Pe Ciwili pa 24 May, 2022, kwacitisile icintu cimwi iciwipe nkaninye mwi tawuni ilitici ilya Uvalde, ku Texas, mu U.S.A. Ukulingana ne Nyuzipepa ya The New York Times, yavwanzile ukuti “umonsi wapisile awana 19, wapika na wasambilizya wawili awanaci . . . pi sukulu ilya Robb Elementary School.”

 Ku cawulanda, ivya musango woo vikacitika muno kwacela! E Nyuzipepa ya USA Today yacisile lipoti ukuti mu nsi ya United States mutupunye, “umwaka wuno wasizile kwalinji amalipoti yakupikana pa masukulu ukufika kwe 249. Wo-o umwaka awuno walusizye imyaka yonsinye ukufumilila mu 1970.”

 Amulandu ci wuno ivya musango woo vikaciticila? Acani cino cingatwavwa ukusipicizya nga twapita mu vya musango woo? Uzye acani cino calenga tusuwile ukuti wanda wumwi uwunkalwe wulisila? E Baibolo ikakwasuka yaa amawuzyo.

•    E Baibolo ikalanda impindi yino tufisilepo ukuti “amanda yakupelelechezya” pano awantu “waliwa awakalale” nanti “nkumbu,” cino cikusula ukuti waliwa wacita ivintu vyawunkalwe nanti kulangulucilako wanji. Baibolo ikati awantu wa musango woo waliwaya wakuwipilako “nuwuwipe wawo.” (2 Timoti 3:1-5, 13) Nga mukulonda ukumanyilapo na vinji, wazyani icipande ca kuti “Uzye e Baibolo Yalandizile lya Nkani Vino Awantu Wakucita nu Kwelenganya mwe yaa Amanda?”

 Awavule wakakwelenganya ukuti, ‘Acani cino Leza asilesezya ivya musango woo ndi vino ukupikana pa masukulu ukucitika?’ Pakulola icasuko, wazyani icipande ca kuti “Amulandu ci Wuno Iviwipe Vikaciticila Awantu Awazima?”

•    “Vyonsinye vino vyawalisilwe mu Mawaliko Matele vyawalisilwe kukutusambilizya sweswe, alyakuti tuwalolela nuwuchimyamya mbali ninsimpo zino Amawaliko Matele yatupa.”​—Waroma 15:4.

 Ivisinka vya masundo ya mu Baibolo vingamyavwa ukusipicizya woo uwunkalwe wuno wukucitika munsi. Pakumanyilapo na vinji lolani e Awake! Ino yalinji nu mutwe wakuti “Uzye Uwunkalwe Wulitela Wusile?”

 Wazyani icipande cino catinji “Vino Mungavwa Awana Winu kwe Vino Vikucitika Munsi,” pakulola vimwi vino awakwasi wangacita pakwavwa awana wawo ku malipoti ya kutinya yano wakulola pamanyuzi.

•    “Akawatula kuwikwelengulo nawalombwa.”​—Amalumbo 72:14.

•    “Walisula impanga zyawo ziwe ankundi, namasumo yawo ziwe ankala zyakusanzulila. Imyiko italitela ilwe swinya, nanti akuyisengania kwi sumo.”​—Mika 4:3.

 E Leza alicita icintu vino awantu watanga wacite. Uwufumu wakwe uwa mwiyulu wulifumyapo ivyanzo vyonsinye nu wunkalwe wonsinye pano wapelela. Pakumanyilapo na vinji vino Uwufumu wuliyiza wucite, wazyani icipande ca kuti “Mukuteka kwa Wufumu wa kwe Leza ‘Umutende Wuliwa Konsinye.’”