuti wawika amano kunyama wamwi nawo wakacita wo-o pamulandu navino wazumilamo, ukucinjilila amawumi yawo nanti impanga.

•   “Ukukanalya inyama vyapusana navino umuntu angakana ukulya ivyakulya vinji amuno awantu ilivule wakalola ukuti acizumilo, ukupingulapo ukuzima kuno wangapingulapo nanti inzila yino wenga nawenga angawomvya pakulenga ivintu musi ukuzipa.”​—Britannica Academic.

 Uzye ukuleka ukulya inyama akuno kungalenga intazi ukusila munsi? Vino Baibolo yalandapo

 E Baibolo yalanda ukuti e Yehova  aakalola ukuti awantu wacindama ukulusye inyama, swinya wawapa na maka yakuzitungulula. (Intaliko 1:27, 28) Nakuwa e Yehova wazumilizizye awantu ukuti wawalya inyama. (Intaliko 9:3) Lelo nanti ciwe wo-o, walesya ukucuzya ivinyama.​—Imilumbe 12:10.

 Fwandi ukulingana ne Baibolo, ukulya inyama nanti pole acintu cino wenga nawenga azipizile ukuyipingulilapo. b Vino twapingulapo asavino vikalenga tuwe awantu awazima muminso ya kwe Yehova. (1 Wakorinte 8:8) Acino pasi wino azipizile ukupingula umuwuye pevino wasolapo ukulya.​—Waroma 14:3.

 E Baibolo yalanda ukuti imikalile yino twasolapo muwumi witu asayino ingalenga ukuti intazi zisile munsi. Intazi imvule izya mwe yo-o insi zikacitika pamulandu namawuteko, vino awantu wakacita nanti ivintu vya mwe yo-o insi vino pasi nanti wenganye wino angavimala. E Baibolo yikati:

•   “Utange uyolole cino chanyongana ”​—Ekawizya 1:15.

 E kelewula witu awino alimala intazi zino tukapitamo. E Baibolo yikalanda mumankolanya vino alicita pakumala intazi.

•   “Ngapano ndola iyulu pya ninsi mpya. iyulu lyakutalika ninsi yakutalika avisowa napano vyalyata, nawe sumbi azimanjika.”​—Ukuwumbulika 21:1.

 E Yehova alifumyapo amawuteko ayawantu, nanti “iyulu kali,” nukupyanicizyapo “iyulu pya,” akuli ukuti Uwufumu wakwe uwakwi yulu. Uwufumu wa kwe Leza wulifumyapo “insi nkali,” akuli ukuti wonsinye wano wakacita iviwipe, swinya wuliwateka “insi mpya,” nanti wano wayikundila ukutunjilila uwutunguluzi wakwe.

 Mu wufumu wakwe Leza vye amuno awantu walisambilila ivya kwikala icete ni nyama nga nukucindika ivintu vino vyatuzinguluka.​—Ayizeya 11:6-9.